काठमाडौं– राष्ट्रपतिको उम्मेदवारका विषयमा छलफल गर्न बालुवाटार पुगेका नेपाली कांग्रेसका सभापति शेरबहादुर देउवा र प्रधानमन्त्री पुष्पकमल दाहाल प्रचण्डबीचमा भएको बैठक सकारात्मक भएको छ।
भेटमा सहभागी नेपाली कांग्रेसका नेताहरुका अनुसार छलफल सकारात्मक भएको र केहीदिनभित्र नतिजा निस्कने छ। अपरान्ह एकीकृत समाजवादीका अध्यक्ष माधव नेपालसहितका नेताहरुसँगको भेटपछि प्रधानमन्त्री प्रचण्डलाई भेट्न देउवा आफ्ना नेताहरु पूर्णबहादुर खड्का र गगन थापासहित पुगेका थिए।
भेटमा पार्टी सभापति देउवाले प्रतिनिधि सभाको पहिलो दल नेपाली कांग्रेस भएकाले आफ्नो राष्ट्रपतिको उम्मेदवारलाई सहयोग गर्न आग्रह गरेको भेटमा सहभागी कांग्रेस उपसभापति पूर्णबहादुर खड्काले बताए।
‘पहिलो दल भएकाले हामीले राष्ट्रपति पाउनुपर्छ भनेर मागेका छौं। तपाईंले राष्ट्रिय सहमतिको कुरा गर्नुभएको छ। संसद्मा रहेको पहिलो दल जसले तपाईंलाई विश्वासको मत दिएको छ। उसलाई राष्ट्रपति दिँदा सकारात्मक सन्देश जान्छ,’ खड्काले भने, ‘प्रधानमन्त्रीले दलमा छलफल पनि गरेको छु। दलले मलाई अधिकार पनि दिएको छ। म सत्ता रुढ अरु दलहरुसँग पनि छलफल गरिरहेको छु। उपयुक्त समयमा निर्णयमा पुग्छु।’
कांग्रेसले अब सबै दलहरुसँग भेट्ने र प्रधानमन्त्रीलाई विश्वासका मत दिएका कारण पनि राष्ट्रपतिमा सहयोग माग्ने प्रस्ताव पार्टी सभापति देउवाले गरेको नेता खड्काले बताए।
गठबन्धन ब्यूँताउने सहमति भएको हो त? भन्ने प्रश्नमा उनले त्यसलाई भने अस्विकार गरेका छन्। उनले भने, ‘‘अहिले हैन। कहाँबनाट यस्तो सहमति हुन्छ। हामी अपरिपक्व निर्णय गर्दनौं। जबसम्म राष्ट्रपतिमा एउटा निर्णयमा पुग्दैनौं अरु कुरा हुँदैन। यो राष्ट्रपतिको निर्वाचन र त्यसको परिणामसँग मात्र जोडिएको कुरा छ। अहिले अरु गठबन्धन वा पुरानो गठवन्धनबारे कुरा भएको छैन। राष्ट्रपति निर्वाचनबारे मात्र कुरा भएको छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
