काठमाडौं– आगामी बैशाख १० गते हुने चितवन क्षेत्र नम्बर २ को प्रतिनिधि सभा उपनिर्वाचनमा जनमोर्चाले उम्मेदवारी दिने निर्णय गरेको छ।
मंगलबार पार्टी अध्यक्ष चित्रबहादुर केसीको अध्यक्षतामा बसेको संसदीय दलको बैठकले उपनिर्वाचनमा भाग लिने निर्णय गरेको हो। साथै जनमोर्चाले राष्ट्रिय स्वतन्त्र पार्टीलाई अमेरिकी साम्राज्यवाद र पश्चिमा देशहरुको स्वास्थपूर्तिका लागि खुलेको आरोपसमेत लगाएको छ।
बैठकको निर्णयमा भनिएको छ, ‘चितवन जिल्ला निर्वाचन क्षेत्र नम्बर २ को उपनिर्वाचनलाई नेपालमा बढ्दो अमेरिकी साम्राज्यवादको प्रभाव, इसाईकरण तथा पश्चिमाहरूको स्वार्थपूर्तिका लागि नेपालमा खोलिएको “स्वतन्त्र” पार्टीको भूमिकालाई भण्डाफोर गर्नका लागि उपनिर्वाचनलाई संघर्षको महतत्त्वपूर्ण मञ्चको रूपमा अगाडि बढाउने निर्णय गरेको छ।’
साथै राजमोले पछिल्लो अवस्थामा नेपालमा अमेरिकी साम्राज्यवादले आफ्नो भूमिका बढाउँदै लगिरहेको बताएको छ। नेपालको राष्ट्रियताका लागि भू राजनीतिक विशिष्टताका कारण भारतीय साम्राज्यवाद मुख्य खतराको रूपमा रहँदै गरेका बेला केही दशकदेखि पश्चिमा शक्तिहरू पनि तीव्र ढंगबाट नेपालमा आफ्ना अजेन्डाहरू स्थापित गरेर नेपालको राष्ट्रियता, सार्वभौमसत्ता र अखण्डता कमजोर पार्ने रणनीतिअन्तर्गत काम गरिरहेको राजमोले आरोप लगाएको छ।
‘सिक्किमको भारतमा विलय अमेरिकी साम्राज्यवाद तथा भारतीय विस्तारवादको संयुक्त प्रयासबाट मात्र सम्भव भएको हो। नेपालको सार्वभौमसत्ता र अखण्डतालाई खतम गर्नका लागि अमेरिकी साम्राज्यवादसहितका पश्चिमा शक्ति तथा भारतीय साम्राज्यवाद संयुक्त रूपले नेपालको राष्ट्रियता, सार्वभौमसत्ता र अखण्डता खतम गर्नका लागि काम गरिरहेका छन्, जसको प्रत्यक्ष उदाहरण गत मङ्सिरमा भएको प्रतिनिधि सभाको निर्वाचनमा चितवन जिल्ला २ नम्बर क्षेत्रमा रवि लामिछानेको विजयलाई लिन सकिन्छ,’ राजमोले भनेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
