काठमाडौं– उत्तम बचत तथा ऋण सहकारी संस्था लिमिटेडले थप साढे ५ करोड रुपैयाँ ठगी गरेको पाइएको छ। यसअघि १३ करोड रुपैयाँभन्दा बढी ठगी गरेको आरोपमा यो सहकारीका सञ्चालकसहितविरुद्ध मुद्दा चलेको थियो।
अहिले फेरि १०० बचतकर्ताको साढे ५ करोड रुपैयाँ भन्दा बढी ठगी गरेको पाइएको हो। १०० जनाको ५ करोड ६६ लाख ७५ हजार २५ रुपैयाँ ठगी भएको भन्दै जिल्ला अदालत काडमाडौंमा मुद्दा दायर भएको छ।
यसअघि ४१५ जना बचतकर्ताहरुको १३ करोड ७ लाख ९७ हजार ६७ रुपैयाँ ठगी गरेको भन्दै गत चैतमा यो सहकारीका सञ्चालकसहित पदाधिकारीहरुविरुद्ध मुद्दा चलेको थियो। अहिले फेरि आफूहरु पीडित भएको भन्दै उजुरी दिएपछि थप एक सय जनाको साढे ५ करोड रुपैयाँ भन्दा बढी ठगी गरेको खुलेको हो।
काठमाडौं महानगरपालिका–३ बसुन्धारामा रहेको उत्तम सहकारीले ठगी गरेको आरोपमा सहकारीकी अध्यक्ष काठमाडौं महानगरपालिका–३ की ३८ वर्षीया लक्ष्मी श्रेष्ठ र लमजुङको मध्य नेपाल नगरपालिका–९ घर भइ सहकारीकी सदस्य २५ वर्षीया शीला रानाभाट पक्राउ परेका थिए। अध्यक्ष श्रेष्ठलाई पुर्पक्षका लागि कारागार चलान गरिएको थियो भने रानाभाट रिहा भएकी थिइन्।
अहिले फेरि यी २ जनासहित पहिले नै फरार प्रतिवादी बनाइएकाहरु कोषाध्यक्ष लमजुङको सुन्दरबजार नगरपालिका–४ का ३८ वर्षीय दुर्गाराज न्यौपाने, सहकारीको सदस्य रहेकी काठमाडौं–१८ की ५४ वर्षीया ईश्वरी राजवाहक, सदस्य काठमाडौं–१६ बालाजुकी ४४ वर्षीया मन्दिरा राजवाहक, काठमाडौं–११ का ५५ वर्षीय बद्रीबहादुर जोशी र सचिव उदयपुरकी ४० वर्षीया छत्रकुमारी धना मगरलाई प्रतिवादी बनाउँदै मुद्दा दर्ता गरिएको छ।
अहिलेसम्म यो सहकारीले ५१५ जनाको १८ करोड रुपैयाँ भन्दा बढी गरेको पाइएको छ। यसअघि ४१५ जना बचतकर्ताको १३ करोड ७ लाख ९७ हजार ६७ रुपैयाँ ठगी गरेको भन्दै मुद्दा दर्ता भएको थियो। अहिले फेरि १०० जनाको साढे ५ करोड रुपैयाँ भन्दा बढी गरेको भन्दै मुद्दा दर्ता भएको छ।
१०० जनाबाट साढे ५ करोड ठगीको विवरण:
उनीहरुले आकर्षक ब्याजको प्रलोभन देखाउँदै रकम जम्मा गर्न लगाइ बचतकर्ताले बचत गरेको रकम लिएर फरार भएको उजुरीकर्ताले बताएका छन्।
जम्मा गरेको रकम निकाल्न जाँदा निकाल्न समेत नदिएको, जम्मा भएको रकम आफूखुसी विभिन्न ठाउँमा लगानी गरेर रकम अपचलन गरी ठगी गरेको पाइएको अनुसन्धानबाट खुलेको छ।
उक्त सहकारीमा दैनिक १ हजार ८०० जना बचतकर्ताले रकम जम्मा गर्ने गरेका थिए। उनीहरुबाट दैनिक ६ लाख रुपैयाँभन्दा बढी रकम उठ्ने गरेको थियो। साथै निक्षेपकर्ताहरुले मुद्दती खाता समेत खोलेर २५ लाख रुपैयाँसम्म जम्मा गर्ने गरेका थिए। बचतकर्ताको उक्त रकम फिर्ता दिनुको साटो कर्जा लिन आएका व्यक्तिलाई कर्जा प्रवाह गर्ने र बाँकी रहेको रकम संस्थाको नाममा रहेको ग्लोबल आईएमईको खातामा जम्मा गर्ने गरेको पाइएको छ।
सहकारी नाफामा जाँदा उक्त रकम सञ्चालक समितिका सदस्यहरुले बिना धितो तथा बिना ब्याज २० लाखसम्म लैजाने गरेको अनुसन्धानबाट खुलेको छ। संस्था नाफामा गएको बेला बालुवाटार, माछापोखरी, नारायणस्थान र बसुन्धारा गरी ४ ठाउँमा उत्तम मार्ट समेत सञ्चालन गरेका थिए।
पछि बिना धितो लगानी गरेको कर्जा समेत नउठ्ने र कोराना माहामारीका कारण मार्ट समेत घाटामा गएर सहकारी डुबेको पक्राउ गरेकी अध्यक्ष श्रेष्ठले प्रहरी समक्षको बयानमा बताएकी छिन्।
पक्राउ परेका तथा फरार भएकाहरुले सहकारी ऐन, २०७४ को दफा १२२ को खण्ड (घ), (ङ) र (च) बमोजिमको कसुर गरेको भन्दै सोही अनुसारको कारबाहीको माग गर्दै जिल्ला अदालत काठमाडौंमा मुद्दा दायर गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778914069.png)
-1764146706.png)
