महाकाली सिँचाइ परियोजना: तेस्रो चरणको मूल नहर परीक्षणका लागि पानी छाडिँदै

कृषि

नेपाल लाइभ शुक्रबार, असार २२, २०८० ०९:२८

महेन्द्रनगर– कञ्चनपुरको महेन्द्रनगरस्थित महाकाली सिँचाइ आयोजनाले तेस्रो चरणको मूल नहरमा परीक्षणका लागि पानी छोड्ने तयारी गरेको छ।

आयोजनाले आज (शुक्रबार) ब्रह्मदेवदेखि फुलेलीसम्म २७ किलोमिटर मूल नहरमा पानी परीक्षण गर्न लागेको महाकाली सिँचाइ तेस्रो चरण आयोजनाका सिनियर डिभिजनल इन्जिनियर शम्भुराज पण्डितले जानकारी दिए।

‘मूल नहरमा ३ देखि १० क्युसेकसम्म पानी छोड्ने तयारी छ,’ उनले भने । नहरमा पानी छोड्ने भएकोले सो क्षेत्रका बासिन्दालाई आफ्ना बालबालिका, चौपायालगायतको सुरक्षामा ध्यान दिन आग्रह गरेको छ।

गत वर्ष टनकपुर ब्यारेजबाट पानी ल्याएर असार १५ गते धान दिवस मनाए पनि भारतीय पक्षले त्यसपछि नहरमा पानी छोड्न मानेको थिएन। आयोजनाअन्तर्गत हालसम्म २८ किलोमिटर मूल नहर निर्माण भएको छ।

नहर निर्माण भएको क्षेत्रमा २२ शाखा नहर निर्माणाधीन अवस्थामा छन्। २२ शाखा नहर निर्माण भएपछि ५ हजार १०० हेक्टर जमिनमा सिँचाइ सुविधा उपलब्ध हुनेछ। अहिले थप २० किलोमिटर नहर निर्माणको काम चलिरहेको छ।

आगामी आर्थिक वर्ष २०८०/८१ मा आयोजनाका लागि १ अर्ब १७ करोड बजेट विनियोजन भएको छ। राष्ट्रिय गौरवको आयोजना भए पनि अपेक्षाकृत बजेट विनियोजन हुन नसकेको पण्डितले बताए। नहर निर्माण सम्पन्न भए कैलालीको मालाखेतीदेखि कञ्चनपुरको पुनर्वासम्म ३३ हजार ५२० हेक्टर जग्गामा सिँचाइ सुविधा पुग्नेछ। टनकपुर ब्यारेजस्थित महाकाली नदीबाट बर्खामा १ हजार क्युसेक र सुख्खायाममा साढे ३०० क्युसेक पानी उपलब्ध हुनेछ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

परराष्ट्रमन्त्री आज स्वदेश फर्किँदै

एनपीएलमा सट्टेबाजी गरेको आरोपमा थप दुई भारतीय पक्राउ

शीतलनिवासमा पाँच राजदूतले लिए सामूहिक शपथ