काठमाडौं- नेपाली कांग्रेसको युवा पुस्ताका नेताहरुले सोमबारदेखि कांग्रेस रुपान्तरण अभियान थालेका छन्। मुख्य नेतृत्व सत्ता प्राप्तिको तिकडमबाट बाहिर निस्किन नसकेको भन्दै कांग्रेसलाई आमजनसँग जोड्न उक्त अभियान थालिएको नेताहरुले बताएका छन्।
अभियानको लुम्बिनी प्रदेश संयोजक समेत रहेका कांग्रेस केन्द्रीय सदस्य डा गोविन्द पोखरेलले केन्द्रबाटै केही कार्यक्रम गरिने नदेखिएपछि अभियान थालिएको बताए। सोमबार रुपन्देहीमा एक कार्यक्रम गरेर औपचारिक सुरुवात गरिने उनले जानकारी दिए। अवधारणापत्र भने मंगलबार काठमाडौंमा सार्वजनिक हुँदैछ।
कांग्रेसमा अहिले भइरहेको गतिविधिले उसको लोकतान्त्रिक चरित्रमै प्रश्न उठिरहेको महसुस आफूहरुले गरेको अभियानका कोशी प्रदेश संयोजक गुरुराज घिमिरेले बताएका छन्। उनले भने, 'कांग्रेस आफ्नो पूर्व लोकतान्त्रिक मान्यता अनुरुप चलेन। २००७ सालको क्रान्तिअघि जन्मिएको पार्टीको 'स्पेस' भए पनि समय सापेक्ष माग पूरा गर्न नसक्ने अवस्था देखिन थाल्यो। त्यसैले हामी जुर्मुराउनु परेको हो।'
अभियानले सातै प्रदेशमा संयोजक तोक्ने क्रममा मधेसमा रञ्जित कर्ण, बागमतीमा कांग्रेस केन्द्रीय सदस्य मधु आचार्य, गण्डकीमा देवराज चालिसे, कर्णालीमा भुपेन्द्रजंग शाही, सुदूरपश्चिममा भरतबहादुर खड्का संयोजक छन्।
गएको आम निर्वाचन र त्यसपछि सम्पन्न उपनिर्वाचनको परिणामले कांग्रेस कार्यकर्ताहरुमा निराशा बढेको छ। कांग्रेसको जनमत घट्दो रहेको देखिएको छ। यस्तो अवस्थामा पनि सभापति शेरबहादुर देउवा सरकारमा सहभागी मन्त्रीको नाम एकलौटी पठाइरहेका छन्। सभापति देउवानिकट रहेका पूर्वगृहमन्त्री बालकृष्ण खाँण नक्कली भुटानी शरणार्थी प्रकरणमा पक्राउ परेका छन्। तर, उनलाई निलम्बन गरेर छानविनमा सघाउन कांग्रेसको संस्थापन पक्ष तयार देखिँदैन।
यसले कांग्रेसलाई समय सापेक्षित पार्टी बनाउनमा अवरोध सिर्जना गरिरहेको तेस्रो पुस्ताका नेताहरुलाई लागेको छ। आफ्नै नेता खाण पक्राउ परेपछि गृहमन्त्री नारायणकाजी श्रेष्ठलाई स्वतन्त्र छानबिनका लागि समर्थन गर्न कांग्रेसका यी नेताहरु पुगेका थिए। त्यसलगत्तै रुपान्तरण अभियान घोषणा गरेका हुन्। 'राजनीतिक भारी बोकेको कांग्रेसले अब आर्थिक सामाजिक भारी बोक्न जरुरी छ तर त्यसका लागि केन्द्रीय नेतृत्व तयार देखिएन,' घिमिरेले भने, 'किसान, मजदुर, युवा, विद्यार्थी र व्यवसायीका आवाज सुन्न हामीले उनीहरुसँग संवाद गर्ने प्रयास गर्दैछौं।'
अभियानका क्रममा कांग्रेसलाई आगामी दिनमा कसरी लैजाने भन्ने विषयमा सुझाव संकलन गरिने पोखरेलले बताए। 'भुइँमान्छेका अजेन्डा के छन्? जनता के चाहन्छन्? हामी ती विषयलाई लिएर आउनेछौं,' उनले भने।
अभियान सातै प्रदेशका विभिन्न जिल्लामा सञ्चालन हुनेछ। प्रतिनिधिमूलक रुपमा प्रदेशमा विशेष कार्यक्रम गर्ने तयारी गरिएको छ। अभियानका क्रममा स्थानीय सरकारमा कांग्रेसका प्रतिनिधिले गरिरहेका कामका विषयमा पनि सुझाव संकलन गरिनेछ। आमजनको अपेक्षा अनुसार उनीहरुले काम गरे/नगरेको विषयमा सुझाव लिइने बताइएको छ।
अभियानको नेतृत्वकर्ता संस्थापन इतरसँग निकटस्थहरु देखिन्छन्, जसले गर्दा कांग्रेसको संस्थापन पक्ष झस्केको छ। यसलाई गुटगत अभियान भनेर केहीले टिप्पणी समेत गरेका छन्। नेता घिमिरे उक्त आरोपलाई खारेज गर्छन्। संयोग त्यस्तो परे पनि कांग्रेसमा रुपान्तरण चाहने सबैको साझा कार्यक्रम भएको उनले बताए। उनले थपे, 'यो कसैलाई देवता र कसैलाई असुर बनाउन गरिएको कार्यक्रम होइन। कांग्रेसलाई चलायमान बनाउने चाहनेहरुको साझा कार्यक्रम हो। त्यही भावना अनुसार हामी प्रस्तुत हुनेछौं। अभियानका क्रममा कहीँ पनि त्यस्तो महसुस हुन दिनेछैनौं।'
पार्टी केन्द्रबाटै निर्णय गरेर चलाउनुपर्ने अभियान रहेको डा पोखरेलले बताए। उनले भने, 'हामीले त्यसका लागि ९ महिना कुर्यौं। अभियान त परको कुरा केन्द्रीय समिति बैठक समेत बोलाइएको छैन। पार्टीले नगरेपछि पार्टी केन्द्रीय सदस्य रहेका हामी जोडिएर सुधारका लागि अघि बढेका हौं।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
