काठमाडौं– नक्कली भुटानी शरणार्थी प्रकरणबारे प्रतिनिधि सभाको सोमबारको बैठकमा सांसदहरुले छानबिन प्रक्रियाको स्थितिबारे सरकारसँग जवाफ मागेका छन्। साथै सांसदहरुले उक्त विषयलाई लिएर सदनलाई जानकारी गराउन माग गरेका छन्।
आकस्मिक समय लिएर बोल्दै एमाले सांसद ठाकुर गैरेले सभामुखलाई रुलिङ गर्न माग गरे। संसद्को पछिल्लो बैठकमा सभामुखले उक्त विषयलाई लिएर सदनमा जानकारी गराउन रुलिङ गरेकै अवस्थामा पनि संसद्लाई सोमबारको बैठकमा पनि जानकारी नगराइएकोमा आपत्ति जनाए।
‘यस्तो जघन्य विषयमा, अपराधजन्य विषयमा आजसम्म सरकारले यो सार्वभौम सदनलई आएर यस्तो भएको छ भनेर भन्नलाई के कारणले समस्या भएको छ। सरकारले यो विषयमा जानकारी दिनुपर्छ अनि मात्रै सदनको काम बढ्नुपर्छ भन्ने कुराको माग गर्न चाहान्छु,’ सांसद गैरेले भने, ‘म सभामुखलाई त्यसअनुसारको रुलिङ गर्न माग गर्न चाहान्छु।’
पछिल्लो संसद् बैठकमा सभामुखले गरेको रुलिङलाई स्मरण गर्दै सांसद गैरेले भने,‘वैशाख २६ र २७ गतेको बैठकमा नक्कली शरणर्थी बनाई बिक्री गर्ने नक्कली मानव तस्करीको विषयमा सदनमा बुलन्द आवाज उठेको थियो। २७ गतेको बैठकमा सभामुखले सदनलाई जानकारी गराउन रुलिङ पनि भएको थियो। तर आज पनि कार्यसूचीमा छैन।’
यस्तै, रास्वपाका प्रमुख सचेतक सन्तोष परियारले पनि छानबिनको अवस्था कहाँसम्म पुग्यो भनेर सदनलाई जानकारी गराउन माग गरेका छन्। ‘अहिले जसरी नक्कली शरणार्थी प्रकरण आयो, यसले नेपाली राजनीतिलाई अत्ति लज्जित बनाएको छ। म सम्माननीय सभामुखमार्फत् घटनाको छानबिन कहाँ पुगेको छ? सदनलाई जानकारी दिन अनुरोध गर्न चाहान्छु,’ शून्य समयमा बोल्दै सांसद परियारले भने।
सांसद परियारले यो घटनाको सन्दर्भमा नेपाल सरकारले लज्जाबोध गर्दै खेद प्रस्ताव पारित गर्न पनि आग्रह गरेका छन्। ‘यो प्रकरणलाई लिएर लज्जाबोध गरेर खेद प्रस्ताव पारित गर्न सरकारसँग अनुरोध गर्छु,’ सांसद परियारले भने।
यस्तै, लोसपा सांसद रामप्रकाश चौधरीले पनि कसैको दबाबमा नपरी छानबिन गर्न माग गरेका छन्। र स्थितिबारे सदनलाई जानकारी गराउन माग गरेका छन्। ‘यो अक्षम्य अपराध हो। त्यसको छानबिन कुनै पनि बाह्य दबाब नपरी अनुसन्धान होस् र यो सम्बन्धी प्रकरणमा अहिलेसम्मको प्रगतिबारे गृहमन्त्रीद्वारा सदनमा तुरुन्त जानकारी गराउन सभामुखमार्फत् आग्रह गर्छु,’ संसद्को विशेष समयमा बोल्दै सांसद चौधरीले भने।
यस्तै, स्वतन्त्र सांसद अमरेशकुमार सिंहले अनुसन्धान प्रक्रियालाई कमजोर बनाउने काम हुने शंका व्यक्त गरेका छन्। सांसद सिंहले यस विषयमा प्रधानमन्त्रीबाटै जवाफ आउनुपर्ने माग गरेका छन्। ‘नक्कली शरणार्थी प्रकरणमा समितिएकाहरुको कमजोर अनुसन्धान नहोस्। समय सिमामा बाँधेर प्रमाणरहित कमजोर अनुसन्धानका साथ अदालतमा बुझाउनु हुँदैन,’ विशेष समयमा बोल्दै सांसद सिंहले भने,‘त्यसकारण सभामुख समक्ष मेरो अनुरोध छ रुलिङ होस् कि प्रधानमन्त्री आएर संसद्मा जावफ दिउन्।’
यता, जसपा सांसद राजकिशोर यादवले प्रमुख तीन दलका शीर्ष नेताको भेटघाटले अनुसन्धान प्रभावित हुन सक्ने शंका व्यक्त गरेका छन्। ‘यो सामान्य भ्रष्टचार हैन। यो देश द्रोह हो। तर, अहिले जसरी ठूला दलका नेताहरुको दिनऔँको भेटघाटले आम मानिसहरुमा शंका पैदा भएको छ,’ विशेष समयमा बोल्दै सांसद यादवले भने।
यो प्रकरण सार्वजनिक भएएपछि प्रमुख दलका नेताहरुको भेटघाट बाक्लिएको छ। त्यस्तै, रास्वपा सांसद डा स्वर्णिम वाग्लेले नक्कली शरणार्थी प्रकरणमा नाम जोडिएका सबै संदिग्धहरुलाई छानबिनको दायरामा ल्याउन खबरदारी गरेका छन्। ‘शरणार्थी प्रकरणमा संदिग्ध सबै छानबिनको दायरामा ल्याइनुपर्दछ,’ शून्य समयमा बोल्दै सांसद वाग्लेले भने, ‘यस प्रकरणको विश्वसनीय टुंगो लागोस् भन्ने खबरदारी गर्न चाहान्छु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
