गुणस्तर कार्यालय वीरगञ्जका तत्कालीन वरिष्ठ निरीक्षक यादवले कमाए साढे ४ करोड अकुत सम्पत्ति

राजनीति

नेपाल लाइभ मंगलबार, जेठ १६, २०८० २२:०७

काठमाडौं– गुणस्तर तथा नापतौल कार्यालय, वीरगञ्जका पूर्ववरिष्ठ निरीक्षक शशी भुषण कुमार यादवविरुद्ध भ्रष्टाचार मुद्दा दायर भएको छ।

अख्तियार दुरुपयोग अनुसन्धान आयोगले यादवविरुद्ध मंगलबार विशेष अदालत काठमाडौंमा मुद्दा दायर गरेको हो। उनीविरुद्ध ४ करोठ ४७ लाख ३४ हजार १२१ रुपैँया बिगो कायम गर्दै मुद्दा दायर गरिएको अख्तियारका प्रवक्ता भोला दाहालले जानकारी दिए।

यादवले नोकरी अवधिभर विभिन्न कार्यालयमा कार्यरत रहँदा आफ्नो परिवारको नाममा जग्गा जमिन खरिद गरी गैररकानुनी रुपमा अकुत सम्पत्ति आर्जन गरेको भन्ने उजुरी परेपछि अख्तियारले अनुसन्धान गरेको थियो।

२०४६ जेठ ८ गते सार्वजनिक सेवा प्रवेश गरेका यादवको २०७९ असार मसान्तसम्मको अवधिमा निजको समग्र आयव्ययको विश्लेषण गरेपछि साढे ४ करोड रुपैयाँ भ्रष्टाचार गरेको निष्कर्ष अख्तियारले निकालेको छ।

खर्च तथा लगानीतर्फ यादव र उनको एकासंगोलका परिवारको नाममा जग्गा खरिद, घर निर्माण, सवारी साधन खरिद, बीमाको प्रिमियम भुक्तानी, शेयर खरिद, अध्ययन खर्च, विदेश भ्रमण, ऋण/सापटीको साँवाव्याज भुक्तानी, पारिवारिक घर खर्च, विभिन्न शीर्षकमा राजश्व/कर तिरेको र बैंक मौज्दातसमेत गरी जम्मा ७ करोड २४ लाख ५६ हजार २६३ रुपैयाँ खर्च तथा लगानी भएको पाइएको थियो।

सोही जाँच अवधिमा यादव र उनको एकासंगोलका परिवारको आय आर्जनतर्फ २ करोड ७७ लाख २२ हजार ५० रुपैयाँ आर्जन गरेको देखिएको थियो। कूल वैधानिक आयलाई उनले गरेको कुल व्ययसँग तुलना गर्दा यादवको आयस्रोत र आर्जन गरेको सम्पत्तिबीच तादाम्यता देखिन नआई साढे ४ करोड रुपैयाँ बरावर सम्पत्ति उनले अकुत कमाएको निष्कर्ष निकाल्दै अख्तियारले मुद्दा दायर गरेको हो।

भ्रष्टाचार निवारण ऐन, २०५९ को दफा २० को उपदफा (१) बमोजिमको कसुर गरेको पुष्टि हुन आएकोले सोही अनुसार कैद सजाय र साढे ४ करोड बिगो मागद दाबी गर्दै मुद्दा दायर गरिएको अख्तियारले जनाएको छ।

यादवले सार्वजनिक सेवाको पदमा रहँदाका बखत गैरकानुनी रूपमा सम्पत्ति आर्जन गरेको स्रोत नखुल्ने सम्पत्तिबाट श्रीमती रिता रानी, छोराद्वय विकास यादव र अविनाश यादवको नाममा खरिद गरिएका जग्गा, घर निर्माण र बैंक मौज्दातको स्रोत नखुलेको सम्पत्ति र त्यसबाट बढेबढाएको सम्पत्तिको जफत गरी बिगो असुल गर्नुपर्ने माग पनि गरिएको छ।

उनीहरुलाईसमेत प्रतिवादी बनाउँदै स्रोत नखुलेको सम्पत्तिबाट बढे बढाई हाल कायम रहेको घर, जग्गा र बैंक मौज्दात समेतबाट विगो जफत गरी पाउन मागदाबी लिई मुद्दा दायर गरिएको बताइएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

करिब ४० प्रतिशत किशोरीले ‘एचपिभी’ खोप लगाए

पूर्वमन्त्री मीन विश्वकर्माविरूद्ध हर्क साम्पाङको अख्तियारमा उजुरी

‘बैंकिङ क्षेत्र सुरक्षित छ’