ओली सरकारको पालामा भएको भ्रष्टाचारको फेहरिस्त बताउने क्रममा ‘जलहरी प्रकरण’ पनि उल्लेख गरेको हुँ: लेखनाथ दाहाल

राजनीति

नेपाल लाइभ शुक्रबार, जेठ १२, २०८० १४:३१

काठमाडौं– नेकपा माओवादी केन्द्रका सांसद लेखनाथ दाहालले केपी ओली सरकारको पालामा भएको भ्रष्टाचारको फेहरिस्त बताउने क्रममा 'जलहरी प्रकरण' पनि उल्लेख गरेको बताएका छन्।

उनले जेठ १० गते संसद्‌मा सम्बोधन गर्ने क्रममा ओली सरकारको पालामा पशुपतिमा सुनको जलहरीमा भ्रष्टाचार भएको भन्ने अभिव्यक्ति राखेका थिए। त्यसप्रति आपत्ति जनाउँदै एमालेले शुक्रबारको प्रतिनिधि सभा अवरोध गरेको छ।

‘केपी ओलीले यो सरकारले भ्रष्टाचार नियन्त्रण गर्दैन, भ्रष्टाचारीहरुको गठबन्धन हो भनेको सन्दर्भमा मैले तपाईंले विगततिर फर्केर हेर्नुस्, तीन वर्ष शासन सत्ता चलाउँदा सयौं काण्डहरु छन्। तीमध्ये यती, ओम्नी, वाइडबडी, बालुवाटार जग्गा प्रकरण, गोकर्ण रिसोर्ट प्रकरणसँगसँगै स्वास्थ्य सामग्री खरिदमा दुई अर्बको भ्रष्टाचार काण्ड र त्यो सँगसँगै पशुपतिनाथमा जलहरी लगाउँदा सुन भनेर पित्तल लगाएको काण्ड, जो ११ किलो सुन कम भएको प्रतिवेदनमा पनि आएको छ,’ उनले भने।

उनले जलहरीको विषय महालेखाको प्रतिवेदनमा पनि रहेको बताए। ‘हिसाब प्रष्ट नभएको, सुन कम भएको, ज्यालादारीको पनि लेखांकन भएको भनेर प्रतिवेदन दिएको छ। बुँदा नम्बर ४२ र ४३ मा छ। त्यो तथ्यको आधारमा उहाँको सरकारको पालामा भएको भ्रष्टाचारको काण्डहरुचाहिँ किन नियन्त्रण गर्न सक्नुभएन? त्यसको नैतिक जिम्मेवारी प्रधानमन्त्रीको हैसियतमा तपाईंले लिनुपर्छ कि पर्दैन भन्ने सन्दर्भमा बोलेको कुरालाई उहाँहरुले अहिले अनावश्यक इश्यु उठाइराख्नुभएको छ,’ उनले भने।

दाहालले संसदीय छानबिन समिति गठन गरेर यो विषयमा छानबिन गर्नुपर्ने बताए। ‘त्यो सुन कसले खायो? तत्कालीन प्रधानमन्त्री केपी ओलीले जिम्मेवारी लिनै पर्छ। तर व्यक्तिको हिसाबले किटान गरिएको होइन। उहाँको सरकारको पालामा भएको भ्रष्टाचारको फेहरिस्त बताउने क्रममा त्यो भनेको हो,’ उनले भने।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

सभामुख घिमिरे र कम्बोडियाका प्रधानमन्त्रीबीच भेट, लुम्बिनी–अंगकोर सिधा हवाई उडान सुरु गर्न पहल

एनपीएल ट्रफीमा कालापत्थरको ढुंगा!

एनपिएलले नेपालको पर्यटन प्रवर्द्धन र युवा प्रतिभालाई उजागर गर्नेछ: प्रधानमन्त्री ओली