काठमाडौं– शीर्ष नेताहरुबीच पछिल्लो समय भइरहेको छलफलका विषयमा प्रश्न उठ्न थालेका बेला प्रधानमन्त्री पुष्पकमल दाहाल प्रचण्डले ‘स्पष्टीकरण’ दिएका छन्। पछिल्लो समय प्रधानमन्त्री प्रचण्ड, नेपाली कांग्रेसका सभापति शेरबहादुर देउवा र नेकपा एमालेका अध्यक्ष केपी शर्मा ओलीबीच भेटवार्ता बाक्लिँदै गएको छ।
नक्कली भुटानी शरणार्थी बनाएर अमेरिका पठाइदिने भन्दै नेपाली नागरिकबाट पैसा उठाएर भएको ठगी प्रकणमा प्रहरीले अनुसन्धान अगाडि बढाउँदा दलका नेताहरु समेत त्यसमा मुछिएपछि शीर्ष नेताहरुबीच भेटवार्ता बाक्लिँदै गएको थियो। दलका नेताहरु मुछिन थालेपछि भुटानी शरणार्थी प्रकरणको अनुसन्धानलाई प्रभावित पार्न शीर्ष नेताहरुबीच भेटवार्ता बाक्लिएको भन्दै सार्वजनिक रुपमा प्रश्न समेत उठ्दै आएको छ।
प्रधानमन्त्री प्रचण्डले भने शीर्ष नेताहरुको भेटवार्तामा गणतन्त्र विरोधी प्रवृत्तिलाई निरुत्साहित गर्ने विषयमा छलफल केन्द्रित हुने गरेको बताएका छन्। कान्तिपुर मिडियाद्वारा शनिबार काठमाडौंमा आयोजित हाफ म्याराथनको आरम्भ गर्दै प्रधानमन्त्री प्रचण्डले शीर्ष नेताहरुबीचको भेटवार्तामा हुने छलफलबारे स्पष्ट पारेका हुन्।
‘हिजोका दिनमा भएका राष्ट्रिय एकता, सहमति र सहकार्यलाई जीवन्त तुल्याउन सकिन्छ भन्ने उद्देश्यले नै हामी दलहरु बीच छलफलमा छौं,’ प्रधानमन्त्रीले भने। संसदका विभिन्न समितिहरु, संक्रमणकालीन न्याय र गणतन्त्र विरोधी प्रवृत्तिलाई निरुत्साहित गर्न मै केन्द्रित हुने गरेको प्रधानमन्त्रीले दाबी गरे।
प्रचण्डले देशको एकता र परिवर्तनको रक्षाको संकल्पसहित आफू प्रधानमन्त्रीको जिम्मेवारीमा रहेको दाबी समेत गरे। ‘प्रधानमन्त्री प्रचण्डले भने, ‘यो परिवर्तनमार्फत् नै जनतालाई सेवा दिन सकिन्छ, सुशासन दिन सकिन्छ र विकास दिन सकिन्छ भन्ने संकल्पसहित योपटक म प्रधानमन्त्रीको जिम्मेवारीमा छु,’ प्रधानमन्त्रीले भने।
प्रधानमन्त्रीले भारतसँग खुला सीमा, आर्थिक, राजनीतिक, सामाजिक, जनता-जनताबीचको सम्बन्धको दृष्टिकोणले सम्बन्ध विशिष्ट रहेको उल्लेख गर्दै आफ्नो आगामी भारत भ्रमण दुवै देशका लागि ऐतिहासिक बन्ने दाबी समेत गरे।
प्रधानमन्त्रीले सरकार खेलकुदको विकासलाई उच्च प्राथमिकतामा राखेर देशको प्रतिष्ठा र समाजमा अनुशासन कायम गर्न लागेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
