काठमाडौं– थाहा अभियन्ता रुपचन्द्र विष्टको जीवनमा आधारित फिल्म ‘रुदाने : विद्रोहको नेपाली नाम’को ट्रिजर २९ सेप्टेम्बर २०२१ मा सार्वजनिक भयो। सार्वजनिक ट्रिजरमा गाउँ गाउँमा गएर मानिसलाई ‘थाहा पाउनुपर्छ’ भन्दै जागरुक बनाउने रुदाने दुरुस्तै देखिएका थिए।
ट्रिजरले फिल्मको प्रतीक्षालाई झन् झन् बढाएको थियो। ‘रुदाने’टिमको कामलाई धेरैले प्रशंसा पनि आएको थियो।
हास्य कलाकार मनोज गजुरेलले टिमलाई बधाई दिँदै लेखेका थिए, ‘आफ्नो ज्यान बचाउन मान्छेले जीवनमा थुप्रै कर्म गर्नुपर्छ। तर, कसैकसैलाई एउटै कर्मले जीवनपछि पनि ‘जीवित’ राख्दछ। चलचित्र ‘रुदाने’ टीमले त्यस्तै सुन्दर काम गरेको छ। जसले उहाँहरुलाई जीवनपछि पनि जनमानसले सम्झिरहनेछ।’
उनले लेखेको स्टाटस निकै घतलाग्दो थियो। फेसबुकमा उनको स्टाटसको एक अंश यस्तो थियो, ‘आशा गरौं- बिर्सिएका ती ‘करिस्म्याटिक विद्रोही’ ‘रुदाने’लाई सिनेमा मार्फत् अहिलेको पुस्ताले चिन्नेछ। र, भन्नेछ- ‘चे ग्वेभारा त नेपालमा पनि जन्मिएका रहेछन्!’
धेरैले प्रतीक्षा गरेको रुपचन्द्रको बायोपिक ‘रुदाने’ कहिले प्रदर्शन हुन्छ?
यसको जवाफ दर्शकहरूले पाउन सकेका छैनन्। १८औं स्मृति दिवसका दिन घोषणा गरिएको उक्त चलचित्र ०७४कै अन्तिममा रिलिज गर्ने घोषणा निर्माण टिमले गरेको थियो। तर घोषणा भएको पाँच वर्षसम्म पनि फिल्म प्रदर्शनको छाँटकाँट देखिन्न।
सुटिङ बाँकी , तर अनिश्चित
फिल्मको ट्रिजर सार्वजनिक हुँदा फिल्मको ३० प्रतिशत सुटिङ सकिएकै थिएन। ६ महिनाअघि फिल्मबारे कुरा गर्दा रुपचन्द्रको भूमिका निर्वाह गरेका अभिनेता दिव्यदेवले भनेका थिए, ‘७० प्रतिशत सकिएको थियो। बाँकी अहिलेसम्म छायाँकन भएको छैन। कहिले हुन्छ नै थाहा छैन।’
अमित किशोर सुवेदी र विकास ढकालले संयुक्त लेखन तथा निर्देशन गरेको फिल्मलाई जागृत रायमाझीले निर्माण गरेका थिए। फिल्मको मुख्य चरित्रमा दिव्यदेवका साथै नम्रता श्रेष्ठ, रवि गिरि ,सुभाष गजुरेल, अमर सुवेदी लगायतका एक सय भन्दा बढी कलाकारहरुको अभिनय थियो।
अहिलेसम्म बाँकी सुटिङ सुरु नहुँदा कलाकारहरूमा निराशा छाएको छ। अभिनेता दिव्यदेव यसबारे अहिले केही बोल्न चाहँदैनन्। केही समयसम्म उनी आफैंले पनि बाँकी सुटिङका लागि पहल गरे।
तर सुरु नभएपछि अहिले उनी निराश देखिएका छन्।
निर्माण टिम भन्छ– अर्को वर्ष रिलिज हुन्छ
