धनगढी– पाँच वर्षदेखि धनगढीको शिवशिखर बहुउद्देश्यीय सहकारी संस्थामा बचत गर्दै आएकी वडा नम्बर ८ की केशरी राना यतिबेला आफ्नो बचत डुब्ने हो कि भन्ने त्रासमा छिन्। उनले पाँच वर्षको अवधिमा उक्त सहकारीमा करिब पाँच लाख रुपैयाँ बचत गरेकी छन्।
तर यतिबेला सहकारी नै बन्द भएको खबर पाएपछि आफ्नो बचत रकम सहकारीबाट कसरी उठाउने भन्ने चिन्ताले उनलाई पिरोलेको छ। बचत गरेको सोही रकमले भविष्यमा केही गरौंला भन्ने सोचेकी केशरीलाई अब त्यो रकम कसरी असुल गर्ने भन्ने चिन्ता छ।
मंगलबार बिहान सहकारी अगाडि भेटिएकी उनले भनिन्, ‘खाता खोलेको पाँच वर्ष भयो। पाँच लाख जति बचत गरेकी छु। सबैले अब सहकारी नै बन्द भयो भन्छन्। मेरो बचतको रकम पाइन्छ कि भनेर यहाँ आएकी हुँ।’
लाखौं रकम उठाएको शिवशिखर बहुउद्देश्यीय सहकारी संस्था नै बन्द भएपछि यतिबेला सहकारीमा दैनिक बचतकर्ताको भीड लाग्ने गरेको छ। केशरी पनि अरु बचतकर्ता जस्तै आफ्नो रकम डुब्ने चिन्तामा छिन्।
एकछाक खानासमेत कटाएर बचत गरेको रकम अहिले डुब्ने हो कि भन्ने चिन्ताले सताउने गरेको उनको भनाइ छ। करिब चार/पाँच दिनदेखि उक्त सहकारीमा बचतकर्ताको भीड लाग्ने गरेको छ। ‘बचत गराउने बेला भोलिको सुरक्षाका लागि हो भन्दै मनाए सहकारीका मानिसहरुले। अहिले त्यही बचत पनि असुरक्षित देखियो,’ उनले गुनासो गरिन्।
यस्तै धनगढी उपमहानगरपालिका–५ का जाँइका पारस खड्काले पनि विगत चार वर्षदेखि सहकारीमा पैसा जम्मा गर्दै आएका छन्। ‘विश्वास र भरोसामा हामीले आफ्नो पैसा जम्मा गर्यौं, लगभग साढे तीन लाख जम्मा गरेको छु। हामीले त का भाग्लान् र भन्ने लागेको थियो तर कार्यालय नै बन्द भएपछि हामी पनि अब पैसा कसरी उठाउने, सहकारीले केही विश्वासको आधार त दिनुपर्यो नि?’, उनले भने।
सहकारी सञ्चालक समितिले कार्यालय नै बन्द गरेर सम्पर्कमा नआएको उनको गुनासो छ। कम्तीमा पनि सहकारीका तर्फबाट बचतकर्तालाई रकम फिर्ता गर्ने लिखित जवाफ आउनुपर्ने उनको भनाइ छ।
धनगढी उपमहानगरपालिका–३ चटकपुरका तीर्थ प्रसाद श्रेष्ठ पैसा लिन आउँदा सहकारी बन्द देखेपछि निराश छन्। एक वर्षदेखि उक्त सहकारीमा रकम जम्मा गर्दै आएका उनी सहकारी नै बन्द भएपछि अब बचतको रकम के हुने हो भन्ने अन्योलमा छन् उनी। ‘मुद्दती खातामै मात्र मेरो ११ लाख छ। अब सहकारी नै बन्द भइसक्यो। कसरी पैसा उठाउने हो?’ उनले भने।
सहकारीले बचत फिर्ता गर्ने भनेका कारण आफूहरु दुई दिनदेखि धाएको धनगढीकै सुरेश भट्टले बताए। ’हिजोदेखि हामी लाइनमा छौं। एक करोड रुपैयाँ आउँदैछ। रकम वितरण गर्छौं भन्ने सुनेका कारण हामी आएका हौं। तर यहाँ बन्द छ।’
आइतबादेखि बन्द भएको सहकारीले मंगलबार एक विज्ञप्ति निकाल्दै आर्थिक मन्दीका कारण बचतकर्तालाई एकैपटक चल्ती खाता, मुद्दती रकम र सेयर रकम झिक्न आउँदा पुँजी व्यवस्थापन हुन नसकेको र बजार लगानी भएको कर्जा असुली नभएका कारण कार्यालय केही दिनका लागि बन्द गरेको जानकारी दिएको छ।
पुँजी व्यवस्थापन नभएसम्मका लागि कार्यालय बन्द राख्ने सहकारीका प्रमुख हेमराज जोशीले सूचनामा उल्लेख गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
