काठमाडौं– बर्दिया–१ का संघीय सांसद एवं पूर्वमन्त्री सञ्जयकुमार गौतम अनसन बसेको पाँचौ दिन भएको छ। सत्तापक्षकै सांसद गौतमले विभिन्न १५ बुँदे माग राख्दै अनसन बसेका हुन्।
बर्दिया जिल्लाको सदरमुकाम गुलरियानजिकै बबई नदीमा बन्दाबन्दै भत्किएको जब्दीघाटस्थित पुलमुनि वैशाख ३० गतेदेखि सांसद गौतमले आमरण अनसन थालेका हुन्। अनसनरत सांसद गौतमले जब्दीघाटको पुल तत्काल निर्माण गरिनुपर्ने माग राखेका छन्।
वैशाख ३० गते जिल्ला प्रशासन कार्यालय बर्दियामार्फत् प्रधानमन्त्री पुष्पकमल दाहाल प्रचण्डसमक्ष बर्दियाको विकास र यहाँका जनताका जनजीविकासँग सम्बन्धित विभिन्न १५ बुँदे माग राख्दै अनसन सुरु गरेका थिए। तराईको चर्को गर्मी, बालुवासहितको तातो हावाको प्रवाह नगरी बगरमा बसिरहेका सांसद गौतमको स्वास्थ्य अवस्था दिन–प्रतिदिन कमजोर हुँदै गएको छ। वरिपरि सर्वसाधारण दैनिक रूपमा रिले अनसनमा बसेर उनलाई सघाइरहेका छन्।
‘हाम्रो बर्दिया बचाऔं, समुन्नत बर्दिया बनाऔं’ भन्ने मूल नारासहित नदीकिनारमा उनी आमरण अनसन बसेका हुन्। उनी उक्त क्षेत्रबाट तेस्रो पटक निर्वाचित भएका हुन्। पछिल्लो आमनिर्वाचनमा उम्मेदवार हुँदा पनि गौतमले बर्दियाका नागरिकसमक्ष समृद्ध बर्दियाको नारा दिएको तर सरकारका कारण काम गर्न नसकेको भन्दै अनसन बसेका हुन्।
२०७४ सालमा बर्दियामा आएको भीषण बाढीका कारण बबई नदीमा निर्मित पुल भासिएपछि निर्माण भएको छैन। तत्कालीन समयमा यो पुल पप्पु कन्सट्रक्शनले बनाएको थियो। पुल भासिँदा बारबर्दिया नगरपालिका र पूर्व–पश्चिम राजमार्गसँग सदरमुकाम गुलरियाको आवागमन सम्पर्क अवरुद्ध भएको छ।
सो पुलले बाँधको काम गर्ने भएकाले वर्षात्मा नदीको प्रवाह बस्तीतिर सोझिने हुँदा नदी तटीय क्षेत्रका बासिन्दा असुरक्षित छन्। त्यसको तत्काल व्यवस्थापन गर्नुपर्ने र पुलको निर्माण अविलम्ब सुरु गर्नुपर्ने सांसद गौतमको माग छ।
त्यसैगरी बर्दियामा रहेका कर्णाली, ओराही, आम्वासा, मानखोलालगायतका नदीको कटान नियन्त्रणका लागि तटबन्धनको व्यवस्था गर्नुपर्ने, बाढी पीडितलाई भूकम्प पीडितसरह राहत र अनुदान दिनुपर्ने, पूववर्ती सुशील कोइरालाको नेतृत्वको सरकारले गरेको निर्णयको कार्यान्वयन गरिनुपर्ने, निकुञ्ज क्षेत्र, मध्यवर्ती क्षेत्र तथा खाता जैविक मार्गलगायतका क्षेत्रमा जंगली जनावरबाट आम जनता असुरक्षित रहेकोले जनताको जिउधनको सुरक्षाको प्रबन्ध गरिनुपर्नेलगायतका माग छन्।
राजापुर सिँचाइ परियोजनाको दोस्रो चरणको कार्यको थालनी गरिनुपर्ने, भूमिहीन सुकुम्वासीको समस्या हल गरिनुपर्ने, किसानरुलाई समयमै मल तथा बीउबिजन उपलब्ध गराई कृषि उपज बजारीकरणको व्यवस्था गरिनुपर्ने, बर्दियामा एक कृषि पोलिटेक्निक स्थापना गरिनुपर्ने, राष्ट्रिय गौरवको बबई सिँचाइ आयोजना तीन वर्षमा पूरा हुने गरी बजेटको सुनिश्चितता गरिनुपर्नेजस्ता माग पनि सांसद गौतमले राखेका छन्।
नागरिकका समस्या संसद्बाट सम्बोधन हुन नसकेपछि सांसद नै सडकमा आएको घटना आफैंमा नौलो र रोचक मानिएको छ। सम्भवतः आफ्ना नागरिकका सामु आफूले गरेको वाचा पूरा गराउन जनप्रतिनिधि आमरण अनसनमा बसेको यो पहिलो घटना हो। अनसनरत सांसद गौतम हालसम्म अनसनमै रहेको बर्दियाका प्रमुख जिल्ला अधिकारी नारायाणप्रसाद रिसालले बताए।
उनको माग अनुसार अनसन सुरु भएपछि सडक विभागले स्थलगत अध्ययन गरेर पुल निर्माण अघि बढाउने प्रतिबद्धता गरेर नयाँ क्षेत्रमा पुल निर्माणको कार्य सुरु भएको पनि रिसालले बताए। त्यस्तै उनका अन्य माग पनि भएकाले त्यसलाई पूरा गर्नका लागि आफूहरुले केन्द्रमा लेखेर पठाएको र हालसम्म कुनै जवाफ नआएको प्रजिअ रिसालको भनाइ छ।
केन्द्रबाट मागको सम्बोधनमा निर्देशन आएपछि आफूहरुले अनसन अन्त्य गराउनेदेखि अन्य कार्य गर्ने उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779634726.png)
-1764146706.png)
-1779545841.jpg)