सुटिङ किन रोकियो? निर्माण टिमसँग यसको ठोस जवाफ छैन। निर्माता जागृत रायमाझी आर्थिक कारण सुटिङ नरोकिएको बताउँछन्। बरु आगामी फागुनको दोस्रो सातापश्चातात् बाँकी सुटिङ सकाउने उनको दाबी छ।
‘हामीले लगातार ५५ दिन सुटिङ गर्यौं। चेपाङ बस्तीमा गएर १५ दिन बस्दा ह्याङ भएको थियो। रेस्ट गर्न रोकेका थियौं। त्यसपछि कोभिड सुरु भयो,‘ जागृत बताउँछन्।
जागृतका अनुसार ३ वर्ष लगाएर अनुसन्धान र १ वर्ष स्क्रिप्टमा लगानी गरेर सुरु गरिएको फिल्म हो यो। अनुसन्धानको बेला १२ सय जना मान्छेसँग निर्माण टिमले भेटेर कुरा गरेको थियो।
अब ८ प्रतिशत मात्र सुटिङ बाँकी भएकाले पनौती लगायतका लोकेसनमा आगामी महिनामै छायांकन गरिसिध्याउने उनले बताए।
कथालाई केही परिवर्तन गरिएकाले छायांकनमा धेरै समय नलाग्ने उनको दाबी छ। ‘अब १० लाख जतिमा सुटिङ सकिन्छ। सबै गरेर १ करोड लगानी पुग्छ। अब ०८० सालमा फिल्म दर्शकले हेर्न पाउनेछन्,’ उनी भन्छन्।
फिल्मका निर्देशक विकास ढकाल भने दुई महिनापछि सुटिङमा जाने बताउँछन्। निर्माता र निर्देशले भनेको सुटिङको मिति भने फरक छ। यसर्थ उनीहरू निश्चित देखिन्नन्। ढकाल अहिले पोस्ट प्रोडक्सनको काम भइरहेको पनि बताउँछन्।
उनको दाबी छ– भदौसम्म सम्पूर्ण काम सकिनेछ।
सम्भावना कति?
‘रुदाने’ चरित्रका लागि दिव्यदेवले निकै मिहिनेत गरेका थिए। रुपचन्द्रको आवरण, लवज र हाउभाउमा उनले निकै दिन र महिना खर्चिएका थिए। पात्रको तयारी गरिरहँदा रुदाने आवरणमा काठमाडौंको आकाशे पुलमा भाषण समेत गरे।
रत्नपार्कमा भाषण मात्र गरेनन्, कविता लेखिएका पर्चा बनाएर बेचे पनि। चरित्रका लागि दिव्यदेवले गरेको लगानीले ६ महिनाअघिसम्म उनलाई चिन्तित तुल्याइरहन्थ्यो। सबैले भेट, फोन तथा म्यासेजमा सोधिरहन्थे– रुदाने कहिले आउँछ। जवाफ थिएन उनीसँग।
त्यसको जवाफ त उनीसँग अहिले पनि छैन। निर्माता र निर्देशकले भनेअनुसार सुटिङबारे जानकारी पनि छैन दिव्यदेवलाई। अहिले उनी पोएट आइडको होस्ट गरिरहेका छन्। सुटिङको कुरा आयो भने पनि उनी तत्काल समय दिन सक्ने अवस्थामा देखिन्नन्। रुदानेको आवरण, लवजमा फेरि सुरुदेखि काम गर्नुपर्यो।
यद्यपि निर्माता चरित्रमा धेरै मिहिनेत गर्नुपर्ने चुनौती बाँकी भागमा नरहेको बताउँछन्। टिमका केही कलाकार भने नाम नखुलाउने सर्तमा बाँकी काम सुरु नभएकोमा मात्र हैन, अहिलेसम्म पारिश्रमिक नपाएकोमा पनि दु:खेसो गर्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
