वादविवाद सदनको आधारभूत लक्षण हुनुपर्छ : सोविता गौतम

राजनीति

नेपाल लाइभ शनिबार, माघ ७, २०७९ १३:४४

काठमाडौं- राष्ट्रिय स्वतन्त्र पार्टीकी सांसद सोविता गौतमले वादविवाद सदनको आधारभूत लक्षण हुनुपर्ने बताएकी छिन्। शनिबारको प्रतिनिधि सभा बैठकमा उपसभामुखको उम्मेदवार इन्दिरा रानालाई प्रस्ताव गर्ने क्रममा उनले संसदीय भूमिकाको महत्त्वबारे बोलेकी हुन्।

प्रतिनिधि सभाको आफ्नो पहिलो सम्बोधनमा गौतमको भनाइ थियो, ‘विचारको विविधता र प्रतिपक्षीय विचारको सहनशीलता परस्पर प्रतिस्पर्धात्मक विचारको मन्थनले नै लोकतन्त्रलाई उन्नत बनाउन सक्छ। त्यसैले वादविवाद यस सदनको आधारभूत लक्षण हुनुपर्छ। हाम्रो संसदीय शक्तिलाई फगत अंकगणितको खेल मात्रै मान्यौं भने हामीले पाएको अमूल्य मतको अपमान त हुन्छ नै, तर नागरिकमाथि समग्र देशमाथि पनि अन्याय हुन्छ।’

उनले संविधानको भावनालाई आत्मसाथ गर्न सकियो भने मात्रै शिशु लोकतन्त्रलाई अगाडि बढाउन सकिने बताइन्। ‘संविधानप्रति कतिपय समूहका विमतिहरु पनि छन्। जसलाई यही सदनमा व्यापक छलफल गरी टुंग्याउनुपर्छ। किनकि राजनीति र लोकतन्त्र भनेको सहमति मात्रै होइन। विमति पनि हो’, उनले भनिन्।

गौतमले एकांकी विचार हाबी हुनु, प्रतिपक्षी विचार शून्य हुनु वा त्यसलाई नजरअन्दाज गरिनुले लोकतन्त्रको क्षयीकरण हुने बताइन्। ‘त्यसैले माननीय सदस्यहरुसमक्ष मेरो आग्रह पनि छ, यो लोकतन्त्रको सुदृढीकरण र संविधानको रक्षा गर्नका लागि तपाईंहरुका प्रतिपक्षी आवाज यो सदनमा बुलन्द भइरहनुपर्छ’, उनले भनिन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

नागरिकमाथि गोली प्रहार गर्नु माओवादी हिंसाको चरम कायरता थियो : सिटौला

भिजिट भिसा प्रकरण : आरोप साँचो सावित भए मन्त्री पदमात्र होइन, राजनीति नै छोड्छुः गृहमन्त्री लेखक

रास्वपाद्वारा गृहमन्त्री लेखकको राजीनामा माग