काठमाडौं– ललितपुर जिल्ला अदालतका कर्मचारीहरुले सुरक्षाको ग्यारेन्टी नहुँदासम्म काममा फर्किन नसक्ने बताएका छन्। मंगलबार प्रधानन्यायाधीश हरिकृष्ण कार्कीलाई भेटेर उनीहरुले आफूहरुको सुरक्षाको ग्यारेन्टी हुनुपर्ने माग गरेका हुन्।
प्रधानन्यायाधीशलाई भेट्न सर्वोच्च अदालत पुगेका ललितपुर जिल्ला अदालतका कर्मचारीहरुले अहिलेकै अवस्थामा अदालत फर्किएर काम गर्न नसकिने बताएका छन्।
‘हामीले सम्माननीय प्रधानन्यायाधीशज्यूलाई भेटेर सुरक्षाको ग्यारेन्टी हुनुपर्ने माग गरेका छौं। सुरक्षाको ग्यारेन्टी नहुँदासम्म, अहिलेकै अवस्थामा काममा जान सकिँदैन भनेर पनि ध्यानाकर्षण गरायौं,’ सर्वोच्च अदालत परिसरमा भेटिएका ललितपुर जिल्ला अदालतका एक कर्मचारीले भने।
प्रधानन्यायाधीश कार्कीले त्यस विषयमा आफ्नो ध्यानाकर्षण भएको र कर्मचारीले सुरक्षित वातावरणमा काम गर्नुपर्छ भन्नेबारे सकारात्मक रहेको भनेर जवाफ दिएको ती कर्मचारीको भनाइ छ।
ललितपुर जिल्ला अदालतकी नायव सुब्बा प्रेमिका तामाङमाथि अधिवक्ता अमिर लामिछानेले बुधबार साँझ कार्यकक्षमै हातपात गरेको विषय सार्वजनिक भएपछि अहिले अदालत र कानुन व्यवसायीबीच विवाद बढेको छ।
लामिछानेलाई प्रहरीले पक्राउ गरी आवश्यक अनुसन्धान पनि अगाडि बढाएको थियो। तर अदालतमा कार्यरत कर्मचारीहरुले भने लामिछानेमाथि अदालतको अवहेलनामा समेत कारबाही हुनुपर्नेसहित माग राखेर आन्दोलन गरे।
अदालतका कर्मचारीहरु आन्दोलित बनेपछि कानुन व्यवसायीहरु पनि प्रतिवादमा उत्रिएका छन्। लामिछानेलाई कृत्रिम मुद्दामा फसाइएको दाबीसहित कानुन व्यवसायी पनि आन्दोलित बनेका छन्। नेपाल बार एसोसिएसनका अध्यक्ष गोपालकृष्ण घिमिरे र महासचिव सञ्जीता खनालले संयुक्त विज्ञप्ति जारी गर्दै कानुन व्यवसायीलाई पक्राउ गरी थुनामा राखिएको विरोधमा देशभरका अदालतका बहस बहिस्कार गरिएको उल्लेख छ।
विवाद समाधानका लागि भन्दै प्रधानन्यायाधीश कार्कीले बारका पदाधिकारीसहित कानुन व्यवसायीसँग छलफल गरेका थिए। तर उक्त छलफलबाट खास प्रगति नभएको कानुन व्यवसायीको भनाइ छ।
कानुन व्यवसायीहरुले अहिले ‘टी–ब्रेक’ (खाजा समय)को अवधिमा विरोध गर्ने कार्यक्रम अगाडि सारेका छन्। कानुन व्यवसायीहरुले सोमबार ललितपुर जिल्ला अदालत परिसरमा विरोध प्रदर्शन गरेका थिए।
मंगलबार ललितपुर जिल्ला अदालतका न्यायाधीशले समेत प्रधानन्यायाधीशलाई भेटेका छन्। कर्मचारीहरु काममा नआउँदा न्याय सम्पादन गर्न नसकिएको गुनासो उनीहरुले प्रधानन्यायाधीशलाई गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
