धनगढी– नेपाल कम्युनिस्ट पार्टी एकीकृत समाजवादीका ‘सम्मानित नेता’ झलनाथ खनालले सुदूरपश्चिम प्रदेशका मुख्यमन्त्री कमल शाहले विश्वासको मत पाउनेमा आशावादी रहेको बताएका छन्।
सरकार गठन गर्न संख्या महत्त्व भएकाले मुख्यमन्त्री शाहले विश्वासको मत पाउने खनालले आशा व्यक्त गरेका हुन्।
‘नेकपा माओवादी केन्द्रले सकारात्मक ढंगले अगाडि बढेमा विश्वासको मत प्राप्त भइहाल्छ। माओवादी केन्द्र वा नागरिक उन्मुक्ति जसले मत दिएपनि हुन्छ। २७ नाघेपछि बहुमत पाप्त भइहाल्छ’, समाजवादी प्रेस संगठन नेपाल कैलालीले आयोजना गरेको पत्रकार सम्मेलनमा बोल्दै नेता खनालले भने, ‘विश्वासको मत प्राप्त गर्न महत्त्वपूर्ण कुरा संख्या हो। त्यसमध्येमा दुई पार्टी मुख्य निर्णायक भएकाले दुवै पार्टी सकारात्मक भएमा विश्वासको मत प्राप्त भइहाल्छ।’
उनले संघीय संरचनामा केन्द्रकै जस्तो प्रदेशमा हुनुपर्ने अवस्था नरहेको बताए। ‘संघीय संरचनामा प्रदेशमा पनि केन्द्रकै राजनीतिक समिकरण हुनुपर्छ भन्ने छैन’, खनालले भने, ‘संघीयता लागू भएका विभिन्न राष्ट्रमा केन्द्र सरकारभन्दा पनि प्रान्तमा फरक दलको सरकार बनेका इतिहास छन्। प्रदेश विशेषमा कुन पार्टीले बहुमत ल्याएको छ त्यस आधारमा सरकारहरु बन्ने गर्छन्। त्यसकारण केन्द्रमा जे छ, त्यही मापदण्ड लागू गर्नुपर्छ भन्ने केही जरुरी हुँदैन।’
खनालले टीकापुर घटनाको आरोपमा पक्राउ परेका रेश्म चौधरीको मुद्दामा तथ्यसंगत ढंगले निष्कर्षमा पुग्नु राम्रो हुने बताए। उनले भने, ‘त्यतिबेलाका गल्तीहरु के हुनु?, एकातिर ठूल्ठूला वारदातहरु भएका छन्। यी कुरा अनदेखा गर्नुभएन। तर, को हो त जिम्मेवार? भन्ने बारेमा बढी गहिरिएर विश्लेषण गर्नुपर्छ र तथ्यसंगत ढंगले निष्कर्षमा पुग्नुपर्छ।’
उनले रेश्म चौधरी लगायतको समूह त्यो घटनामा संलग्न नरहेका हुन र आशंकाका आधारमा निर्णय भएका छन् भने पुर्नविचार गरिनुपर्ने बताए।
पूर्वप्रधानमन्त्रीसमेत रहेका खनालले अहिलेको सत्तारुढ गठबन्धन भत्किने सम्भावना नरहेको बताए। उनले भने, ‘अहिलेको गठबन्धन भत्किने र नयाँ बन्ने त्यस्तो केही सम्भावना देखिरहेको छैन।’
उनले राष्ट्रपतिको निर्वाचनको हकमा भने सबै राजनीतिक दलले सुझबुझपूर्ण तरिकाले निर्णय लिनुपर्ने बताए। ‘राष्ट्रपतिको निर्वाचन भनेको महत्त्वपूर्ण अजेन्डा हो। यसमा सबै राजनीतिक दलले सुझबुझ र बडो दूरदर्शिताका साथ संविधानको मर्म, हामीले स्थापित गरेको लोकतान्त्रिक मूल्य, मान्यताका साथ राम्रो व्यक्तित्वलाई पदमा पुगाउनुपर्छ,’ खनालले थपे, ‘राष्ट्रिय सहमतिकै आधारमा योग्य व्यक्तिलाई राष्ट्रपति चयन गर्नुपर्छ।’
उनले राजनीतिक दलहरूबीच हुने सहमतिका आधारमा आवश्यक परेमा आफ्नो पार्टीले पनि राष्ट्रपतिमा उम्मेदवार उठाउने उल्लेख गरे। उनले राष्ट्रपतिमा राजनीतिक मान्छे नै हुनुपर्ने र गैरराजनीतिक मान्छेलाई राष्ट्रपति बनाउँदा लोकतन्त्र नै समस्यामा पर्ने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779880470.png)
-1764146706.png)
-1779545841.jpg)
