काठमाडौं- नेपाली नागरिकलाई भुटानी शरणार्थी बनाएर ठगी गरेको अनुसन्धान कार्यदलतर्फ मोडिएको छ। एमाले अध्यक्ष केपी शर्मा ओलीको पालामा गठन भएको पूर्वसहसचिव बालकृष्ण पन्थी नेतृत्वको कार्यदलका सदस्यहरुसँग प्रहरीले बयान लिन सुरु गरेको छ।
कार्यदलका सदस्यको भूमिका बिना नक्कली भुटानी शरणार्थीको नाम समेट्नसमेत असम्भव रहेको निष्कर्ष निकाल्दै प्रहरीले कार्यदलमाथि नै अनुसन्धान अघि बढाएको हो।
पन्थी नेतृत्वकै कार्यदलले नक्कली भुटानी शरणार्थीको नाम राखेको पछि अनसूची थपेर थप नक्कली भुटानी शरणार्थीको नाम समेट्ने क्रममा समेत उनीहरुको संलग्नता हुनसक्ने भन्दै प्रहरीले अनुसन्धान अघि बढाएको छ।
आइतबार मात्रै जिल्ला प्रहरी परिसर काठमाडौंको टोलीले कार्यदलका संयोजक पन्थीको बयान लिएको छ। कसरी कार्यदल गठन भयो, कसरी काम भयो, नक्कली भुटानी शरणार्थीको नामहरु क-कसको मिलेमतोमा राखियोजस्ता प्रश्नको प्रहरीले पन्थीसँग माग गरेको थियो।
सोमबार मात्रै प्रहरीले यही कार्यदलका अर्का सदस्य तथा हाल ललितपुरको महांकाल गाउँपालिकाका अध्यक्षसमेत रहेका गणेशबहादुर केसीसँग पनि बयान लिने तयारी गरेको छ।
प्रहरीले केसीलाई सोमबार फोन गरेर बयानका लागि उपस्थित हुन भनेको छ। केसीले पनि आफू उपस्थित भएर बयान दिने बताएका छन्। आजै साँझसम्म केसीको बयान लिने तयारी परिसरले गरेको छ। केसीलाई हाल पक्राउ परेका तथा तत्कालीन गृहमन्त्री रामबहादुर थापा बादलका सुरक्षा सल्लाहाकार इन्द्रजित राईले विज्ञ भन्दै कार्यदलमा राखेका थिए। उनै राई यो प्रकरणमा पक्राउ परेर अहिले हिरासतमा छन्।
त्यसैगरी यही कार्यदलका सदस्यसचिव तथा तत्कालीन शाखा अधिकृत दीपकप्रसाद न्यौपानेसँग पनि प्रहरीले बयान लिने तयारी गरेको छ। उनीहरुको बयानपछि फेला परेका सबुद प्रमाणका आधारमा अघि बढिने प्रहरीले जनाएको छ।
भुटानी शरणार्थी समस्या समाधानका लागि भन्दै गृहमन्त्री रामबहादुर थापाको पालामा २०७६ जेठमा एउटा कार्यदल गठन गरिएको थियो। गृह मन्त्रालयका पूर्वसहसचिव पन्थीको संयोजकत्वमा विज्ञको रुपमा र केसी र सदस्य सचिवको रुपमा गृहका तत्कालीन शाखा अधिकृत न्यौपाने थिए।
तर, पन्थी नेतृत्वको कार्यदलले भने मिलेमतोमा नेपाली नागरिकलाई भुटानी शरणार्थीको सूचीमा राखेको खुलेको थियो। अमेरिका लैजाने र त्यसबापत मोटो रकम असुल्ने उद्देश्यसहित ४२९ जनालाई भुटानी शरणार्थीको सूचीमा समेटिएको पाइएपछि उनीहरु अनुस्न्धानको दायरामा तानिएका हुन्।
तीमध्ये अधिकांश वास्तविक भुटानी शरणार्थी नभई नेपाली नागरिक रहेको खुलेको थियो। नेपाली नागरिकलाई नै भुटानी शरणार्थीको सूचीमा राखिएको विषय सार्वजनिक भएपछि उक्त प्रतिवेदन नै गुपचुप पारिएको थियो। गुपचुप पारिएको उक्त प्रतिवेदन भने अहिले पक्राउ परेको गिरोहको हातमा पुगेको थियो। उनीहरुले त्यही प्रतिवेदनमा ४४६ जना नेपाली नागरिकको नाम समेट्दै उनीहरुलाई अमेरिका लैजाने भनेर रकम उठाउने गरेको पाइएको छ। यो गिरोहले करिब १ अर्ब रुपैयाँ ठगी गरेको पाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772261485.png)
-1764146706.png)
