पशुपतिनाथ मन्दिर (फाइल तस्बिर)
काठमाडौं– पशुपतिनाथको मन्दिरमा सुनको जलहरी लगाउँदा ‘पित्तल’ लगाएर भ्रष्टाचार भएको भन्ने माओवादी केन्द्रका सांसद लेखनाथ दाहालको आरोपछि प्रमुख प्रतिपक्षी दल नेकपा एमालेले शुक्रबार संसद् (प्रतिनिधि सभा) बैठक अवरुद्ध गरेको छ। सत्ता पक्षका सांसदले जलहरीमा राख्दा भ्रष्टाचार भएको भनेर आफ्ना पार्टीका अध्यक्ष केपी शर्मा ओलीविरुद्ध निराधार आरोप लगाएको भन्दै एमालेले प्रतिनिधि सभा बैठक अवरुद्ध पारेको हो।
सरकारको नीति तथा कार्यक्रमाथिको छलफलका क्रममा जेठ १० गते (मंगलबार)को प्रतिनिधि सभा बैठकमा सांसद दाहालले भनेका थिए, ‘उहाँ (केपी ओली) सरकारमा बस्दाखेरी कति भ्रष्टचारका काण्डहरु आए। यति, ओम्नी, स्वास्थ सामग्रीका २ अर्ब भ्रष्टचार। त्यति मात्र होइन पशुपतिको जल्लाहरी लगाउँदा पनि सुनको लगाउने भनेर पित्तल लाएर गरेका सयौँ भ्रष्टचारहरु छन्।’
यही विषयलाई लिएर नेकपा एमालेका प्रमुख सचेतक पदम गिरीले सरकारको धारणाका साथै आधार माग गरेका हुन्। उनले भने, ‘लेखनाथ दाहालले एमालेको नेतृत्वको सरकार हुँदा पशुपतिमा जलहरीका निम्ति पित्तल लगाउने काम भएको छ। भ्रष्टाचार भएको छ। कुन तथ्यमा उभिएर आएको छ? कसरी आएको छ? निन्दा गर्न चाहन्छौं। पशुपति जलहरी पित्तल हो भने सरकारले जवाफ दिनुपर्छ। जवाफ नआउँदासम्म एक इन्च पनि संसद् अघि बढ्न दिइन्न।’
जलहरी विवाद के हो?
तत्कालीन प्रधानमन्त्री केपी शर्मा ओलीले २०७७ सालमा पशुपतिनाथ मन्दिर पुगेर दर्शन गरेपछि मन्दिरमा सुनको जलहरी राख्न ३० करोड रुपैयाँ दिने घोषणा गरेका थिए। त्यसपछि जलहरी निर्माण प्रक्रिया अघि बढेको थियो। २०७७ साल फागुन १२ गते राष्ट्रपति विद्यादेवि भण्डारीले जलहरीको साइत गरेकी थिइन्।
महालेखा परीक्षकको कार्यालयले आफ्नो ५९औं प्रतिवेदनमा जलहरी बनाउने क्रममा केही सुन हिनामिना भएको विषय उठाएको छ। महालेखाको प्रतिवेदनमा भनिएको छ, ‘रिङ बनाउन प्रयोग भएको सुनको मूल्य रू.७ करोड ८६ लाख ४६ हजार रहेको छ। जलहरी बनाएर बाँकी रहेको सो सुनको सम्पूर्ण परिमाण (१० किलो ९७६ ग्राम) रिङ बनाउने कार्यमा प्रयोग भएको पुष्टि हुने विवरण पेस गरेको छैन।’
पुशपति क्षेत्र विकास कोषले पशुपति शिवलिङ्गको गर्भगृहलाई पूर्ण रूपमा ढाक्ने गरी राखिने सुनको जलहरी निर्माण कार्यको लागि उक्त वर्ष नेपाल राष्ट्र बैंकबाट १०३ किलो ७७३ ग्राम सुन रू.८० करोड ११ हजारमा खरिद गरेको थियो। विभिन्न शुद्धताको प्रतिशत रहेको सुनमा अन्य धातु र रसायनको मिश्रण तामा २ किलो ८९० ग्राम, चाँदी १ किलो २४९ ग्राम, जिंक १२ किलो ७५० ग्रामसमेत प्रयोग गरी १०७ किलो ४९० ग्राम सुन कायम भएको भनिएको थियो। यो सुनमध्ये ९६ किलो ८२२ ग्राम जलहरी लगाउन खर्च गरिएको थियो भने बाँकी १० किलो ९७६ ग्राम रिङ बनाउन खर्च गरिएको बताइएको थियो।
महालेखाले बाँकी रहेको सबै १० किलो ९७६ ग्राम नै रिङ बनाउनमा खर्च भएको पुष्टि हुने विवरण पेस नभएको बताएको थियो। रिङ बनाउन खर्च भएको सुनमध्ये केही अपचलन भएको हुनसक्न आशंका महालेखाले गरेको हो।
सत्ता पक्षका सांसद दाहालले सुनको भनेर पित्तलको राखिएको उल्लेख गरेपछि एमाले आक्रोशित बनेको हो। सोही विषयले गर्दा शुक्रबार ढिलोगरी सुरु भएको प्रतिनिधि सभा बैठक अवरुद्ध हुन पुग्यो।
नेकपा एमाले संसदीय दलका उपनेता सुवास नेम्वाङले सरकार पक्षले नै आरोप लगाएकाले आमजनले त्यही रुपमा बुझ्ने बताए। त्यसैले सुन वा पित्तल भनेर प्रमाणित नभएसम्म संसद् अघि बढाउन नसकिने उनको भनाइ थियो। 'सुनको जलहरी होइन भने कारबाही गरियोस्। सुनको नै हो भने यस्तो गलत भन्न पाइन्छ कि पाइँदैन? राफसाफ गरियोस्। टुंगोमा नपुगी उठियो भने हामीमाथि गम्भीर आरोप लाग्छ,' उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821303.jpg)
-1786602170.png)
