काठमाडौं– १० वैशाखमा हुने प्रतिनिधि सभाको उप–निर्वाचनका लागि नेपाली कांग्रेसले तनहुँ १ र चितवन २ मा उम्मेदवारी दिएको छ। तीनवटा निर्वाचन क्षेत्रमा हुन गइरहेको उप–निर्वाचनमध्ये कांग्रेसले दुई ठाउँमा उम्मेदवारी दिएको छ भने बारा २ मा जसपालाई समर्थन गरेको छ।
संघीय सरकारका लागि बनेको ११ दलीय गठबन्धनमा नेपाली कांग्रेसले प्रमुख घटकहरू माओवादी र एकीकृत समाजवादीलाई मिलाएर तनहुँ र चितवनमा आफ्नो पार्टीको उम्मेदवारी दिएको छ।
गएको ४ मंसिरको निर्वचनमा तनहुँ १ बाट राष्टपति रामचन्द्र पौडेल निर्वाचित भएका थिए। भने चितवन २ बाट रास्वपा अध्यक्ष रवि लामिछाने निर्वाचित भएका थिए।
त्यसैतै गरी बारा २ बाट उपराष्ट्रपति रामसहाय यादव निर्वाचित भएका थिए। पौडेल र यादव राष्ट्रपति र उपराष्ट्रपतिमा निर्वाचित भएपछि र लामिछानेलाई सर्वोच्च अदालतले नागरिकता प्रकरणमा दोषी ठहर गर्दै सांसद पद नै खारेज गरेपछि १० बैशाखमा तीनवटा निर्वाचन क्षेत्रमा उपनिर्वाचन हुने भएको हो।
उप–निर्वाचनका लागि सत्तारुढ दलहरूमध्ये प्रमुख चार दलहरू मिलेर एक ठाउँमा देखिएका छन् भने अन्य साना दलहरूले आ–आफ्नो ढंगले उम्मेदवारी दिएका छन्। नेपाली कांग्रेस, माओवादी, एकीकृत समाजवादी र लोसपाका नेताहरूले अघिल्लो हप्ता विज्ञप्ति नै जारी गरेर तनहुँ १ र चितवन २ मा कांग्रेसका उम्मेदवार र बारा २ मा जसपाका उम्मेदवारलाई सघाउन पार्टी पंक्तिलाई निर्देशन दिएका थिए।
तनहुँ र चितवन दुवै ठाउँमा रास्वबाट कडा प्रतिस्पर्धा खेपिरहेको कांग्रेसले गठबन्धनका प्रमुख दलहरूको सक्दो बढी मत तानेर जित्न सकिन्छ कि भन्ने ध्याउन्नमा देखिन्छ। जसका लागि कांग्रेसले उम्मेदवार छनोट गर्नेबेलादेखि नै सचेतना अपनाएको छ।
तनहुँ र चितवनका लागि कांग्रेसले केन्द्रबाट महामन्त्रीद्वय गगन थापा र विश्वप्रकाश शर्मालाईसमेत परिचालन गरेको छ। दुवै ठाउँमा उम्मेदवारी दर्ता गराएपछि महामन्त्रीद्वष थापा र शर्माले काठमाडौं आएर सभापति शेरबहादुर देउवासँग स्थानीय अवस्थाबारे छलफल गरेका छन्। त्यसपछि दुवै जना फेरि निर्वाचन स्थलतर्फ केन्द्रित भएका छन्।
महामन्त्री शर्माले उम्मेदवारी दर्तापछि चितवन र तनहुँमा अहिले प्रचार–प्रसारदेखि स्थानीय स्तरमै बसेर आफूहरू छलफल गरिरहेको र त्यही हिसाबले जित्नेगरी रणनीति बनाइरहेको बताए।
पार्टीका र गठबन्धनका शीर्ष नेताहरूलाईसमेत कांग्रेसले चितवन र तनहुँमा लगेर चुनावी सभाहरू गर्नेगरी गृहकार्य गरेका थिए। त्यसका साथै चितवन–२ मा कांग्रेसबाट उम्मेदवार बनेका जितनारायण श्रेष्ठ र तनहुँ १ बाट उम्मेदवार बनेका गोविन्द भटराई दुवैले आ–आफनो स्थानीय प्रतिबद्धताहरू सार्वजनिक गरेका छन्।
महामन्त्री शर्माले नेपाल लाईभसँग कुरा गर्दै चितवन र तनहुँमा कांग्रेसको आफ्नै अवस्था राम्रो रहेको र त्यसमा प्रमुख सत्तारुढ दलहरूको साथ भएकाले आफूहरू उत्साहित भएको बताए।
बारा क्षेत्र नम्बर २, तनहुँ क्षेत्र नम्बर १ र चितवन क्षेत्र नम्बर २ मा हुने उपनिर्वाचनका लागि कूल ६९ जनाको उम्मेदवारी दर्ता भएको छ। जसमध्ये बारा क्षेत्र नम्बर २ मा सबैभन्दा धेरै ३६ जनाको उम्मेदवारी परेको छ। साथै तनहुँ–१ ९ जना र चितवन–२ मा २४ जनाको उम्मेदवारी परेको छ।
गत मंसिर ४ गतेको निर्वाचनमा चितवन–२ मा ८० हजार सात सय ५३ मत सदर भएको थियो। जसमा रास्वपा सभापति लामिछानेले ४९ हजार तीन सय मत प्राप्त गरी विजयी भएका थिए। उनका प्रतिस्पर्धी नेपाली कांग्रेसका उमेश श्रेष्ठले १४ हजार नौ सय ८८ र नेकपा (एमाले) का कृष्णभक्त श्रेष्ठले १४ हजार छ सय ५२ मत प्राप्त गरेका थिए।
तनहुँ क्षेत्र नं १ मा मंसिरको निर्वाचनमा ६२ हजार छ सय ९५ सदर मत खसेको थियो। जसमा राष्टपति पौडेलले २५ हजार तीन सय ६१ मत प्राप्त गरेका थिए। उनका प्रतिस्पर्धी नेकपा (एमाले)का एकबहादुर राना मगरले १९ हजार नौ सय ८१ र स्वतन्त्र उम्मेदवार गोविन्दराज जोशीले छ हजार आठ सय ८६ मत प्राप्त गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
