काठमाडौं- अध्यक्ष उपेन्द्र यादव प्रतिनिधि सभा निर्वाचनमा पराजित भएपछि संसदीय दलको नेता बन्न जनता समाजवादी पार्टीमा होडबाजी नै चल्यो। संघीय परिषद् अध्यक्ष तथा वरिष्ठ नेता अशोक राई, मधेस प्रदेशका मन्त्री नवलकिशोर साहदेखि पूर्वमन्त्री राजकिशोर यादवसम्म दलको नेता बन्ने दौडमा थिए।
तर, बुधबार जसपाले सर्वसम्मत रुपमा पार्टी महासचिव रामसहाय यादवलाई संसदीय दलको नेता चयन गरेको छ। केही समयअघि पार्टीले दलको नेता चयन गर्न तीन सदस्यीय निर्वाचन समिति नै बनाएको थियो।
उक्त समितिले मंगलबार दलको नेता चयन गर्नका लागि निर्वाचन कार्यक्रम सार्वजनिक गरेको थियो। सार्वजनिक गरिएको कार्यक्रम अनुसार दलको नेता चयन गर्न उम्मेदवारी दर्तादेखि निर्वाचनसम्मका कार्यक्रम राखिएको थियो।
तर, उम्मेदवारी दर्ताको क्रममा यादव बाहेक अन्यको उम्मेदवारी परेन। त्यसपछि जसपाको निर्वाचन समितिले महासचिव यादवलाई दलको नेतामा निर्विरोध निर्वाचित भएको घोषणा गरेको छ।
सप्तरी- २ जसपा अध्यक्ष उपेन्द्र यादव जनमत पार्टीका अध्यक्ष सिके राउतसँग फराकिलो मतान्तरले पराजित भएपछि उनलाई दलको नेता कसलाई बनाउने भन्ने चुनौती थियो। आफूपछिको पार्टी बरियतामा रहेका वरिष्ठ नेता राई सुनसरीबाट निर्वाचित भएपछि उनी झनै अफ्ठ्यारोमा परेका थिए।
प्रत्यक्ष र समानुपातिक गरी जसपाले प्रतिनिधि सभामा १२ सिट जितेको छ। त्यसमा पनि पार्टीको मुख्य आधार क्षेत्र मधेस भएकाले पार्टीभित्रैबाट यादवमाथि पहाडे समुदायका नेतालाई दलको नेता नबनाउन दबाब थियो। पहाडे समुदायबाट दलको नेता चयन गरेमा पार्टीलाई मधेसमा समस्या पर्ने देखिएपछि यादव मधेसबाटै पनि कसलाई बनाउने भन्ने द्विविधामा थिए।
जसपा पार्टी फुटका बेला आफ्नो माउ पार्टीमा नफर्केका प्रदेश मन्त्री नवलकिशेर साह र राजकिशोर यादवले आफूलाई मौका दिनुपर्ने दबाब अध्यक्ष यादवलाई दिँदै आएका थिए।
यादवले यही दबाबलाई मध्यनजर गर्दै दलको नेता चयन निर्वाचन प्रकियाबाट गर्ने कार्ड पार्टीमा ल्याए। त्यसका लागि यादवले तीन सदस्यीय निर्वाचन समिति नै बनाए। अन्तत: जसपाको संसदीय दलमा आफूले चाहेको पात्र र राजनीतिमा सुरुदेखि साथ दिएका रामसहाय यादवलाई चयन गरे।
निर्वाचन भएको खण्डमा पनि यादव नै संसदीय दलको नेता चुनिने निश्चित देखिएपछि राईसहित राजकिशोर यादव र नवलकिशोर साह उम्मेदवारी दर्ता गराउने बेलामा ब्याक भए।
यता अध्यक्ष यादव आफू प्रतिनिधि सभामा नरहेको भन्दै दलको नेता चयनको दिन बिहानै जनकपुर हिँडे। तर उनले दलका सबै समानुपातिक सांसदलाई महासचिवको पक्षमा खुल्न आन्तरिक रुपमा निर्देशन दिएका थिए। प्रत्यक्षतर्फ जितेकामध्ये पनि उम्मेदवार बन्न चाहेका बाहेक सबै अध्यक्ष यादवकै पक्षमा देखिएका थिए।
यादव निकट जानकारहरुका अनुसार उनले संसदीय मोर्चामा आफ्ना सहयात्री रामसहाय यादवलाई ल्याउनुका पछाडि पार्टीमा अर्को शक्ति केन्द्र निर्माण नहोस् भन्ने देखिन्छ। वरिष्ठ नेता राईदेखि राजकिशोर यादव वा साह जो सुकै दलको नेतामा आए पनि यादवलाई पार्टीमा चुतौती दिन सक्ने आकलन उनको थियो।
महासचिव यादव उपेन्द्र यादवका फोरमदेखिका सहयात्री र पार्टी जीवनमा सधैं ‘एस म्यान’ देखिएका छन्। जसका कारण यादव आफूलाई 'कम्फरटेबल' हुने गरी महासचिव यादवलाई दलको नेता बनाएको विश्लेषण गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
