काठमाडौं– जनता समाजवादी पार्टी (जसपा)का सांसद राजकिशोर यादवले प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डमा परिवर्तन आएको बताएका छन्। उपसभामुख निर्वाचनका लागि प्रतिनिधि सभामा शनिबार जारी छलफलमा भाग लिँदै उनले प्रचण्डको पुष्पकमल दाहालमा रुपान्तरण भएको शंका लागेको बताए।
‘२०६५ मा प्रचण्ड प्रधानमन्त्री निर्वाचित भइरहँदा यो देशका तमाम शोषित पीडित जनताहरु, झुपडीमा बस्ने जनताले बडो विश्वासका साथ प्रचण्डले गरिब जनताका अधिकार र सम्मान दिलाउनेछन् भन्ने भरोसा गरेका थिए। यस पटक पनि उहाँ निर्वाचित हुनुभयो। तर प्रचण्ड पुष्पकमल दाहालमा रुपान्तरण भएको शंका हामीलाई भएको छ,’ उनले भने।
यादवले प्रधानमन्त्री प्रचण्डलाई शंकाको लाभ दिएको भन्दै प्रचण्डको रुपमा गरेका प्रतिबद्धतालाई नबिर्सिन आग्रह गरे।
यादवले प्रचण्ड २०७० को निर्वाचनमा काठमाडौंबाट पराजित भए पनि सिरहाबाट विजयी भएको स्मरण गराए। ‘सिरहाका जनताले उहाँलाई सम्मानपूर्वक निर्वाचित गरेर यो सदनमा पुर्याइदिनुभयो। उहाँ भावुक भएर मधेस जाँदा भन्नुभयो– मधेससँग लभ परेको छ। मधेसका जनताले बडो विश्वासका साथ प्रचण्डले नै मधेसलाई लभ गर्न थालेका छन् भने अब मधेसका दुःखका दिन हराउनेछ भन्ने विश्वास गरेका थिए,’ उनले भने।
मधेससँग लभ परेका प्रचण्डले अर्कैसँग लगनगाँठो गाँसेको यादवको व्यंग्य थियो। ’प्रचण्डले मधेससँग लभ गर्नुभयो, ’लिभिङ टुगेदर’ कांग्रेससँग गर्नुभयो। र अहिले लगनगाँठो अर्कैसँग गाँसेर रमाइरनुभएको छ’, उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
