धनगढी– सुदूरपश्चिम प्रदेश सरकारले आगामी आर्थिक वर्ष २०८०/०८१ का लागि नीति तथा कार्यक्रम आज (बुधबार) प्रस्तुत गर्ने भएको छ।
प्रदेश प्रमुख देवराज जोशीले बुधबार अपराह्न ४ बजे प्रदेश सभाको बैठकमा प्रदेश सरकारको नीति तथा कार्यक्रम प्रस्तुत गर्ने कार्यतालिका तय भएको छ।
सामान्यतया बजेट ल्याउनभन्दा १५ दिन अघि प्रदेश सरकारले नीति तथा कार्यक्रम ल्याउनुपर्ने हुन्छ। तर, प्रदेश सरकारले विभिन्न कारण देखाउँदै नीति तथा कार्यक्रम ल्याउनमा ढिलाइ गर्दै बुधबार पेस गर्ने तयारी गरेको जनाइएको छ।
प्रमुख प्रतिपक्षी दल नेकपा एमालेका नेता धर्मराज पाठकले सरकारको गति सुस्त रहेको बताए। उनले सरकारका मुख्यमन्त्री तथा मन्त्रीहरु समयमै गर्न सक्नु पर्ने सामान्य काममा भन्दा पनि भ्रमणमै व्यस्त देखिने गरेको बताए।
उनले भने, ‘सरकारले नीति तथा कार्यक्रम समयमै सभामा प्रस्तुत गर्नुपर्ने हुन्छ। असार १ गते बजेट सभामा पेस हुन्छ। नीति तथा कार्यक्रम जति ढिलो सभामा पेस भयो त्यतिनै सभामा हुने छलफल समय कम हुन्छ।’
उनले सरकारले पूर्णता नपाउनु, विषयगत समितिमा सभापति चयन गर्न नसक्नु लगायतले सरकार कुन गतिले अघि बढेको छ भन्ने देखाइरहेको बताए।
नेता पाठकले भने, ‘सरकारले अहिलेसम्म पूर्णता नपाएकै कारणले नीति तथा कार्यक्रम समयमै सार्वजनिक गर्न नसकेको हो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773837959.png)
