तस्बिरहरु : (माथि दायाँबाट): लोकबहादुर घले, रिन्जिन वाङ्गदी, चन्द्रराज राई, कुमार गौतम, सानमान गुरुङ, बिर्खबहादुर छेत्री, ओमनाथ अधिकारी, चतुरमान तामाङ (फोटो साभार: ह्युमन राइट्स वाच)
काठमाडौं- हाल निर्वासनमा रहेको भुटानको एक मानव अधिकारवादी संस्थाले प्रधानमन्त्री पुष्पकमल दाहाल प्रचण्डलाई भुटानी जेलमा रहेका राजबन्दीहरुको रिहाइको विषय भारतीय प्रधानमन्त्री नरेन्द्र मोदीसँग उठाउन आग्रह गरेको छ।
राजनीतिक बन्दीको रिहाइका लागि विश्वव्यापी अभियान (जीसीआरपीपीबी) का संयोजक, राम कार्कीले एक वक्तव्य प्रकाशित गर्दै प्रधानमन्त्री प्रचण्डलाई बुधबारबाट सुरु हुने भारत भ्रमणका क्रममा भुटानी शरणार्थी समस्या समाधानको विषयलाई प्राथमिकताका साथ उठाउन आग्रह गरेका छन्।
भुटानसँग भारतको बलियो सम्बन्ध रहेकाले शरणार्थी समस्याको समाधानमा भारतको सहयोग लिन कार्कीले सुझाव दिए।
‘अहिले पनि पूर्वी नेपालमा रहेका दुई वटा शिविरमा ६ हजार ५ सयभन्दा धेरै भुटानी शरणार्थी बस्दै आएका छन्। ती मध्ये २ हजार ५ सय जना आफ्नै देश फर्किने प्रतिक्षामा छन्। त्यसैले उनीहरुलाई छिट्टै भुटान फर्किने वातावरण बनाउन भारतको सहयोग लिन हामी आग्रह गर्दछौं,’ विज्ञप्तिमा भनिएको छ।
उक्त संस्थाले हाल भुटानका विभिन्न कारागारमा ५० जना भन्दा बढी राजनीतिक बन्दीहरुलाई दशकौं देखि थुनामा राखिएको जनाएको छ।
सन् १९९० को सेप्टेम्बर–अक्टोबर र त्यसपछि पनि सांस्कृतिक अधिकारको माग गर्दै दक्षिणी भुटानमा शान्तिपूर्ण प्रदर्शन र आन्दोलन भएका थिए। ती गतिविधिमा संलग्न भएको भन्दै धेरै नेपाली भाषी भुटानीलाई पक्राउ गरी जेल हालिएको थियो।
पन्ध्र पटकसम्म नेपाल र भुटानबीचको वार्ताले शरणार्थी समस्याको समाधान निकाल्न नसकेकाले यसका लागि भारतको सहयोगको आवश्यकता भएको जीसीआरपीपीबीले जनाएको छ।
यसअघि अमेरिकामा कार्यालय रहेको मानव अधिकारवादी संस्था, ह्युमन राइट्स वाचले पनि एक वक्तव्य निकाली भुटानी राजबन्दीहरुलाई रिहा गर्न भुटानका राजालाई अपिल गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
