काठमाडौं– नेपाली कांग्रेसका सभापति शेरबहादुर देउवाले चुनावअघिकै गठबन्धन ब्युँताउने औपचारिक प्रस्ताव गर्ने भएका छन्। जसका लागि उनी अहिले पार्टीका शीर्ष नेताहरूलाई लिएर प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’लाई भेट्न बालुवाटार पुगेका छन्।
देउवाका साथमा उपसभापति पूर्णबहादुर खड्का तथा महामन्त्री गगन थापा बालुवाटार पुगेका छन्। देउवाले प्रचण्डसँग पुरानै गठबन्धन ब्युँताउने औपचारिक प्रस्ताव गर्ने बताइएको छ।
कांग्रेस नेताहरू बालुवाटार जानुअघि देउवानिवास धुम्बाराहीमा एकीकृत समाजवादीका अध्यक्ष माधवकुमार नेपाल, महासचिव वेदुराम भुसाल लगायतका नेताहरूसँग धुम्बाराहीमा भेट गरेका थिए। उक्त छलफलमा नेपाल पुरानै गठबन्धन ब्युँताउन सकारात्मक रहेको भेटमा सहभागी एक नेताले बताए।
अहिले बालुवाटारको छलफलमा माओवादीबाट प्रधानमन्त्री प्रचण्ड तथा वरिष्ठ उपाध्यक्ष एवं उपप्रधानमन्त्री तथा भौतिक पूर्वाधार मन्त्री नारायणकाजी श्रेष्ठ रहेको बताइएको छ। स्रोतका अनुसार प्रचण्डलाई पाँचै वर्षका लागि प्रधानमन्त्री मान्ने र राष्ट्रपति कांग्रेसलाई दिनेगरी सहमति गर्न देउवाले चुनावी गठबन्धन ब्युँताउने प्रस्ताव गर्न लागेका हुन्।
माओवादीले आफ्नो उम्मेदवारलाई राष्ट्रपतिमा सघाउनेमा कांग्रेस नेताहरू विश्वस्त छन्। दुई पार्टीबीच आगामी सत्ता साझेदारीका सन्दर्भमा छलफल भइरहेको नेताहरूको भनाइ छ।
यसअघि पुस १० गते बिहान कांग्रेसले प्रचण्डलाई प्रधानमन्त्री दिन नमानेपछि उनी बालुटारबाट गठबन्धन छोडेर निस्केका थिए। त्यसपछि उनी एमालेसहितका दलको समर्थनमा प्रधानमन्त्री भए। तर, २६ पुसमा उनले विश्वासको मत लिँदा कांग्रेसले पनि उनलाई विश्वासको मत दिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
