काठमाडौं– साफ च्याम्पियनसिप पुरुष फुटबल प्रतियोगिताको उद्घाटनमा कुवेतविरुद्ध खेल्न लागेको नेपालले सुरुवाती–११ सार्वजनिक गरेको छ।सार्वजनिक सूचीअनुसार कप्तान तथा गोलरक्षकको भूमिकामा किरण लिम्बू यथावत छन्। अनन्त तामाङ, रोहित चन्द, सनिश श्रेष्ठ र विमल पाण्डेले डिफेन्स समाल्ने छन्। फ्रन्ट लाइनमा नवयुग श्रेष्ठ, मनिष डाँगी र अन्जन विष्ट छन्।
मिडफिल्डमा लकेन लिम्बू, पुजन उपरकोटी र एरिक विष्ट छन्। साफ च्याम्पियन्ससिप प्रतियोगिता आज (बुधबार)देखि भारतमा सुरु हुँदैछ। १४औं संस्करणको साफको पहिलो खेलमा नेपालले आमन्त्रित टिम कुवेतसँग प्रतिस्पर्धा गर्दै छ। नेपाल र कुवेतबीचको खेलको भारतको बैंगलोरस्थित श्री कांतिराव स्टेडियममा नेपाली समयानुसार दिउँसो ३:४५ बजे सुरु हुनेछ।
साविकको उपविजेता रहेको नेपालले पहिलो खेलमै बलियो टोली कुवेतसँग प्रतिस्पर्धा गर्न लागेको हो। विश्व फुटबल महासंघ (फिफा) को पछिल्लो वरियतामा नेपालभन्दा कुवेत ३१ स्थान अगाडि छ। नेपाल १७४ औं स्थानमा रहँदा कुवेत १४३औं स्थानमा छ।
कुवेतसँग नेपालले अहिलेसम्म ९ खेल खेलेको छ। जसमध्ये ८ खेलमा कुवेत विजयी भएको छ भने १ खेल बराबरीमा सकिएको छ। पछिल्लोपटक सन् २०२२ को जुनमा एसिया कप छनोटको तेस्रो चरणमा कुवेतले नेपाललाई ४–१ ले पराजित गरेको थियो।
कुवेतसँगै लेबनानले पहिलोपटक आमन्त्रित टिमको रूपमा साफ खेल्न लागेका हुन्। प्रशिक्षक भिन्चेन्सो अल्बर्तो एनेसले नेपालले छोटो समय तयारी गरेको भए पनि राम्रो प्रदर्शन गर्ने अपेक्षा राखेका छन्।
मंगलबार बेंग्लोरमा भएको प्रिम्याच कन्फ्रेन्समा प्रशिक्षक एनेसले टिममा धेरै नयाँ खेलाडी रहेको र उनीहरूबाट उत्कृष्ट प्रदर्शनको अपेक्षा रहेको बताए। साफ च्याम्पियनसिपको तयारीस्वरुप नेपालले फिलिपिन्ससँग मैत्रीपूर्ण खेल खेलको थियो। जसमा नेपाल १–० ले पराजित भएको थियो।
यस संस्करणको च्याम्पियनसिपमा नेपालसहित आयोजक भारत, बंगलादेश, कुवेत, लेबनान, भुटान, पाकिस्तान र माल्दिभ्स छन्। नेपाल रहेको समूह ‘ए’मा भारत, कुवेत र पाकिस्तान रहेका छन्। समूह ‘बी’ मा लेबनान, माल्दिभ्स, भुटान र बंगलादेश रहेका छन्।
त्यसो त साफ च्याम्पियनसिपको अहिलेसम्मको यात्रा नेपालका लागि सुखद छैन। साफ च्याम्पियनसिपमा अहिलेसम्म ४३ खेल खेलेको नेपालले १३ खेलमा मात्रै जित निकालेको छ।
नेपाल अहिलेसम्म एकपटक मात्रै साफ च्याम्पियनसिपको सेमिफाइनल प्रवेश गरेको छ। अघिल्लोपटक माल्दिभ्समा भएको प्रतियोगिताको सेमिफाइनल पुगे पनि भारतसँग पराजित हुँदा उपविजेतामा सीमित भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
