काठमाडौं– लोकतान्त्रिक समाजवादी पार्टीले राष्ट्रपतिले हालै प्रमाणीकरण गरेको नागरिकता विधेयक हाल यथास्थानमा राख्ने सर्वोच्चको निर्णयप्रति आपत्ति जनाएको छ।
विधेयक पारित प्रमाणीकरण गरेकोमा राट्रपति रामचन्द्र पौडेललाई आभार व्यक्त पनि गरेको छ।
सोमबार एक विज्ञप्ति जारी गर्दै लोसपाले भनेको छ, ‘संसद्बाट दुई-दुई पटक पारित भएको विधेयकलाई प्रमाणीकरण नगरी संसदीय सर्वोच्चता माथि प्रहार भइराखेको अवस्थामा वर्तमान राष्ट्रपति सम्माननीय रामचन्द्र पौडेलद्वारा आफ्नै देशको नागरिकमाथि भइराखेको अन्याय रोक्न ऐतिहासिक कदम चालेर सो विधेयकलाई प्रमाणीकरण गरी सार्वभौमसत्ता सम्पन्न जनताको प्रतिनिधित्व गर्ने संघीय संसदको सर्वोच्चता कायम गरेकोमा लोसपा नेपाल आभार व्यक्त गर्दछ।’
उक्त विषयमा सर्वोच्चको पटक-पटक स्थगन आदेशले नागरिकताविहीन नागरिकप्रति संवेदनशील नरहेको र अन्याय परेका लाखौं नागरिकलाई न्याय दिन नसकेकोले उक्त कदमप्रति विरोध गर्न बाध्य भएको लोसपाले जनाएको छ।
विज्ञप्तिमा भनेको छ, ‘सर्वोच्च अदालतद्वारा यस विषयमा पटक-पटक आउने स्थगन आदेश नागरिकताविहीन नागरिकहरूप्रति संवेदनशील नरहेको र अन्यायमा परेका लाखौं नागरिकलाई न्याय दिन नसकेको निर्णयप्रति असहमत रही सोको पीडा बोध भएकोले यस किसिमको अन्यायविरूद्ध विरोध प्रकट गर्न हामी बाध्य भएका छौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
