काठमाडौं- बजेट लेखनमा पूर्वनासुको संलग्नताको विषयमा विपक्षी पार्टीहरुले प्रतिनिधि सभा बैठक अवरोध गर्ने भएपछि प्रतिनिधि सभा बैठक नै सरेको छ।
मंगलबार बिहान ११ बजेका लागि बोलाइएको बैठक दिउँसो साढे १ बजेका लागि तय गरिएको छ। ११ बजेको बैठक 'विशेष कारणले' बस्न नसक्ने भएकाले समय सारिएको संसद् सचिवालयले जारी गरेको सूचनामा उल्लेख छ।
सभामुखका प्रेस सल्लाहकार शेखर अधिकारी पूर्वनासुको संलग्नताको विषयलाई विपक्षी पार्टीहरुले उठाइरहेको बताए। कार्यव्यवस्थामा सहमति जुट्न नसकेपछि बैठक सारिएको हो।
आर्थिक वर्ष २०८०/८१ को बजेट लेखनमा अनधिकृत रुपमा पूर्वनासु रामकृष्ण श्रेष्ठ संलग्न रहेको समाचार सार्वजनिक भएको थियो। तर अर्थमन्त्री प्रकाशशरण महत तथा अर्थमन्त्रालयका अधिकारीहरुले सधैं उनकै सहयोग लिने गरिएको बताएका छन्।
अवरोध गर्ने तयारी गरेका तीन वटै पार्टीले यो प्रकरणमा छानबिन समिति बनाउनुपर्ने माग गरेका छन्। ती पार्टीका कतिपय सांसदले सोमबारको प्रतिनिधि सभा बैठकमा पनि यो विषय उठाएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
