काठमाडौं– राष्ट्रपति निर्वाचनको विषयमा निर्णय लिन पुरानो गठबन्धनका ४ दलका नेताहरु छलफलमा जुटेका छन्। प्रधानमन्त्रीको सरकारी निवास बालुवाटारमा सरकारको नेतृत्व गरिरहेको माओवादी केन्द्रसहित नेपाली कांग्रेस, जनता समाजवादी पार्टी र नेकपा एकीकृत समाजवादीका नेताहरुबीच छलफल जारी रहेको छ।
बैठकमा प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवा, नेकपा एकीकृत समाजवादीका अध्यक्ष तथा पूर्वप्रधानमन्त्री माधव कुमार नेपाल, जनता समाजवादी पार्टीका अध्यक्ष उपेन्द्र यादव, नेकपा माओवादी केन्द्रका उपाध्यक्ष एवम् उपप्रधानमन्त्री नारायणकाजी श्रेष्ठ, नेपाली कांग्रेसका महामन्त्री गगन थापा लगायत नेताहरु सहभागी छन्।
फागुन २५ गते हुने राष्ट्रपति निर्वाचनअन्तर्गत फागुन १३ गते (शनिबार) उम्मेदवारहरुको मनोनयन हुने कार्यक्रम छ। मनोनयन अगाडि नै राष्ट्रपतिको उम्मेदवारका विषयमा सहमति जुटाउन दलहरु छलफलमा व्यस्त छन्।
राष्ट्रपति चयनको विषयलाई लिएर सत्ता साझेदार दलहरुको गठबन्धनमा खटपट बढेको छ। उता विपक्षी दल नेपाली कांग्रेसका नेताहरु भने पुस १० गते अगाडिको तत्कालीन ५ दलीय गठबन्धन ब्यूँतिने सम्भावना रहेको बताउँदै आएका छन्।
प्रतिनिधि सभामा विश्वासको मत लिँदा कांग्रेसले पनि पक्षमा मतदान गरेपछि प्रधानमन्त्री प्रचण्ड राष्ट्रपति चयनमा राष्ट्रिय सहमति खोजिनुपर्ने पक्षमा छन्। जबकि सत्ता साझेदार एमालेका नेताहरु पुस १० गते प्रचण्डको नेतृत्वमा सरकार गठन हुँदा भएको ‘सहमति’अनुसार आफूहरुले अघि सारेको व्यक्ति राष्ट्रपति हुनुपर्ने बताउँदै आएका छन्।
प्रधानमन्त्री प्रचण्ड र उनको दल माओवादी केन्द्रले राष्ट्रपति निर्वाचनमा राष्ट्रिय सहमतिको अडान लिएपछि कांग्रेस पनि निर्णायक पहलकदमीमा छ। कांग्रेस आफूले प्रस्ताव गरेको उम्मेदवारका हकमा राष्ट्रिय सहमति जुट्ने, जुटाउनुपर्ने बताउँदै आएको छ।
यसबीच नेकपा एकीकृत समाजवादीले पनि राष्ट्रपति पदमा दाबेदारी प्रस्तुत गरेको छ। बिहीबार माओवादी केन्द्रको संसदीय दलको कार्यालय, सिंहदरबारमा बसेको ३ दल (माओवादी केन्द्र, जसपा र एकीकृत समाजवादी)को बैठकमा एकीकृत समाजवादीका नेताहरुले राष्ट्रपतिको दाबी प्रस्तुत गरेका हुन्।
कपा एकीकृत समाजवादीले वाम–समाजवादी मोर्चा बनाएर अघि बढ्न प्रस्ताव गर्दै राष्ट्रपतिमा दाबी गरेको हो। उक्त पार्टीका नेता प्रकाश ज्वालाले बैठकपछि सञ्चारकर्मीसँग भनेका थिए, ‘‘हामीले चुनावअघि पनि यस विषयमा कुरा गरेका थियौं। अहिले पनि त्यसमै केन्द्रित भएर छलफल गरेका छौं। सकभर वाम समाजवादी मोर्चा बनाएर जाऔं भनेर छलफल गरेका छौं।’
नेता ज्वालाले पार्टी अध्यक्ष माधव कुमार नेपाललाई राष्ट्रपति बनाउने विषयमा छलफल भएको समेत जानकारी दिएका थिए। प्रधानमन्त्री प्रचण्डले राष्ट्रिय सहमतिबाट राष्ट्रपति चयन गर्ने कुरा गरिरहेको र आफ्नो पार्टीका अध्यक्ष नेपालमा त्यस्तो सहमति जुट्ने वातावरण बनेकाले अन्य पार्टीसँग पनि छलफल गर्ने कुरा भएको ज्वालाको भनाइ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
