यसकारण ‘भ्यालेन्टाइन डे’ को पूर्वसन्ध्यामा गुलाबको फूल आयातमा रोक लगाइयो

अर्थ समाचार

नेपाल लाइभ शुक्रबार, माघ २७, २०७९ १३:३०

काठमाडौं- ‘भ्यालेन्टाइन डे’ को पूर्वसन्ध्यामा सरकारले विदेशबाट ताजा गुलाबको फूल ल्याउन रोक लगाएको छ। बिहीबार एक सूचना जारी गर्दै कृषि मन्त्रालय मातहतको प्लान्ट क्वारेन्टिन तथा विषादी व्यवस्थापन केन्द्रले मातहतका नाका कार्यालयहरूलाई आयात अनुमति बन्द गर्न भनेको हो।

नेपाल, भारत तथा चीन सीमाका १५ भन्सार कार्यालयलाई पत्राचार गर्दै केन्द्रले विशेष कारण भन्दै गुलाबको फूल आयातमा रोक लगाएको हो।

यो सूचनासँगै पूर्वको काँकडभिट्टादेखि पश्चिमको गड्डाचौकी र उत्तरका कुनै पनि नाकाबाट गुलाब आयात गर्न पाइने छैन। ‘केन्द्र मातहतका सबै कार्यालयहरूबाट विशेष कारणले अर्को व्यवस्था नभएसम्म गुलाबको फूल आयात अनुमति जारी नगर्न हुन अनुरोध गरिन्छ’, परिपत्रमा भनिएको छ।

केन्द्रले वनस्पतिजन्य रोगको जोखिमका कारण आयात तत्कालका लागि रोकिएको जनाएको छ। विरुवाजन्य चिजमा रोग र किराको सम्भावना भएपछि तत्काल आयात रोकिएको केन्द्रका सूचना अधिकारी महेशचन्द्र आचार्यले बताए।
‘नेपालमा गुलाब र अन्य विरुवामा रोग आउने जोखिम देखियो। जोखिम अध्ययन पनि नभएका कारण अहिलेलाई रोकिएको हो,’ उनले भने।

यसबारे प्राविधिक समितिको बैठक बाँकी नै रहेकाले त्यसपछि मात्रै थप निर्णय हुने आचार्यले बताए। नेपाल फ्लोरिकल्चर एसोसिएनका अध्यक्ष मीनबहादुर तामाङले भने मन्त्रालयले गुलाब ल्याउन बन्द गरेको कारणबारे आफू जानकार नभएको बताए।

चालु आर्थिक वर्षको पुससम्म नेपालले १३ लाख ३३ हजार रुपैयाँ बराबरको १० हजार ६१२ किलो गुलाबको फूल आयात गरेको भन्सार विभागको तथ्यांकले देखाउँछ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

धवलागिरिका दुर्गम गाउँमा सडक पहुँचमा जोडियो

लाइसेन्सको परीक्षा दिन गएका नक्कली परीक्षार्थी पक्राउ

लमजुङमा भूकम्पको महसुस