काठमाडौं– राष्ट्रिय सभाका सांसद एवं पूर्वउपप्रधानमन्त्री वामदेव गौतम नेकपा एमालेमा फर्किन तयार भएका छन्। पार्टीको कार्यकारी पदका लागि ७० वर्षे उमेर हद निलम्बन गर्ने एमालेले निर्णय गरेलगत्तै उनले आफू एमालेमा फर्किन तयार रहेको बताएका हुन्।
बुधबार अपरान्ह संघीय संसद् भवन परिसरमा सञ्चारकर्मीसँग कुरा गर्दै गौतमले आफूसँग रहेका साथीहरुसहित एमालेमै फर्कन आफू तयार रहेको प्रतिक्रिया दिए।
तर, त्यसका लागि अध्यक्ष केपी ओलीले आफूलाई प्रस्ताव गर्नुपर्ने एमालेका उपाध्यक्षसमेत रहिसकेका नेता गौतमको सर्त छ। विगतमा आफूलाई रोक्नकै लागि सो प्रस्ताव ल्याइएको गौतमको बुझाई छ।
उनले एमाले ओलीसँग भएकाले ओलीले नै आफूलाई पार्टीमा आउन भन्नुपर्ने तर्क गरे। एमाले आफूले निर्माण गरेको पार्टी हो भन्दै गौतमले त्यसलाई माया लाग्ने बताए।
उनले आफ्नो पार्टी सदस्यता पनि एमालेमै रहेको बताए। उनले केही दिनभित्र पार्टी सदस्यता नवीकरण गर्नेसमेत बताए। गौतमले आफू एमालेमा अध्यक्ष वा महासचिव बन्नका लागि जान नलागेको पनि उल्लेख गरे।
उनले भने, ‘यदि उहाँहरुले मलाई खबर गर्नुभयो। तपाईंलाई अहिले पनि निलम्बन भएको छ। आगामी महाधिवेशनसम्म निलम्बन भइरहन्छ। तपाईं आउनु पर्यो भन्नुभयो भने म र मसित रहेका जेजति साथीहरु छन्, त्यो लिएर त्यहाँ एकीकृत हुन हामी जान्छौं। यही अवस्थामा जान्छौं। अरु केही पर्दैन अब। उनहरुले मलाई नै रोक्नका निम्ति त्यो उमेर हद ल्याउनु भएको हो।’
उनले पुरानाहरुले मात्र राम्रो अनुभव साँट्न सक्ने बताएका छन्। अनुभवविहीन नेताहरुको नेतृत्वले पार्टी संस्कार र संस्कृतिविहीन हुने नेता गौतमले बताए। आफूलाई बोलाए निलम्बनकै अवस्थामा म जान सक्ने उनको भनाइ छ।
‘तर मेरो चाँही प्रस्ताव के हो भने त्यो हट्नैपर्छ भन्ने हो। किनकी त्यो मानवता विरोधी छ। नेपालको संविधानको विरुद्धमा छ। र, यो उमेर हद भनेको शारीरिक अवस्था हो। शारीरिक अवस्थाको आधारमा पार्टीमा बस्न पाउने, नपाउने भनेको विभेद हो। विभेद भनेको अपराधजन्य कानुन विरोधी गैरकानुनी काम हो। उहाँ (ओली)ले आउनुस भन्नुपर्छ। किनभने पार्टी उहाँसँग छ। म भन्थेँ। मसँग पार्टी छैन अहिले। नेकपा एमाले मसित छैन। त्यसो भएर पार्टी जोसित छ, उहाँहरुले भन्ने हो।’
यसैबीच, पार्टी अध्यक्ष ओलीले पनि गौतमको पार्टी सदस्यता एमालेमै रहेको बताएका छन् । बुधबार अपरान्ह संघीय संसद् भवन परिसरमा सञ्चारकर्मीले ७० वर्षे उम्मेर हद हटाउने हो भने वामदेव गौतमले एमाले आउने कुरा गर्नुभयो नि? भनि प्रश्न गरेका थिए।
ओलीले अब थप केही कुरा छ र? भन्ने प्रतिक्रिया दिए। उनले यसबीचमा पनि गौतमले पार्टी एकता अभियान चलाएको र नयाँ पार्टी नबनाएको बताए।
ओलीले भने, ‘उहाँले सदस्यता ती छ भन्नुभयो होइन? अनि, कुरा बाँकि छ केही छ थप कुरा? उहाँले बीचमा पार्टी होइन एउटा फोरम बनाउनुभयो। एकता अभियान चलाउनुभयो। त्यो अभियान मात्रै हो। पार्टी खोलेको होइन। एमालेमा जान्छु भन्नु भएको छ, त्यो ठीक छ। उहाँको पार्टी सदस्यता एमालेमै छ।’ ओलीले एमालेमा जान्छु भन्ने गौतमको भनाई ठीक भएको पनि बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
