काठमाडौं– प्रतिनिधि सभाको उपसभामुख पदका लागि उम्मेदवार टुंग्याउन राष्ट्रिय स्वतन्त्र पार्टी संसदीय दलको बैठक सिंहदरबारमा जारी छ।
शुक्रबार दिउँसो उपसभामुख पदका लागि उम्मेदवारी मनोनयनको समय भएकाले उम्मेदवार टुंग्याउन बिहान ९ बजेदेखि रास्वपा संसदीय दलको बैठक बसिरहेको छ।
सत्ता साझेदार दलमा जुटेको सहमतिअनुसार उपसभामुख पद पाएको रास्वपामा उम्मेदवार टुंग्याउन भने केही अलमल देखिएको छ।
रास्वपाका बहुमत सांसदहरु सोविता गौतमको पक्षमा छन्। तर, जातीय कलस्टर मिलाउनुपर्ने आजाव उठेपछि केही अलमल भएको रास्वपाका एक सांसदले नेपाल लाइभलाई जानकारी दिए।
उपसभामुखमा सवितासँगै इन्दिरा रानामगरले दाबी कायम राखेकी छन्।
‘यसअघि राज्यशक्तिको भूमिकामा महिला–पुरुष सबै खस–आर्य भए भन्ने आजाव उठेको छ। सरकारमा सहभागी भएका सबै मन्त्रीहरु खस–आर्य हुँदा उपसभामुखमा कम्तीमा पनि जनजातिलाई अवसर दिनुपर्छ भन्ने कुरा हो,’ एक सांसदले भने।
सभामुखका लागि यसअघि दाबेदार भनिएकी सुमना श्रेष्ठले भने आफ्नो दाबी नरहेको बताएकी छन्। सामाजिक सञ्जालमा एक सन्देश लेख्दै सुमनाले कुनै पनि कुरा व्यक्ति विशेष नभएर विधि विशेष हुनुपर्ने बताएकी छन्।
‘उपसभामुखमा मेरो कुनै पनि किसिमको दाबी छैन। पार्टीले कलस्टर मिलाउनु पर्ने भएर जनजाति महिलाकै आवश्यकता भएमा पनि मेरो दाबी रहने छैन,’ सुमनाले सामाजिक सञ्जालमा लेखेकी छन्, ‘म सांसद भएर नै आफ्नो योग्यता र ज्ञानलाई विधि निर्माण र पालनाका लागि अधिकतम प्रयोग गर्ने छु। मेरो सधैंको वकालत छ कि कुनै पनि कुरा व्यक्ति विषेश नभएर विधि विषेश हुनु पर्छ।’
प्रतिनिधि सभाको उपसभामुख चयनका लागि शनिबार बस्ने प्रतिनिधि सभा बैठकमा निर्वाचन (मत विभाजन) हुँदैछ। जसअनुसार शुक्रबार दिउँसो १ बजेदेखि ४ बजेसम्म उम्मेदवारको मनोनयन हुने संघीय संसद् सचिवालयले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
