काठमाडौं– सरकारले नेपाल प्रहरीको नायब महानिरीक्षक (डीआईजी) बाट अतिरिक्त महानिरीक्षक (एआईजी) मा बढुवाको तयारी गरेको छ। रिक्त रहेका ५ एआईजीको पदको बढुवाका लागि फाइल तयार पार्न प्रहरी प्रधान कार्यालयलाई निर्देशन समेत भइसकेको छ।
आज (आइतबार) सार्वजनिक बिदा भएकाले सम्भवतः भोलि (सोमबार) बढुवा समितिले एआईजी बढुवाका लागि सिफारिस गर्ने तयारी गरेको स्रोतले नेपाल लाइभलाई जानकारी दियो।
केही समय अघिसम्म नेपाल प्रहरीमा ४ जना एआईजीको दरबन्दी रिक्त थियो। फागुन ५ गते मात्रै उमेर हदका कारण पूजा सिंह अनिवार्य अवकाशमा गएपछि रिक्त एआईजीको संख्या ५ पुगेको छ। तिनै रिक्त ५ दरबन्दीमा सरकारले एआईजी बढुवा गर्न लागेको हो।
लामो समयदेखि नेपाल प्रहरीमा ४ एआईजीको पद भने रिक्त थियो। सरकारले चुनाव पश्चातमात्रै बढुवा गर्ने तयारी गरेको थियो। तर चुनावपछि नयाँ सरकार बनेसँगै तत्काल एआईजी बढुवा नहुने संकेत देखिएको थियो। तत्कालीन गृहमन्त्री रवि लामिछानेले भने डीआईजीबाटै आईजी बनाउने तयारी गर्दै बढुवाको मुखमा डीआईजीको सरुवा गरेका थिए।
बढुवाका प्रतिस्पर्धीहरुलाई विभिन्न प्रदेश तथा विभागहरुको जिम्मेवारी दिएर पठाइएको थियो। गृहमन्त्री लामिछानेले समेत काम हेरेर बढुवा गरिने भन्दै उनीहरुलाई जिम्मेवारी दिएर सरुवा गरेका थिए। तर सर्वोच्च अदातले नागरिकता विवादको मुद्दामा गरेको फैसलाका कारण लामिछानेको मन्त्री पद नै गुमेपछि भने प्रधानमन्त्री पुष्पकमल दाहाल प्रचण्ड आफैंले गृह मन्त्रालय राखेका छन्। प्रचण्डकै निर्देशनपछि एआईजी बढुवाको फाइल अघि बढाइएको हो।
रिक्त ५ एआईजीका लागि दर्जन डीआईजीहरु प्रतिस्पर्धामा छन्। अहिले बढुवा हुने ५ एआईजी मध्येबाटै आउँदो चैत ११ गते प्रहरी महानिरीक्षक (आईजी) बन्ने हुँदा एआईजी बढुवा निकै पेचिलो बनेको छ।
बढुवाको टप ‘थ्री’ मा रहेका डीआईजीहरु मसाउद आलम खाँ, नलप्रसाद उपाध्याय र मोहनकुमार आचार्य पनि हालका आईजी धीरज प्रताप सिंहसँगै आउँदो चैत ११ गते अवकाशमा जाने भएकाले त्यो भन्दा पछिल्लो ब्याचका डीआईजीहरुबाट एआईजी बढुवा गर्ने तयारी सरकारले गरेको छ।
एसएसपीबाट बढुवा भएको ९ महिनापछि आईजी
आउँदो चैत ११ मा आईजी जो बने पनि उनीहरु गत असार अर्थात ९ महिना अघिसम्म प्रहरी वरिष्ठ उपरीक्षक (एसएसपी) थिए। ९ महिनाअघिसम्म एसएसपीमा रहेका उनीहरुलाई गत असारमा मात्रै बढुवा गरेर डीआईजी बनाइएको थियो। तीनै व्यक्तिमध्येबाट आउँदो चैतमा ११ मा एकजना आईजी बन्ने छन्।
गत असारसम्म एसएसपीमा रहेर डीआईजीमा बढुवा हुनेहरुमा बसन्तबहादुर कुँवर, टेकप्रसाद राई, अशोक सिंह, दीपक थापा, श्यामलाल ज्ञवाली, किरण बज्राचार्य, सन्दीप भण्डारी, सुदीप गिरी, मीरा चौधरी, टेकबहादुर तामाङ, उमेशराज जोशी, भीमप्रसाद ढकाल, रामदत्त जोशी, पोषराज पोखरेल, बुद्धिराज गुरुङ, दुर्गा सिंह र किरण राणा छन्।
उनीहरु सबै एआईजी बढुवाको प्रतिस्पर्धामा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
