काठमाडौं- पछिल्लो समय आत्महत्याका विषयमा खबरहरु धेरै आइरहेको बताउँदै नेपाली कांग्रेसका महामन्त्री गगन थापाले युवाहरुलाई बाँच्ने आशा दिन नसकिने राजनीतिको अर्थ नहुने बताएका छन्।
एकपछि अर्को प्रतिभाले आफ्नो जीवन अन्त्य गरेको देख्दा मन कुँडिएको उल्लेख गर्दै राजनीति गर्नेहरुले समाजको आवश्यकता बुझ्नुपर्ने बताए।
उनले प्रश्न गरेका छन्, ‘आखिर हामी कहाँ चुक्यौं? हाम्रो समाज कहाँ चुक्यो? किन हरेक वर्ष आत्महत्या गर्नेहरूको सङ्ख्या बढिरहेको छ? हामीले यतिका वर्षदेखि कसका लागि संघर्ष गर्यौं? हामीले गरेको राजनीतिले, युवाहरू आफ्नै मनसँग लडीरहँदा उनीहरूलाई सहारा दिन सक्दैन भने, युवाहरूलाई बाँच्ने आशा दिन सक्दैन त्यो राजनीतिको के अर्थ? खै हामीले समाजको आवश्यकता बुझेको?’
अब पनि राजनीतिज्ञले ठोस कदम नचाल्ने हो भने भविष्यमा धेरै प्रतिभाहरुलाई युवावयमै गुमाउनुपर्ने अवस्था नरोकिने उल्लेख गरेका छन्। उनले भनेका छन्, ‘हामीले आफ्ना नानीबाबु, भाइबहिनीहरूलाई नै बचाउन सक्दैनौं भने हामीले गरेको सङ्घर्षको, हाम्रो राजनीतिको के अर्थ?’
उनले सामाजिक सञ्जालमा यसरी आफ्ना भावनाहरु प्रस्तुत गरेका छन् :
मन निक्कै भारी छ, मस्तिष्क प्रश्नहरूले घेरिएको छ।
पछिल्ला केही हप्तामा सामाजिक सञ्जाल, युवा कलाकारहरूको आत्महत्याको खबरले भरियो। एकपछि अर्को प्रतिभाले आफ्नो जीवन अन्त्य गरेको देख्दा मन कुँडिएको छ। आज बिहान सामाजिक सञ्जाल खोल्दै गर्दा एक जना अर्को कलाकारको त्यस्तै खालको अभिव्यक्ति देखेँ। एकदमै अत्यास लाग्यो।
आखिर हामी कहाँ चुक्यौं? हाम्रो समाज कहाँ चुक्यो? किन हरेक वर्ष आत्महत्या गर्नेहरूको सङ्ख्या बढिरहेको छ? हामीले यतिका वर्ष देखि कसका लागि संघर्ष गर्यौं? हामीले गरेको राजनीतिले, युवाहरू आफ्नै मनसँग लडीरहँदा उनीहरूलाई सहारा दिन सक्दैन भने, युवाहरूलाई बाँच्ने आशा दिन सक्दैन त्यो राजनीतिको के अर्थ? खै हामीले समाजको आवश्यकता बुझेको? हामीले गर्ने राजनीति जनताको लागि हो। उहाँहरूको जीवन भौतिक विकास बाहेक अरू पनि थुप्रै विषयसँग जोडिएको छ भनेर बुझ्न अझै कति समय लाग्ने हो?
सामाजिक सञ्जालमा साथीको संख्यामा मानिसहरूको एक्लोपन बढेको छ। मान्छे स्क्रिनसँग बढी निकट हुन थालेको छ। मनका कुरा राख्ने ठाउँ भेट्न छोडेको छ। मानसिक रूपमा संघर्ष गर्दै छु भन्दा लाज मान्नुपर्ने कस्तो समाजको निर्माण गर्यौं हामीले? कसैले हिम्मत गरेर मलाई परामर्श चाहिने छ भन्यो भने पनि शुल्कका कारण त्यो सुविधा लिन नसक्ने अवस्था छ।
अब पनि हामीले ठोस कदम नचाल्ने हो भने, हामीले भविष्यमा धेरै मानिका र सरोनहरूलाई गुमाउने छौँ। हामीले त्यो अवस्था कदापि आउन दिनुहुन्न। यसमा तपाईँ हामी सबैको भूमिका रहन्छ। अब मानसिक स्वास्थ्यसम्बन्धी चेतना, परामर्श र उपचार स्थानीय निकायबाट हुने गरी सामान्य व्यक्तिको पहुँच पुग्ने संयन्त्र निर्माण गरौं। हामी चाँडै नै काठमाडौँ महानगर वार्ड नं ३० मा सञ्चालन भइरहेको शहरी स्वास्थ्य प्रवर्द्धन केन्द्र ( Urban Health Promotion Centre - Kathmandu 30 ) मा मानसिक स्वास्थ्यका लागि आवश्यक थप सेवाहरू विस्तार गर्ने छौं। तपाईंले यहाँबाट पनि नि:शुल्क सेवा लिन सक्नु हुनेछ।
हरेक व्यक्तिले आफ्नो भावनात्मक, मानसिक स्वास्थ्यलाई बुझ्ने, सहयोग चाहिएमा प्रोफेसनल सहयोग पाउने अवस्था सृजना गर्नुपर्छ। विद्यालयहरूमा सानै उमेरबाट बालबालिकाले यस्ता खाले जानकारी र सहयोग पाउन सके भने, कालान्तरमा उनीहरूका लागि सहज हुन्छ। हामीले यससम्बन्धी पहल कानुनी रूपमा नै गर्नुपर्छ। हामीले आफ्ना नानीबाबु, भाइबहिनीहरूलाई नै बचाउन सक्दैनौ भने हामीले गरेको संघर्षको, हाम्रो राजनीतिको के अर्थ?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
