काठमाडौं- सरकारले नयाँ आर्थिक वर्षको बजेट बनाउने अन्तिम तयारी गरिरहेको छ। सरकारले बजेटकै लागि प्रतिनिधि सभा र राष्ट्रिय सभामा प्रि बजेट छलफल पनि चलायो। उक्त छलफलपछि आएका सुझावहरुलाई केही मात्रमा समावेश गर्ने तयारी अर्थमन्त्री प्रकाशशरण महतले गरेका छन्।
जेठ १५ गते संसदमा बजेट पेस गर्नुपर्नेछ। अब करिब दुई साता मात्र बाँकी छ। यो अवधिमा बजेटको सिद्धान्त र प्राथमिकतालाई ध्यानमा राखेर सरकारले काम गरिरहेको छ। अर्थ मन्त्रालयले बजेटका लागि टिम नै बनाएर केही महिनादेखि काम गरिरहेको छ।
राष्ट्रिय योजना आयोग, मन्त्रालय र सरोकारवालाहरुसँग पनि अर्थ मन्त्रालयले बजेटको प्रारुप निर्माण गर्नुअघि छलफल गरेको थियो। उक्त छलफलमा व्यवसायीहरुलाई पनि सरकारले बोलाएको थियो। बजेटको अन्तिम लेखनको क्रममा व्यवसायीहरु फेरि बजेटमा आफ्ना कुरा समेट्न दौडधुपमा लागेका छन्।
यसै क्रममा नेपाल चेम्बर अफ कमर्सले शुक्रबार अर्थमन्त्री महतलाई भेटेर आफ्नो सुझाव दिएको छ। कमर्सका अध्यक्ष राजेन्द्र मल्लले आगामी बजेट वितरणमुखी नभई उत्पादनमुखी बनाउन अर्थमन्त्री महतसँग आग्रह गरेको छ। केही दिनमा उद्योग वाणिज्य महासंघले पनि मन्त्रालयसँग बजेटका विषयमा व्यवसायीहरुका कुरा समेट्ने अर्थमन्त्री भेट्ने तयारी गरेको छ।
अध्यक्ष मल्ल्लले आगामी वर्षको बजेट यथार्थपरक र कार्यान्वयनयोग्य तथा चुस्त दुरुस्त हुनपर्नेमा जोड दिए। उनले अर्थतन्त्रलाई चलायमान बनाउन एवं वर्तमान शिथिल अर्थतन्त्रलाई उकास्नका लागि बजेट उत्पादनमुखी हुनुपर्ने चेम्बरको माग रहेको बताए। उनले विनियोजित विकास बजेटलाई समयवद्ध तालिका अनुसार कार्ययोजना बनाएर खर्च गर्न माग गरे।
मल्लले विद्यमान अर्थ व्यवस्थामा संकुचित मौद्रिक नीतिले व्यापारको असहजीकरण र नियन्त्रणमुखी आर्थिक नीतिहरुको नकारात्मक प्रभावले गम्भीर आर्थिक शिथिलता उत्पन्न भएको बताए।
उनले लक्ष्य अनुसारको राजश्व संकलन हुन नसकेको भन्दै करको दायरा वृद्धि गर्नुपर्नेमा जोड दिन आग्रह गरे। भन्सार प्रशासनलाई चुस्त बनाउनुपर्ने भन्दै भन्सार प्रयोजनका लागि सन्दर्भ मूल्यलाई खारेज गरी कारोबार मूल्यलाई मान्यता दिनुपर्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
