काठमाडौं– आइतबार बबरमहलको जिल्ला सरकारी वकिलको कार्यालयमा कार्यलय प्रमुख अच्युत न्यौपानेको कक्षमा सञ्चारकर्मीहरुको बाक्लो उपस्थिति थियो।
कार्यालयमा नक्कली शरणार्थी प्रकरणमा पूर्व गृहमन्त्री बालकृष्ण खाणको बयान गराउने भन्दै सञ्चारकर्मी त्यहाँ उपस्थित भएका थिए।
प्रहरीले ४ बजेको समय पारेर पूर्व गृहमन्त्री खाणलाई म्याद थपका लागि जिल्ला सरकारी वकिलको कार्यालय पुर्यायो। नक्कली शरणार्थी प्रकरणमा खाणलाई दोस्रो पटक म्याद थपको लागि जिल्ला सरकारी वकिलको कार्यालय लगिएको थियो।
वैशाख २७ गते पक्राउ परेका खाणलाई यसअघि ३ दिन म्याद थप गरिएको थियो। दोस्रो पटक म्याद थप गर्न सरकारी वकिलको कार्यालय पुर्याइएका खाणको भेट उनलाई उक्त प्रकरणमा तान्ने सचिव टेकनारायाण पाण्डेसँग भएको थियो। पाण्डे खाणभन्दा एक साताअघि वैशाख २० गते पक्राउ परेका थिए।
खाणलाई जिल्ला सरकारी वकिलको कार्यालय प्रमुख न्यौपानेको कार्यकक्षमा राखिएकै समयमा सचिव पाण्डेलाई पनि म्याद थपका लागि लगियो। प्रत्यक्षदर्शी एक सरकारी वकिलका अनुसार उनीहरुको पक्राउ परेपछि पहिलो भेट भएको थियो।
खाण टेकुमा रहेका थिए भने सचिव पाण्डे सिंहदबारमा अनुसन्धानका लागि थिए। खाणलाई यसअघि एक्लै म्याद थप गरिएको थियो। यसपटक दुवै जनालाई सँगै म्याद थपका लागि लगिएको थियो।
पूर्वमन्त्री खाणलाई पहिल्यै प्रहरीले प्रमुखको कार्यकक्षमा राखेको थियो। सचिव पाण्डेलाई पछि लगियो। सुरुमै आफूअघि नै पूर्वमन्त्री कक्षमा रहेको देखेपछि सचिव पाण्डेले हेरेर हांसे। खाणले पनि हांसे झै गरे। उक्त कार्यकक्षमा रहेका ती सरकारी वकिलले भने, ‘दुवैले एक अर्कालाई देख्नुभयो अनि हेरेर हांस्नुभयो। अभिवादन आदान–प्रदान भएन। आमुन्ने सामुन्ने हुने गरि बस्नुभयो।’
केही समय कक्ष नै शान्त भयो। मौनतालाई चिर्दै पूर्वगृहमन्त्री खाणले पानी खान पाइन्छ भनि सोधे। उनलाई गिलासमा पानी आयो। सचिव पाण्डेले पनि पानी मगाए।
‘दुवैले पानी मगाएर खानुभयो। एकछिनपछि मन्त्रीज्यूले नै कुराकानी सुरु गर्नु भयो,’ ती सरकारी वकिलले भने, ‘दुवैको अनुहार निरास झै देखिन्थ्यो। तर पनि उहाँहरु सहज हुन खोजे झै लाग्यो।’
मन्त्री खाणले सचिव पाण्डेलाई हेर्दै सोधे, ‘सचिवज्यूको बयान भयो’
सचिव पाण्डेले जवाफ दिए, ‘दुई पटक दिइसकें, हजुर। अझै कति पटक दिनुपर्ने हो’
खाणले भने, ‘मेरो त सुरु भएकै छैन’
जिल्ला सरकारी वकिल कार्यालयका प्रमुख न्यौपानेले साेमबार मन्त्रीको बयान गर्न निर्देशन दिए। उनले चार दिनभित्र अनुसन्धान सकेर प्रतिवेदन बुझाउन र सरकारी वकिलले अध्ययनपछि मुद्दा दायर गर्ने पनि जानकारी गराए। लगत्तै सबै प्रक्रिया पूरा गरेर उनीहरुलाई जिल्ला अदालत पेस गरियो। अदालतले उनीहरुले माग गरेर अनुसार ४ दिनको समय दिएको छ।
अब उक्त प्रकरणमा प्रहरीले अनुसन्धान प्रतिवेदन पेस गर्ने छ। उक्त प्रतिवेदन अध्ययन गर्दै जिल्ला अदालतमा मुद्दा दायर गर्ने छ। आइतबार राति प्रहरीले फरार रहेका एमाले सचिव टोपबहादुर रायमाझीलाई पनि पक्राउ गरेको छ। उनलाई साेमबार अदालत म्याद लिन पेस गर्ने छ भने बयानका लागि जिल्ला सरकारी वकिलको कार्यालय पेस गर्ने छ।
उनीहरुको बयान पछि थप व्यक्तिहरु अनुसन्धानको दायरामा आउने वा नआउने निष्कर्ष अनुसन्धान टोलीले निकाल्ने छ। बयानमा नयाँ तथ्य र व्यक्तिहरु देखिएमा उनीहरुलाई पक्राउ गर्ने छ भने नदेखिएमा उनीहरुको बयानपछिको प्रमाण खोजेर अभियोगपत्र लेखन अघि बढाउने अनुसन्धान टोलीको तयारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779634726.png)
-1764146706.png)
-1779545841.jpg)
