प्रधानमन्त्रीको सरकारी निवास बालुवाटारमा नेताहरुको छलफल चलिरहँदा पार्किङमा रहेका गाडीहरु।
काठमाडौं– राष्ट्रपति निर्वाचनको विषयमा निर्णय लिन पुरानो गठबन्धनका ४ दलका नेताहरु छलफलमा जुटेका छन्। प्रधानमन्त्रीको सरकारी निवास बालुवाटारमा सरकारको नेतृत्व गरिरहेको माओवादी केन्द्रसहित नेपाली कांग्रेस, जनता समाजवादी पार्टी र नेकपा एकीकृत समाजवादीका नेताहरुबीच छलफल जारी रहेको छ।
नेताहरु ३ घण्टादेखि छलफलमा छन्। बैठकमा प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवा, नेकपा एकीकृत समाजवादीका अध्यक्ष तथा पूर्वप्रधानमन्त्री माधव कुमार नेपाल, जनता समाजवादी पार्टीका अध्यक्ष उपेन्द्र यादव, नेकपा माओवादी केन्द्रका उपाध्यक्ष एवम् उपप्रधानमन्त्री नारायणकाजी श्रेष्ठ, नेपाली कांग्रेसका महामन्त्री गगन थापा लगायत नेताहरु सहभागी छन्।
वैठकमा आगामी राष्ट्रपतिको उम्मेदबारबारे छलफल भइरहेको छ। फागुन १३ गते नयाँ राष्ट्रपतिको उम्मेदबारी दर्ता गर्नुपर्ने भएकाले दलहरु सघन छलफलमा जुटेका छन्।
सत्ता गठबन्धनभित्र रहेको नेकपा एमालेले पनि राष्ट्रपतिमा दाबी गरिरहेको छ। त्यस्तै पुरानो गठबन्धनभित्र पनि एमाले बाहेकको राष्ट्रपति बनाउनुपर्ने छलफल केही दिनदेखि जारी रहेको छ।
पुरानो गठबन्धनका दलहरु नेपाली कांग्रेस र एकीकृत समाजवादीले राष्ट्रपतिका लागि दाबी गरेका छन्। शनिबार नै राष्ट्रपतिको उम्मेदवारी दर्ता गर्नुपर्ने भएकाले आजै राष्ट्रपतिको उम्मेदबार टुंग्याउने तयारी भइरहेकाले बैठक अझै केही समय चल्ने नेताहरुको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
