काठमाडौं- प्रधानमन्त्री पुष्पकमल दाहाल प्रचण्डले अरु पनि भ्रष्टाचार काण्ड र हत्याकाण्डको खोजीनिती गरिने बताएका छन्। माओवादी केन्द्रको सल्लाहकार समिति र ज्येष्ठ कम्युनिस्ट मञ्चको संयुक्त बैठकमा सम्बोधन गर्दै उनले सुशासनको अभियान दृढ संकल्पका साथ नक्कली भुटानी शरणार्थी प्रकरणको छानबिन सुरु गरिएको बताए। तर आफूहरुको अभियान सो प्रकरणसँग मात्रै सम्बन्धित नरहेको उनको भनाइ छ।
'मैले सदनमा पनि भनेको छु। हिजोका सबै फाइलहरु अब क्रमशः खुल्छन्। खुलाइन्छन्। मैले भनेको छु, २०४६ सालको ऐतिहासिक जनआन्दोलनपछिका सबै उच्च पदस्थ अधिकारीहरुका सम्पत्ति विवरणको बारेमा खोजीनिती गरिन्छ। ठूल्ठूला भ्रष्टाचारका काण्ड भनेर जो स्थापित छन्। तिनको खोजीनिती गरिन्छन्। ठूल्ठूला भयानक हत्याकाण्डहरु छन्। ती हत्याकाण्डहरुको खोजीनिती गर्नु छ', उनले भने।
प्रधानमन्त्री प्रचण्डले गौर हत्याकाण्ड र दरबार हत्याकाण्डको नाम लिँदै त्यसको छिनोफानो नभएको बताए। 'नेपाली जनताको मनमा धेरै ठूलाठूला शंकाहरु छन्। के भएको हो भन्ने कुराको सत्यतथ्य आएको छैन। यी सबै कुराहरु पनि हामीले क्रमशः लगेर एउटा नयाँ विश्वास जनतामा जगाउनुछ। अब केही हुन्छ, हुनसक्छ भन्ने विश्वास जगाउनुछ', उनले भने।
उनले एकैचोटि, भन्नेबित्तिकै, जादूको छडी जसरी पनि काम नहुने बताए। 'वर्षौंदेखि थुप्रिएको विसंगतिहरु, रातारात भएका विसंगतिहरु होइनन्। राज्यमा जो संस्थागत वेथितिहरु देखिन्छन्। ती एक वर्ष वा दुई वर्षयता भएका होइनन्। यी पचासौं र सयौं वर्षदेखि थुप्रिँदै थुप्रिँदै गएर सम्हाली नसक्नु जस्तो स्थितिमा पुगेको हो। त्यसैले यसलाई सफा गर्ने, सफाइ गर्ने कुरा पनि क्रमशः कदम कदम गरेर अगाडि बढ्नु छ', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766039188.jpg)
-1764146706.png)
