शेरबहादुर देउवा (फाइल तस्बिर)
काठमाडौं– सत्तारुढ दल नेपाली कांग्रेसका सभापति शेरबहादुर देउवाले पार्टीका नेता, कार्यकर्तालाई एकताबद्ध भएर अघि बढ्न निर्देशन दिएका छन्। पार्टीमा योग्य, जुझारु र गतिशील नेता, कार्यकर्तालाई उचित जिम्मेवारी दिन आफू प्रतिबद्ध रहेको देउवाको भनाइ छ।
शनिबार नेपाली कांग्रेस भक्तपुर जिल्ला कार्य समितिले आयोजना गरेको एक कार्यक्रममा बोल्दै देउवाले प्रजातन्त्रलाई संकटमा आउन नदिन पनि नेपाली कांग्रेसलाई बलियो बनाउन लाग्नुपर्ने जिकिर गरे।
सभापति देउवाले प्रजातन्त्रमाथि फेरि संकट आउन नदिने गरी कांग्रेसलाई बलियो बनाउन देशभर संगठन निर्माणको अभियान संचालन गर्न पनि सिंगो पार्टी पंक्तिलाई आह्वान गरे।
देउवाले भने, ‘अहिलेको बेला नेपाली कांग्रेस पार्टीलाई जिल्ला सम्मेलनमार्फत् हरेक जिल्लामा हामीले पार्टीको संगठनलाई गाउँगाउँमा, घरघरमा, वडावडामा पुर्याएर यो पार्टीलाई मजदुत बनाउने काममा सबैलाई सफलता मिलोस भन्ने कामना गर्दछु। यसो गरियो भने पार्टीको देशभरी नै संगठन बलियो भएर जानेछ। हाम्रो पार्टी ऐतिहासिक पार्टी छ। २००७ सालदेखि लड्दै आएको पार्टी हो। यो पार्टी ग्रासरुट, गाउँसम्म, वडासम्म, टोलसम्म पुर्याएर यो पार्टी मात्रै प्रजातन्त्रलाई अझ बलियो बनाउने, यो पार्टी जति बलियो हुन्छ, जति समक्ष हुन्छ त्यतिनै मात्रामा देशमा प्रजातन्त्र सुदृढ भएर जान्छ। त्यसपछि मात्रै नेपालमा फेरि प्रजातन्त्रमा संकट आउँदैन। प्रजातन्त्र स्थायी भएर जान्छ। त्यसका निम्ति महत्त्वपूर्ण जिल्लाबाट सुरु भएको यो आन्दोलन देशभरी नै यो संगठनलाई बलियो बनाउने, पार्टीलाई बलियो बनाउँदै प्रजातन्त्रलाई बलियो पर्छ। अहिले गठबन्धनको सरकार छ। गठबन्धनको सरकार भएको कारणले पनि हो, त्यसले गर्दाखेरी आज हाम्रो पार्टी सबैभन्दा ठूलो पार्टी बनेको छ। यहाँ केही कुराहरु उठेका छन् साथीहरु। उठाउनु पनि पर्छ। कुरा महत्त्वपूर्ण हुन्। तर, पार्टीमा समानुपातिक प्रतिनिधित्व, प्रतिनिधि सभामा हुनका लागि संविधानको संशोधन आवश्यक छ। त्यसका लागि दुई तिहाई बहुमत चाहिन्छ। त्यसका लागि सबै पार्टीहरुमा सहमति हुन जरुरी छ। यदि सहमति हुन सक्यो भने यी विचारहरु नहुने भन्ने होइन। तर, त्यसका लागि समय लाग्दछ। योग्य, जुझारु साथीहरुलाई हामीले अगाडि बढाउनु पर्छ। त्यसमा लाग्ने कुरा प्रतिबद्धता जनाउन चाहन्छु। हामी सबै एक भएर जाउँ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
