काठमाडौं- नक्कली भुटानी शरणार्थी प्रकरणमा काठमाडौं जिल्ला अदालतमा बहस चलिरहेको छ। प्रतिवादीका तर्फबाट अन्तिम दिनको बहस चलिरहँदा शरणार्थीका नेता भनेर चिनिएका टेकनाथ रिजालको पक्षमा बहस चलिरहेको थियो।
उनका कानुन व्यवसायीले रियाल त्यागी नेता भएकाले यस्तो प्रकरणमा जोड्नु गलत भएको इजलासमा दाबी गरिरहेका थिए। उनले कानुन व्यवसायीले आफ्नो बचाउ गरेकोमा थप गर्न आफैं इजलासमा उठे। उनले न्यायाधीश प्रेमप्रसाद न्यौपानेलाई आफूले केही भन्न चाहेको भन्दै समय मागे। उनले इजलासमा उभिएर आफूमाथि लगाएको आरोप गलत भएको भन्दै दुई/चार जना चोरका कारण आफूले किन मुद्दा खेप्ने भनी प्रश्न गरे।
उनले आफूले लामो समय भुटानीको अधिकारका लागि निर्वासनमा बिताएको र उनीहरुकै लागि लडेकाले यस्तो गलत कार्यमा संलग्न नभएको दाबी गरे। उनले आफू कुनै पनि नक्कली भुटानी बनाउने कार्यमा संलग्न नभएकाले यो अभियोग गलत भएको दाबी गरे।
उनका कानुन व्यवसायीले पनि रिजाल लामो समय भुटानबाट नेपालमा निर्वासन जीवन बिताएको र भुटानीहरुको अधिकारका लागि त्याग गरेको व्यक्ति भएकाले यसमा संलग्न नभएको तर गलत अभियोग लगाएको दाबी गरेका थिए। रिजालले सरकारी वकिलमाथि पनि आक्रोश पोखे। उनले आफूमाथि औंला देखाएर बहस नगर्न पनि उनले आग्रह गरे। आफूले कुनै गल्ती नगरेका कारण यस्तो नगर्न उनको आग्रह थियो।
उनको तर्फबाट अधिवक्ता राजकुमार सुवालले बहस गर्दै रिजाल भुटानी शरणार्थीकै अधिकारका लागि राजाको सल्लाहकार जस्तो पद छोडेर हिँडेको व्यक्ति भएको भन्दै केही लाखका लागि नक्कली भुटानी शरणार्थी प्रकरणमा जोड्नु नहुने बताए।
उनले सरकारले दिएको भत्ता खाएर बसेको व्यक्ति यस्ता कार्यमा संलग्न हुन नसक्ने भन्दै भुटानी शरणार्थी समस्या समाधानको क्रममा भएको भेटलाई आधार बनाएर मुद्दा दायर हुन नसक्ने बताए।
रिजालले एक लाख बढी शरणार्थी समस्या समाधानमा महत्वपूर्ण भूमिका निभाएको भन्दै अहिले गलत आरोप लगाउन नमिल्ने उनको जिकिर थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
