प्रतिनिधि सभा बैठक (फाइल तस्बिर)
काठमाडौं– सरकारले आगामी आर्थिक वर्षका लागि ल्याएको बजेटअन्तर्गत विनियोजन विधेयकको मन्त्रालयगत छलफल बिहीबारदेखि छलफल सुरु भएको छ। प्रतिनिधि सभाको बिहीबारको बैठकमा २ वटा मन्त्रालय वन तथा वातावरण र महिला बालबालिका तथा ज्येष्ठ नागरिक मन्त्रालयको विनियोजन शीर्षकमाथि छलफल भयो।
बिहीबारको बैठकमा शहरी विकास, वन तथा वातावरण, युवा तथा खेलकुद र महिला तथा बालबालिका मन्त्रालयहरुमा विनियोजित बजेटमाथि छलफल हुने क्रर्यक्रम थियो। तर जम्मा २ वटा मन्त्रालयको बजेटमाथि मात्रै छलफल हुनसक्यो। अन्य २, शहरी विकास मन्त्रालयको कार्यक्रम पुस्तिका प्राप्त नभएको भन्दै कार्यसूचीबाट हटाइयो भने युवा तथा खेलकुदमन्त्री उपस्थिति भएको नपाइएपछि त्यो मन्त्रालयको बजेटमाथिको छलफल पनि कार्यसूचीबाट हटाइयो।
शहरी विकास मन्त्रालय माथिको छलफल प्रारम्भमै कार्यसूचीमा हटाइए पनि युवा तथा खेलकुद मन्त्रालय माथिको छलफल भने सांसदहरुले प्रश्न उठाएपछि मात्र हट्यो।
मन्त्रालय माथिको छलफलमा सहभागी हुन रोस्ट्रममा पुगेकी राप्रपा सांसद रोशन कार्कीले आफूले मन्त्री नदेखेको भन्दै सभामुखलाई प्रश्न गरिन्। उनि अघि बोल्ने सांसदहरुले भने धमाधम छलफलमा सहभागिता जनाइरहेका थिए। सांसद कार्कीले पनि मन्त्रीको खोजी गरेर उक्त मन्त्रालयकै विनियोजन बजेटमाथि छलफलमा सहभागिता जनाइन्।
सांसद कार्कीले भनिन्, ‘यहाँबाट उभिएर तल सिटतिर हेर्दा मैले युवा तथा खेलकुदमन्त्री देखिनँ। सभामुखमार्फत् म सोध्न चाहान्छु के उहाँ विदेश यात्रामा हुनुहुन्छ?’
सांसद कार्कीले आफ्नो भनाइ राखेपछि सभामुखको भूमिकामा रहेकी उपसभुमुख इन्दिरा रानाले मन्त्री विदेशमा रहेको र सांसदहरुले उठाएको विषयलाई टिपोट गर्न सचिवहरु रहेको बताइन्।
‘युवा तथा खेलकुदमन्त्री विदेशमा रहनु भएको र उक्त मन्त्रालयको कार्यवाहक लिनु भएको मन्त्रीलाई खबर गर्ने काम भइरहेको जानकारी गारउँद छु,’ उपसभामुख रानाले भनिन्, ‘साथै, उक्त मन्त्रालयको सचिव सहितको टोली सदन भित्रै रहेको पनि जानकारी गराउँछु।’
तर रानाको उक्त स्पष्टीकरणमा एमाले सांसद सुर्य बहादुर थापाले असहमति जनाए र मन्त्री बेगर छलफल अघि बढाउनु नहुने तर्क गरे।
‘सभामुख ज्यू यो छलफललाई हामीले कसरी संचालन गरिरहेका छौं? विदेशमा हुनुहुन्छ भने स्वदेशमा आउने दिन पनि निर्धारित होला। त्यो दिनमा राखूँ। मन्त्री ज्यूहरु बेगरको छलफल, भैंसीका अघाडि बाँसुरी बजाए जस्तो छलफल किन गराइरहेका छौं हामीले?,’ सांसद थापाले भने।
यस्तै, संसद्ले सचिवलदाई नचिन्ने हुँदा सो मन्त्रालयको छलफल कार्यसूचीबाट हटाउन आग्रह गरे।
‘सचिव ज्यू हुनुहुन्छ भन्ने रुलिङ चाहिँ मान्य हुन सक्दैन। किनभने सचिव ज्यूलाई हामीले देख्दैनौँ। यदि मन्त्री हुनुहुन्न भने यो विषयलाई आजको कार्यसूचीबाट हटाइयोस् र उहाँ आएपछि छलफलमा राखियोस्,’ सांसद थापाले भने।
त्यसपछि केही अलमल भयो। केही मिनेटमै सभामुख देवराज घिमिरे कार्यसंचालन गर्न आए। र सचिवालयको परामर्शमा उनले उक्त मन्त्रालय माथिको छलफल कार्यसूचीबाट हटाइदिए।
‘युवा तथा खेलकुद मन्त्री ज्यूको उपस्थिति नरहेकोले जे कुरा उठ्यो त्यसले गर्दा आजको कार्यसूचीमा रहेको युवा तथा खेलकुद मन्त्रालय सम्बन्धीको विषयलाई हटाएर बाँकी दुईवटा मन्त्रालयको नियमति अगाडि लाने कुरामा म निर्देश गर्दछु,’ सभामुख घिमिरेले भने।
संघीय संसद् सचिवालयले असार ८ गतेसम्म विनियोजन विधेयकको मन्त्रालयगत छलफल टुंग्याउने गरी कार्यसूची तय गरेको छ।
त्यसपछि मन्त्रालयगत छलफलको क्रममा उठेका प्रश्नहरुको सम्बन्धित मन्त्रीहरुले जवाफ दिने कार्यक्रम छ। सम्बन्धित मन्त्रीहरुले जवाफ दिने कार्यक्रमका लागि असार १० देखि १२ गतेसम्मको कार्यसूची तय भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
