काठमाडौं– नक्कली भुटानी शरणार्थी बनाएर अमेरिका लैजाने भन्दै नेपाली नागरिकबाट पैसा असुली गरेर भएको ठगी प्रकरणमा प्रहरीले आज (आइतबार) जिल्ला सरकारी वकिल कार्यालयमा अनुसन्धान प्रतिवेदन बुझाउँदै छ।
२ महिना लामो अनुसन्धानको समयमा टुंगिन लागेका कारण प्रहरीले आइतबार प्रतिवेदन बुझाउन लागेको हो। जिल्ला प्रहरी परिसर काठमाडौंका प्रमुख तथा एसएसपी दानबहादुर कार्कीले आइतबार फाइल बुझाउने गरी तयारी भइरहेको बताए। यो प्रकरणमा प्रहरीले अहिलेसम्म १६ जनालाई पक्राउ गरेर अनुसन्धान गरेको छ। केही भने अझै फरार छन्।
अहिले अनुसन्धान फाइलको डकुमेन्टेशनको काम र अनुसन्धानको थप काम समेत भइरहेकाले कति जना फरार प्रतिवादी बन्छन् भन्ने टुंगो लागिनसकेको एसएसपी कार्कीले बताए। ‘१६ जना पक्राउ परेकै प्रतिवादी भइहाले। केही पक्राउ पूर्जी जारी भएका र बाँकीको क–कसको संलग्नता देखिन्छ, उनीहरु प्रतिवादी बन्छन्। तर अझै पनि अनुसन्धानको काम पनि सँगै भइरहेकाले प्रतिवादीको संख्या टुंगो लागिसकेको छैन,’ एसएसपी कार्कीले नेपाल लाइभसँग भने।
भुटानी शरणार्थी प्रकरणमा प्रहरीले ठगीसँगै संगठित अपराधको कसुरमा पनि अनुसन्धान अगाडि बढाएको थियो। प्रहरीलाई संगठित अपराधको कसुरमा अनुसन्धान गर्ने म्याद २ महिनाको हुन्छ। दुई महिनात्रि अदालतमा मुद्दा दर्ता भइसक्नुपर्ने भएकाले प्रहरीले आइतबार अनुसन्धान प्रतिवेदन सरकारी वकिल कार्यालयमा बुझाउन लागेको हो। तर अझै यो घटनाको अनुसन्धान भने सकिनसकेको एसएसपी कार्कीले बताए। बाँकीको हकमा भने अनुसन्धान जारी राखेर प्रमाण तथा जुटाएर पुरक निवेदनअनुसार पनि मद्दा चल्ने बताइएको छ।
यता सरकारी वकिल कार्यालयले पनि प्रहरीलाई जतिसक्दो चाँडो फाइल पठाउन ताकेता गरिरहेको छ। प्रहरीले पठाएको फाइल अध्ययन गरेर अभियोग पत्र तयार गर्न समय लाग्ने भएकाले फाइल जतिसक्दो चाँडो फाइल पठाउन भनिएको जिल्ला सरकारी वकिल कार्यालयका प्रमुख अच्यूतमणि नेउपानेले बताए।
‘अब हामीसँग फाइल अध्ययन गर्ने समय एकदम कम छ। ठूलो र धेरै प्रतिवादी जोडिएको र धरै वटा कसुरमा प्रतिवादी बनाउनुपर्ने भएकाले अध्ययनको समय कम हुने भएकाले चाँडै फाइल पठाउन प्रहरीलाई भनेका छौं,’ नेउपानेले भने।
भुटानी शरणार्थी समस्या समाधानका लागि भन्दै गृहमन्त्री रामबहादुर थापाको पालामा २०७६ जेठ ३० मा एउटा कार्यदल गठन गरिएको थियो। गृह मन्त्रालयका पूर्वसहसचिव बालकृष्ण पन्थीको संयोजकत्वको कार्यदलमा विज्ञको रुपमा गणेशबहादुर केसी र सदस्य सचिवको रुपमा गृहका तत्कालीन शाखा अधिकृत दीपकप्रसाद न्यौपाने थिए।
