काठमाडौं– पुस २७ गते सुदूरपश्चिम प्रदेशको मुख्यमन्त्री नियुक्त भएका नेकपा एमालेका प्रदेश सभा संसदीय दलका नेता राजेन्द्र सिंह रावलसामू अब दुईवटा मात्रै विकल्प छन्– राजीनामा दिने वा विश्वासको मत पेस गरेर संसद् गर्ने।
मुख्यमन्त्री नियुक्त भएको १ महिनाभित्र विश्वासको मत लिइसक्नुपर्ने संवैधानिक व्यवस्था छ। संवैधानिक व्यवस्थाअनुसार मुख्यमन्त्री रावलले बिहीबार नै विश्वासको मत लिइसक्नुपर्छ। बिहीबार अपराह्न ४ बजे बस्ने प्रदेश सभा बैठकमा मुख्यमन्त्रीले विश्वासको मत माग्ने अपेक्षा गरिएको छ।
तर, मुख्यमन्त्री रावलले विश्वासको मत पाउने सम्भावना कमजोर छ। सरकार गठनका बेला समर्थन गरेको नागरिक उन्मुक्ति पार्टीले विश्वासको मतका सन्दर्भमा स्पष्ट निर्णय गरेको छैन। उन्मुक्ति पार्टीका नेताहरुले भने आफूहरुका माग सम्बोधन नभएसम्म कुनै पनि सरकारलाई विश्वासको मत नदिने आफूहरुको पुरानै अडान रहेको बताउँछन्।
५३ सदस्यीय प्रदेश सभामा कुनै पनि दलको स्पष्ट बहुमत छैन। रावल दुई वा दुईभन्दा बढी दलको समर्थनमा मुख्यमन्त्री बन्दा उनलाई २९ सांसदको समर्थन थियो। एमालेका १०, माओवादी केन्द्रका ११, नागरिक उन्मुक्तिका ७ र राप्रपाका १ सांसदले रावललाई समर्थन गरेका थिए।
अहिले एमालेका १०, माओवादीका सभामुख बाहेक १० र राप्रपाका १ गरी २१ सांसदको मात्रै रावललाई पूर्ण समर्थन छ। विश्वासको मत सिद्ध गर्नका लागि २७ सांसदको समर्थन आवश्यक पर्छ। यस्तो अवस्थामा उनले विश्वासको मतका लागि प्रस्ताव पेस गरे पनि असफल हुने सम्भावना धेरै छ।
विपक्षमा रहेको नेपाली कांग्रेसका १९, एकीकृत समाजवादीका ४ र १ जना स्वतन्त्र सांसद छन्।
एमाले नेतृत्वको वर्तमान सरकारले विश्वासको मत नपाए वा मुख्यमन्त्रीले राजीनामा दिए नयाँ सरकार गठनको प्रक्रिया सुरु हुनेछ।
एमाले नेता रावल संविधानको धारा १६८ को उपधारा (२) अनुसार दुई वा दुईभन्दा बढी दलको समर्थनमा मुख्यमन्त्री नियुक्त भएका थिए। रावलले प्रदेश सभामा विश्वासको मत प्राप्त नगरेमा वा राजीनामा दिएमा अब संविधानको धारा १६८ को उपधारा (३) अनुसार सरकार गठनको प्रक्रिया सुरु हुनेछ।
उपधारा (३) मा प्रदेश सभामा सबैभन्दा बढी सदस्यहरु भएको दलको नेतालाई प्रदेश प्रमुखले मुख्यमन्त्री नियुक्त गर्ने व्यवस्था छ। जसअनुसार प्रदेश सभाको सबैभन्दा ठूलो दल नेपाली कांग्रेसको संसदीय दलका नेता नयाँ मुख्यमन्त्री नियुक्त हुन सक्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
