कन्चनपुर- सोमबार बिहान कञ्चनपुरको भीमदत्तनगरपालिका–१८ भगतपुरस्थित सहिद सनी खुनाको घर पुग्दा आफन्तबीच उनकोे परिवार शोकमा डुबेको थियो।
भाषीस्थित साहुको घरमा काम गरेको ज्याला रकम लिन हिँडेका १४ वर्षीय सनी शुक्रबार बेलुकी प्रहरीको गोली लागेर सहादत प्राप्त गरेयता उनका बुबा वीरबहादुरको आँखाबाट बगेको आँसुको भेल अझै रोकिएको छैन।
वि.सं २०६६ अघिसम्म भीमदत्तनगरपालिका–१६ वसन्तपुरमा कमैया जीवन बिताएका वीरबहादुर हाल भीमदत्तनगरपालिका कार्यालयमा नगर सरसफाइका जागिरे हुन्। कमैया मुक्त भएपछि भगतपुरमा मिलेको साढे चार धुर जमीनमा ओत लाग्ने दुई कोठे झुपडी बनाएर परिवार पालिरहेका वीरबहादुर छोरा सनीको निधनले स्तब्ध मात्रै छैनन्, आफ्नो जीवनको सहारा गुमाउँदा अथाह पीडामा डुबेका छन्।
सनीका आमा मञ्जु खुना पनि गहभरी आँसु लिएर सहानुभूतिका लागि आउने आफन्तजनसित कुराकानी गर्छिन्,‘छोरा सहिद भए पनि नियतिले घरपरिवारको खुसी नै लुटेको छ’, उनले भनिन्,‘निर्दोष सनी छातीमा गोली थापेर सहिद बन्यो।’
पछिल्लो समय ज्याला मजदुरीमा लागेर परिवारको खर्च चलाउन सहयोगी बनेका सनीले अध्ययन भने गर्न सकेनन्। ‘आर्थिक अवस्था निकै कमजोर भएकाले सनीको ४ कक्षामै पढाइ रोकेँ,’ आमा मञ्जुले भनिन्, ‘केही गरेर परिवार चलाउँ भन्ने बेला सपना सबै उडे।’ उनले छोराले गोली खाएको ठाउँमा सहिद सनीको शालिक बनाएको देख्ने आफ्नो धोको रहेको सुनाइन्। ‘छोरा ढलेको ठाउँमा उसको शालिक बनाइदिए हुन्थ्यो’, मञ्जुले भनिन्, ‘छोराको शालिक हेरेर चित्त बुझाउनु हुन्थ्यो।’
मञ्जु पनि विगत दुई वर्षदेखि भीमदत्तनगरस्थित मन्टेश्वरी स्कुलमा खाना बनाउने काम गर्छिन्। ‘घटना भएको दिन दिउँसोसम्म सनी घरमै थियो’, उनले भनिन्, ‘ठूलोबुबाको छोरा उमेशसित काम गरेको पैसा लिन गएछ, फर्केर आएन’, मञ्जु सहिद सनीका कान्छी आमा हुन्। सनी अढाइ वर्षको छँदा उसकी आमा मायादेवी खुनाको निधन भएको थियो।
सनीका भाइ एलुन खुना अहिले पाँच वर्षका छन् भने दुईवटै दिदीको विवाह भइसकेको छ। रक्षाबन्धनकै दिन भाइको शव देख्दा सनीका दुई दिदी त्यो दिन रोएर बिताएको मञ्जुको भनाइ छ।
निर्मला काण्डको एक महिना
बलात्कारपछि हत्या गरी उखुबारीमा फालिएका कञ्चनपुर भीमदत्तनगरपालिका–२ खोल्टीका १३ वर्षीया निर्मला पन्तको हत्या भएको एक महिना बितिसकेको छ। प्रहरीले उक्त घटनामा संलग्न भन्दै भीमदत्तनगरपालिका–१९ बागफाँटाका ४१ वर्षीया दिलीपसिंह विष्टलाई गत साता सार्वजनिक गरे पनि स्थानीय र मृतकका आफन्तले भने त्यसलाई इन्कार गरे।
आज राष्ट्रिय मानव अधिकार परिषद्को टोलीलाई निम्बुखेडास्थित घटनास्थल देखाइरहेको अवस्थामा भेटिएका निर्मलाका बुबा यज्ञराज पन्तले घटनाका दोषीलाई एक महिनासम्म कानुनी दायरामा ल्याउन नसक्नु प्रहरी प्रशासनको लाचारीपन भएको बताए। ‘घटनाका पीडकलाई कानुनी दायरामा ल्याएमात्रै निर्मलाको आत्माले शान्ति पाउनेछ’, बुबा यज्ञराजले भने, ‘यहाँ अपराधी बचाउन धेरै षड्यन्त्र भइरहेका छन्।’
उनले निर्मला गृहकार्य गर्न गएको रोशनी बमको घरलाई केन्द्र मानेर अनुसन्धान गर्न माग गरे। ‘निर्मला र रोशनी एउटै कक्षामा पढ्ने साथी हुन्’, उनले भने, ‘निर्मलालाई फकाएर बम दिदीबहिनीले षड्यन्त्र रचे।’ निर्मलाको खोजी कार्यका लागि पुग्दा प्रहरीबाट बेवास्ता भएको उनको भनाइ छ।
‘समयमै खोजी गरिदिन आग्रह गर्दा प्रहरीबाट बेवास्ता भयो’, उनले भने, ‘न्याय नपाएसम्म लडिरहनेछु।’ गत साउन १० गते साथी बमको घरबाट घर फर्किरहेकी निर्मलाको साउन ११ गते बिहान उखुबारीमा शव भेटिएको थियो। घटनापछि स्थानीय बासिन्दाले चरणबद्ध आन्दोलन थालेका थिए।
सरकारले निर्मला काण्डबारे छानबिन गर्न उच्चस्तरीय टोली कञ्चनपुर पठाएको छ भने जिल्लामा स्थानीय प्रशासन र प्रहरीको नयाँ नेतृत्व पठाएर अनुसन्धान तीव्र बनाएको छ। जिल्ला प्रहरी कार्यालय कञ्चनपुरका प्रहरी उपरीक्षक कुँवेर कडायतले घटनाको शून्यबाट अनुसन्धान थालिएको बताए।
जिल्ला प्रहरी कार्यालय कञ्चनपुरका प्रहरी नायव उपरीक्षक कृष्णराज ओझालाई घटनाबारे अनुसन्धानका लागि अधिकृत तोकिएको छ। आन्दोलनका कारण अशान्त बनेको भीमदत्तनगर अझै सामान्य अवस्थामा फर्किन सकेको छैन।
बम दिदीबहिनीको म्याद थप
त्यसैगरी घटनाबारे अनुसन्धानका लागि नियन्त्रणमा लिइएका रोशनी बम र बबिता बमलाई थप अनुसन्धानका लागि जिल्ला प्रहरी कार्यालय कञ्चनपुरले आज जिल्ला अदालत कञ्चनपुरबाट म्याद थप गरेको छ।
म्याद थप गरिएसँगै उनीहरूको बयान लिने र अन्य अनुसन्धानको काम सुरु भएको जिल्ला प्रहरी कार्यालय कञ्चनपुर स्रोतले जनाएको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
