काठमाडौं- शुक्रबार साँझ प्रधानमन्त्री निवास बालुवाटारमा बसेको बैठकले राष्ट्रपतिमा कांग्रेस उम्मेदवारलाई समर्थन गर्ने निर्णय गरेको छ। प्रधानमन्त्रीको आह्वानमा बसेको आठ दलको बैठकमा उनैले कांग्रेसलाई समर्थन गर्न प्रस्ताव राखेका थिए।
‘प्रधानमन्त्रीज्यूले एउटा प्रस्ताव ल्याउनुभयो- संसद्को सबैभन्दा ठूलो दल नेपाली कांग्रेसलाई राष्ट्रपतिको चुनावमा हामी सबैले समर्थन गरौँ’, बैठकमा सहभागी एकीकृत समाजवादीका सांसद प्रकाश ज्वालाले भने, ‘त्यो प्रस्तावमा आठवटै दलले यसपटकको राष्ट्रपतिको निर्वाचनमा नेपाली कांग्रेसलाई समर्थन गर्ने, सहयोग गर्ने टुंगो लागेको छ।’
बैठकमा कांग्रेस, माओवादी केन्द्र, एकीकृत समाजवादी, जसपा, जनमत पार्टी, लोसपा, नागरिक उन्मुक्ति पार्टी र राष्ट्रिय जनमोर्चा सहभागी थिए।
ज्वालाका अनुसार, उम्मेदवार बनाइने व्यक्तिको सन्दर्भमा कांग्रेसले निर्णय गर्नेछ। आफूहरुले पार्टीगत रुपमा नेपाली कांग्रेसलाई राष्ट्रपतिको निर्वाचनमा सहयोग गर्ने निष्कर्ष निकालेको उनको भनाइ छ।
‘आजको बैठक गठबन्धनको हिसाबले, राजनीतिक समीकरणको हिसाबले टर्निङ प्वाइन्ट जस्तो साबित भएको छ’, ज्वालाले भने, ‘प्रधानमन्त्रीज्यूले पनि भन्नुभएको छ- आजदेखि हाम्रो नयाँ राजनीतिक यात्रा सुरु भएको छ। यसलाई अगाडि बढाऔँ। सबै दलहरु मिलेर जाऔँ। र, राष्ट्रको समृद्धि, राजनीतिक स्थिरता, राष्ट्रिय स्वाधिनता र जनतालाई सेवा सुविधा दिने क्रममा हामी सबै मिलेर एकताबद्ध भएर जाने हो। र, हामी सत्ता समीकरणका सन्दर्भमा पनि एकताबद्ध भएर जाऔँ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