छुटपुट भन्दै उक्त कार्यदलले भुटानी शरणार्थीको रुपमा ४२९ जनाको नाम समेट्दै प्रतिवेदन बुझाएको थियो। उक्त प्रतिवेदन बादलकै पालामा गृहबाट मन्त्रिपरिषद्मा पेस गरिएको थियो। तर एमाले अध्यक्ष केपी शर्मा ओली नेतृत्वको तत्कालीन सरकार परिवर्तन भएपछि मन्त्रिपरिषद्ले पास गर्न सकेन। पछि उक्त प्रतिवेदन मन्त्रालयमै फिर्ता पठाइएको थियो। त्यही प्रतिवेदन गुपचुप राखिएको थियो।
तर अनुसन्धानका क्रममा वास्तविकता भने अर्कै रहेको खुल्यो। नक्कली भुटानी शरणार्थी प्रकरण बाहिरिएपछि प्रहरीले पन्थीको कार्यदलसँग पनि बयान लियो। उनीहरुले आफूले तयार पारेको प्रतिवेदन प्रहरीकहाँ पेस गरे। उनीहरुले पेस गरेको प्रतिवेदन र पछि गृहमन्त्री बनेका बालकुष्ण खाणले गुपचुप राखेको प्रतिवेदनमा मेल खाएन।
पन्थी कार्यदलले पेस गरेको प्रतिवेदन कीर्ते गरी अनसूची थपेर खाणको पालामा नक्कली नामहरु राख्दै रकम उठाएर ठगी भएको अनुसन्धानबाट खुलेको हो। यही नक्कली प्रतिवेदन मन्त्रिपरिषद्मा पेस गरेर पास गराउने र त्यसपछि रकम लिएकाहरुलाई अमेरिका पठाउने तयारी थियो। यसका लागि उनीहरुले झापा तथा मोरङका सहायक प्रमुख जिल्ला अधिकारीको नेतृत्वमा अर्को उपसमिति गठन गरेर नक्कली प्रतिवेदन मन्त्रिपरिषद्मा पेस गर्ने तयारी गरेका थिए। उपसमिति गठन समेत भइसकेको थियो।
तर तत्कालीन अवस्थामा उक्त विषय विवादमा आएपछि झापा र मोरङका सहायक प्रमुख जिल्ला अधिकारी नेतृत्वको उपसमितिले काम गर्न मानेन। यहीबीच नयाँ सरकार गठन भएपछि यो प्रकरणमा छानबिन सुरु भएको हो।
यता पन्थी नेतृत्वको कार्यदलले नै तयार पारेको प्रतिवेदनमा समेत नक्कली नामहरु राखिएको हुनसक्ने आकलन गरिएको छ। सोहीअनुसार अनुसन्धान पनि भइरहेको प्रहरीले जनाएको छ। यो प्रकरणमा १ अर्ब रुपैयाँभन्दा बढी ठगी भएको दाबी गरिएको छ।
यो ठगी प्रकरणमा अहिलेसम्म १६ जना पक्राउ परेका छन्। यो प्रकरणमा कांग्रेसका नेता तथा पूर्वगृहमन्त्री बालकृष्ण खाण, एमालेका सचिव तथा पूर्वउपप्रधानमन्त्री समेत रहेका सांसद टोपबहादुर रायमाझी, नेपाल सरकारका सचिव टेकनारायण पाण्डे, तत्कालीन गृहमन्त्री तथा एमाले उपाध्यक्ष रामबहादुर थापा बादलका सुरक्षा सल्लाहाकार इन्द्रजित राई, भुटानी शरणार्थीका नेता टेकनाथ रिजाल, कांग्रेसका पूर्वसांसद आङटावा शेर्पा, खाणका सहयोगी नरेन्द्र केसी पक्राउ परेका छन्।
त्यस्तै, गृह मन्त्रालय मातहतको हज समितिका अध्यक्ष शमशेर मिया, टोपबहादुर रायमाझीका छोरा सन्दीप रायमाझी, केशव दुलाल, सानु भण्डारी, सन्देश शर्मा, पूर्ववडाध्यक्ष सागर राई, टेक गुरुङ, गोविन्द चौधरी र रामशरण केसी गरी १६ जना पक्राउ परेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
