काठमाडौं– परराष्ट्रमन्त्री बिमला राई पौड्याल र नेपाल भ्रमणमा आएकी यूएसएआईडीकी प्रमुख सामन्था पावरबीच भेटवार्ता भएको छ।
अमेरिकी राष्ट्रिय सुरक्षा परिषद्कै सदस्यसमेत रहेकी पावर मंगलबार बिहान काठमाडौं आइपुगेकी थिइन्। दुई दिने भ्रमणमा काठमाडौं आइपुगेकी पावरले पहिलो राजनीतिक भेट परराष्ट्रमन्त्री पौड्याललाई गरेकी हुन्।
त्यसअघि पावर भक्तपुर एक विद्यालयमा पुगेर अन्तरक्रिया गरेकी थिइन्। त्यसलगत्तै नागरिक समाजका केही व्यक्तिहरूसँग भेटघाट गरेकी थिइन्।
मन्त्री पौड्याल र पावरबीच सिंहदरबारस्थित परराष्ट्र मन्त्रालयमा भेट भएको थियो। उनीहरुले नेपाल–अमेरिका बीचका विविध विषयमा छलफल गरेको परराष्ट्र मन्त्रालयले बताएको छ।
पावरले मन्त्री पौड्यालसँग एमसीसीको कार्य प्रगति, जलवायु परिवर्तन, नेपाललाई अति कम विकसित मुलुक (एलडीसी)बाट विकसित मुलुकका रुपमा स्तरउन्नति गरिएपछि अमेरिकाबाट हुने सहयोगलगायतका विषयमा महत्वपूर्ण छलफल गरेको बताइएको छ। जवाफमा मन्त्री पौड्यालले अमेरिकी सरकारले नेपाललाई गर्दै आएको सहयोगप्रति धन्यवाद दिएको मन्त्री पौड्यालको सचिवालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
