काठमाडौं– अन्तर्राष्ट्रिय विकासका लागि अमेरिकी नियोग (यूएसएआईडी) प्रमुख सामन्था पावरले अमेरिकाले नेपालसँगको मित्रताको सम्बन्धलाई बिस्तार गर्न चाहेको बताएकी छिन्।
बुधबार दुई दिने नेपाल भ्रमणका क्रममा काठमाडौं आएकी उनले यस्तो बताएकी हुन्। उनले नेपाल र अमेरिकाबीचको सम्बन्ध सुमधुर बनाउनका लागि अमेरिकाले विगत लामो समयदेखि नै नेपालका विभिन्न क्षेत्रहरुमा सहयोग गर्दै आएको बताइन्।
प्रमुख पावरले नेपालमा अमेरिकाले गर्दै आएको सहयोग र आगामी दिनमा गर्ने सहयोगमा कुनै भूराजनीतिक सम्बन्ध नरहेको दाबी गरिन्। उनले नेपालमा अमेरिकाले गरेको लगानीलाई भूराजनीतिक सम्बन्धका रुपमा नबुझ्नसमेत आग्रह गरिन्। उनले अमेरिकाले नेपाललाई प्राथमिकताका साथ सहयोग गरिरहेको पनि बताइन्। उनले नेपालसँग सम्बन्ध स्थापित गरेर सँगै काम गर्न अमेरिका इच्छुक रहेको स्पष्ट पारिन्।
‘भूराजनीति परिवर्तन भइ नै रहन्छ। शीतयुद्धभन्दा अघि एक ठाउँ थियो र शीतयुद्धमा अर्को र पछि अर्को भयो। तर हामी काममा केन्द्रित हुनेछौँ, नेपाललाई अमेरिकाले गरेको सहयोगलाई भूराजनीतिक विषयसँग नजोड्नुहोला,’ उनले भनिन्, ‘हामी साथमा काम गर्नेर्छौं, अमेरिकाले नेपालमा गर्ने लगानी कुनै भूराजनीतिक आयामको उत्पादन हो भनेर हामीले लिएका छैनौँ। नेपालसँग गरेको प्रतिबद्धताको उत्पादन हो।’
प्रमुख सामन्थले सञ्चारकर्मीहरुले सोधेको अमेरिकी राष्ट्रपति जो बाइडेनले आयोजना गर्ने ‘प्रजातन्त्र सम्मेलन’मा नेपालका प्रधानमन्त्रीलाई बोलाइएको हो? भन्ने प्रश्नमा नेपालका प्रधानमन्त्रीले यसअघिको सम्मेलनमा व्यक्त गरेका प्रतिबद्धताहरुलाई व्यक्त गर्न पाउने अवसरका रुपमा हेरेको बताइन्। उनले सो सम्मेलनमा नेपालका प्रधानमन्त्री पुष्पकमल दाहाल प्रचण्डलाई पनि निमन्त्रणा गरेको जानकारी दिइन्।
यसअघि पावरले मंगलबार सरकार, नागरिक समाज र निजी क्षेत्रका नेतृत्वकर्ताहरूमाझ नेपालको लोकतान्त्रिक उन्नतिलाई अघि बढाउन यूएसएआईडीले ५ करोड ८५ लाख अमेरिकी डलर नेपाली करिब साढे ७ अर्ब रुपैयाँभन्दा बढी सहयोग प्रदान गर्ने घोषणा गरेकी थिइन्।
उक्त रकममध्ये ४ करोड २ लाख डलर सन् २०२२ मा घोषित ६५ करोड ९० लाख अमेरिकी डलरको विकास उद्देश्य सम्झौताको एक अंश रहेको यूएसआईडीले बताएको छ।
यस्तै, उक्त रकममध्ये करिब २ करोड डलर प्रादेशिक तथा स्थानीय सरकारहरूको सेवा सुदृढमा खर्च गर्नुपर्ने छ।
त्यस्तै, नागरिक समाज र सञ्चार माध्ययले आधारभूत स्वतन्त्रता र जबाफदेहितालाई अघि बढाउन महिला, युवा र सीमान्तकृत समुदायहरूका नेतृत्वमा र उनीहरूकै निम्ति बनेका स्वतन्त्र नागरिक समाजका संस्थाहरूलाई करिब १ करोड ८५ लाख डलर समाविष्ट रहेको बताइएको छ।
यी नयाँ लगानीहरू नेपालका लक्ष्य र आकांक्षााहरूलाई टेवा पुर्याउन नेपालका सरकार र जनता, निजी क्षेत्र र अन्यसँग रहेको यूएसएआईडीको ६० वर्षभन्दा लामो साझेदारीमा आधारित रहेको बताइएको छ।
नेपालीहरूले आफ्नो लोकतन्त्रलाई कसरी सुदृढ बनाउने भनी राम्ररी जानेको र पारस्परिक सहयोगबाट मात्र नेपाललाई समृद्ध बन्न मद्दत गर्न उक्त सहयोग गरेको यूएसआईडीले बताएको छ।
पावरले उक्त सहयोग घोषणा गरेपछि यूएसआईडीले जारी गरेको विज्ञप्तिमा नयाँ सरकारले जारी गरेको न्यूनतम कार्यक्रमलाई सहयोग पुर्याउने उद्देश्य रहेको बताइएको छ। ‘नेपालले हालसालै जारी गरेको साझा न्यूनतम कार्यक्रममा समाविष्ट लगायतका सरकारी प्राथमिकताहरूसँग हाम्रो सहयोगलाई समायोजन गर्न सम्बन्धित नेपाली सरकारी निकायहरूसँगको साझेदारीमा काम गर्न युएसएआइडी तत्पर छ,’ यूएसएआईडीले जारी गरेको विज्ञप्तिमा उल्लेख छ।
पावरको भ्रमण अमेरिका सरकारबाट पछिल्लो २० वर्षमा भएको उच्च तहको भ्रमण हो। यसअघि अमेरिकाबाट तत्कालीन विदेशमन्त्री कोविन पावेलले नेपालको भ्रमण गरेकी थिइन्।
मंगलबार बिहान काठमाडौं आइपुगेकी पावरले नागरिक समाजका केही व्यक्तित्वसँग छलफल गरेकी थिइन्। त्यस्तै मंगलबारै उनले परराष्ट्रमन्त्री बिमला राई पौड्यालसँग पनि भेट वार्ता गरेकी थिइन्।
यस्तै, बुधबार भने पावरले अर्थमन्त्री विष्णु पौडेल र प्रधानमन्त्री पुष्पकमल दाहाल प्रचण्डसँग भेटवार्ता गरेकी थिइन्।
उक्त भेटमा यूएसएआईडीले नेपालको लोकतन्त्रलाई बलियो बनाउनेमा थप सहयोग गर्ने र जववायु परिवर्तनको मुद्दामा पनि सँगै रहने छलफल भएको पावरले बताएकी छिन्। पावर बुधबार नै स्वदेश फर्कने कार्यक्रम रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779880470.png)
-1764146706.png)
-1779545841.jpg)
