काठमाडौं– यस वर्ष काठमाडौं उपत्यकामा हिँउदे वर्षा भएको छैन। केही दिन यता एकाएक चिसोको अनुभूति कम हुने गरेको काठमाडौं उपत्यकाको आकाशमा बिहीबार भने बादल मडारिएको छ। जसका कारण केही चिसोको महशुस गरिएको छ।
पछिल्ला दिनमा सुदूरपश्चिम प्रदेश र कर्णाली प्रदेशका उच्च हिमाली जिल्लामा वर्षासहित हिमपात भए पनि तुलनात्मक रुपमा यस वर्ष खासै पानी पर्न सकिरहेको छैन। मौसम पूर्वानुमान महाशाखाका अनुसार हाल देशमा पश्चिमी निम्न चापीय वायुको आंशिक प्रभाव रहेको छ।
मौसम पूर्वमानुमान महाशाखाका अनुसार तराईका एक/दुई स्थानमा हुस्सु लागेको छ। तराईका एक/दुई स्थानमा लागेको हुस्सु मध्यान्हसम्ममा क्रमिक रुपमा सुधार हुँदै जाने सम्भावना रहेको जनाएको छ।
आगामी तीन दिनको मौसमी अवस्था कस्तो छ?
बिहीबार गण्डकी प्रदेशमा आंशिकदेखि सामान्य बदली तथा मधेस प्रदेश, बागमती प्रदेश र लुम्बिनी प्रदेशमा आंशिक बदली रहे पनि बाँकी प्रदेशहरूमा मौसम सामान्यतया सफा रहेको महशाखाले जनाएको छ।
महाशाखाका अनुसार बिहीबार प्रदेश १, मधेस प्रदेश र बागमती प्रदेशमा आंशिकदेखि सामान्य बदलीका साथै गण्डकी प्रदेशमा आंशिक बदली रही बाँकी भू–भागमा मौसम सामान्यतया सफा रहने छ।
त्यसैगरि शुक्रबार प्रदेश १, मधेश प्रदेश, बागमती प्रदेश, र गण्डकी प्रदेशमा आंशिक बदली रही बाँकी भू–भागमा मौसम सामान्यतया सफा रहने प्रक्षेपण गरिएको छ। त्यस्तै, शनिबार प्रदेश १, गण्डकी र सुदूरपश्चिम प्रदेशमा आंशिक बदली रहने र बाँकी भू–भागमा मौसम सामान्यतया सफा रहने मौसमविद् विनु महर्जनले बताइन्।
तराईका थोरै स्थानहरूमा बिहानीपख हुस्सु र कुहिरो लागेर दैनिक जनजीवन, स्वास्थ्य, सडक तथा हवाई यातायातमा समेत सामान्य प्रभाव पर्न सक्ने सम्भावना रहेकोले आवश्यक सावधानी तथा सतर्कता अपनाउन उनको आग्रह छ।
हिउँदे वर्षाको सम्भावना न्यून
यस वर्ष देशैभरी तुलानात्मक रुपमा पानी कम परेको छ। मौसमविद् महर्जनले अब काठमाडौं उपत्यकामा पानी पर्ने सम्भावना एकदमै कम रहेको बताइन्। उनले भनिन्,‘काठमाडौं उपत्यकामा पानी पर्ने सम्भावना छैन। उच्च पहाडी, हिमाली भूभागका एक/दुई स्थानमा हल्का हिमपातको सम्भावना भने छ।’
मौसमविद् महर्जनका अनुसार पश्चिमी वायु सक्रिय नभएका कारण नेपालमा जाडो महिनामा पानी नपरेको हो। उनले हिजो अस्तीको मौसम प्रणाली अलि बलियो भएका कारण पश्चिमतर्फ पानी परेको र पूर्वतिर बादल मात्रै लागेको जानकारी दिइन्। काठमाडौं उपत्यकामा भने भोलिदेखि मौसम सफा हुँदै जाने मौसमविद् महर्जनको दाबी छ।
यस वर्ष हिँउदे वर्षा कम भएकै कारण हिँउदे बाली उत्पादनमा कमी हुने किसानहरुले चिन्ता व्यक्त गरेका छन्। अहिले पनि देशको धेरै क्षेत्रका किसान आकाशे पानीको भरमा खेती गर्न बाध्य छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
