काठमाडौं- प्रधानमन्त्री पुष्पकमल दाहाल प्रचण्डको मन्त्रिपरिषद्मा जनता समाजवादी पार्टी (जसपा)बाट सांसद अशोक राई मन्त्री बनेका छन्। उनलाई शिक्षा, विज्ञान तथा प्रविधिमन्त्रीको जिम्मेवारी दिइएको छ।
गत मंसिर ४ गते भएको प्रतिनिधि सभा निर्वाचनमा राई जनता समाजवादी पार्टीका तर्फबाट सुनसरी-१ बाट निर्वाचित भएका थिए।
एमालेको उपाध्यक्षसम्म बनेर पार्टी त्यागेका राई सोही पार्टीको सहयोगमा सांसद् निर्वाचित भएका हुन्। सुनसरी-१ मा एमालेले उनलाई सघाएको थियो। राईले १७ हजार ५९ मत प्राप्त गरेर विजेता बन्दा उनका निकटतम प्रतिद्वन्द्वी राष्ट्रिय स्वतन्त्र पार्टीकी गोमा तामाङले १६ हजार ६०६ मत प्राप्त गरेकी थिइन्। त्यसैगरी नेकपा माओवादी केन्द्रको एकल चुनाव चिह्न लिएर उम्मेदवार बनेका मुक्सामहाङ सुब्बाले १३ हजार ८७ मत प्राप्त गरेका थिए।
यसअघि २०४८ र २०५१ मा खोटाङबाट प्रतिनिधिसभामा एमालेबाट निर्वाचित उनी २०७० को दोस्रो संविधानसभा चुनावमा संघीय समाजवादी पार्टीबाट समानुपातिक सदस्य चुनिएका थिए।
२०७४ सालमा आफ्नै चेला नेकपा एमालेका उम्मेद्वार जयकुमारसँग पराजित भएका थिए। राईले एमालेबाट विद्रोह गरी संघीय समाजवादी पार्टी खोलेका राई उपेन्द्र यादवको फोरम नेपालसँग एकता गरेका थिए।
मदन भण्डारी सगरमाथा कोशी क्षेत्रीय समितिको सचिव हुँदा राई उपसचिव भएर भूमिगत राजनीतिमा होमिएका थिए। उनी २०३३ सालमा अखिल नेपाल कम्युनिस्ट क्रान्तिकारी को–अर्डिनेसन केन्द्र (मार्क्सवादी लेनिनवादी)का सदस्य भए। २०३६ सालमा पूर्णकालीन भएर भोजपुर, खोटाङ, ओखलढुंगा र सोलुखुम्बुमा पार्टीको संगठन विस्तार गरेका थिए।
उनले २०३७ मा नेकपा (माले)को सदस्य भएका राई २०४६ सालमा केन्द्रीय सदस्य भए। २०४७ सालमा नेकपा (एमाले) बनेपछि केन्द्रीय सदस्य र २०५९ मा स्थायी कमिटी सदस्य भए। २०६५ मा भएको आठौं महाधिवेशनबाट सर्वाधिक मतसहित एमालेको उपाध्यक्षमा निर्वाचित भएका थिए। उनले २०६९ सालमा पहिचानको मुद्दामा फरक मत सहित एमाले परित्याग गरेका थिए।
अशोक राई चौथोपटक मन्त्री बनेका हुन्। उनी २०५१ मा निर्माण तथा यातायात राज्यमन्त्री, २०५३ मा संसदीय व्यवस्था मन्त्री र २०६१ मा स्वास्थ्य मन्त्री बनेका थिए। त्यसपछि १८ वर्षपछि शुक्रबार शिक्षा, विज्ञान तथा प्रविधि मन्त्री बनेका हुन्। अघिल्लो तीन पटक एमालेबाट मन्त्री भएका उनी चौथोपटक जसपाबाट मन्त्री बनेका हुन्।
जसपाको नेतृत्व गरेर मन्त्रीमण्डलमा गएका उनी मन्त्रालय नसम्हाल्दै विवादित बनेका छन्। निजी स्कुलका सञ्चालक समेत रहेका उनलाई शिक्षा मन्त्रालय जिम्मेवारी दिइएकाले 'स्वार्थ बाझिएको' भन्दै टिप्पणी भइरहेको छ।
काठमाडौँको बुद्ध नगरमा रहेको स्वप्न बाटिका स्कुल (एसडी)का उनी सञ्चालक हुन्। २५ वर्ष अगाडि स्थापना भएको उक्त स्कुलको विद्यालय व्यवस्थापन समितिको अध्यक्ष उनी नै रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768563465.png)
-1768562733.png)
-1764146706.png)
-1768395492.png)
