काठमाडौं– सांसदहरुले परम्परागत बजेट ल्याएर वर्तमान अर्थतन्त्रका चुनौतीको समाधान गर्न नसकिने बताएका छन्।
शनिबार सिंहदरबारमा बसेको अर्थ समितिको बैठकमा सांसदहरुले परम्परागत बजेट नभइ कार्यान्वयनमा आउनसक्ने बजेट ल्याउन अर्थमन्त्री डा प्रकाशशरण महतसँग माग गरेका हुन्।
उनीहरुले देशमा विचौलिया संस्थागत भएको र यसलाई रोक्न सरकारको योजना के छ भन्दै प्रश्न गरे। समितिको बैठकमा बोल्दै नेकपा एमालेका प्रमुख सचेतक पदम गिरीले विभिन्न क्षेत्रका लाइसेन्स वितरणका लागि अपारदर्शी रुपमा काम हुन लागेको भन्दै आपत्ति जनाए।
उनले न्यूनतम मापदण्ड पनि नपुगेकाहरुलाई ल्याएर केही मानिसहरु बसेर लाइसेन्स वितरण गर्ने तयारी भइरहेकोबारे अर्थमन्त्री महतसँग जवाफ माग गरे।
उनले स्थानीय तहलाई सम्मानीकरण कटौती गरिएकोमा अहिले स्थानीय तहहरु विचल्ली भएको भन्दै त्यसको बारेमा सरकारले के सोच बनाएको छ? भन्दै प्रश्न गरे।
उनले भने, ‘विद्यार्थीहरु विदेश पठाएर उनीहरुले पठाएको रेमिट्यान्सबाट गर्व गर्ने ठाउँमा हामी छौं की छैनौं, हामीले देशलाई कहाँ पुर्याउँदैछौं? राजश्व परिचालन ५० वर्ष, ५२ वर्षको इतिहासकै नराम्रो छ। यसलाई सुधार्न कसरी जाने भन्ने आधार सरकारले दिन सकेको छैन।’
समितिको बैठकमा बोल्दै राष्ट्रिय स्वतन्त्र पार्टीका सांसद विराजभक्त श्रेष्ठले देशमा विचौलिया संस्थागत भएको बताए। अहिले आएर पनि बाटो र पानीको लोभ मात्रै देखाउने गरिएको बताए।
उनलै हाइवेको भौतिक पूवार्धाधर झनै नराम्रो बनिरहेको र यस बारेमा सरकारले कस्तो योजना बनाइरहेको छ भन्दै प्रश्न गरे। उनले सरकारले अल्पकालीन, मध्यकालीन र दीर्घकालीन इन्जिनियरिङ सुरु गर्नुपर्नेमा जोड दिए।
यस्तै नेकपा एमालेकी सांसद जुलीकुमारी महतोले राजश्व चुहावट भएको ठाउँमा गम्भीर बन्नुपर्ने बताइन्। उनले राजश्वमा विचौलियाको खेल रोक्न डिजिटल प्रणालीमा जानुपर्ने बताइन्। परम्परागत बजेट ल्याएर वर्तमान अर्थतन्त्रको समस्या समाधान नहुने उनको भनाइ थियो।
बैठकमा नेकपा एमालेकै सांसद सूर्यबहादुर थापाले उत्पादनमा वृद्धि गरी स्वदेशमै आत्मनिर्भर हुनुपर्ने नीति ल्याउनुपर्ने बताए। उनले उत्पादन बढाउन सक्ने उपायको बारेमा सोच्न जरुरी रहेको उल्लेख गरे।
सांसद थापाले आवश्यक नीति निर्माण गरी उत्पादनमुखी अर्थतन्त्र निर्माण गर्नुपर्नेमा जोड दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
