काठमाडौं– आइतबारको तीव्र राजनीतिक घटनाक्रमले माओवादी केन्द्रका अध्यक्ष पुष्पकमल दाहाल प्रचण्डलाई प्रधानमन्त्री नियुक्त हुनेसम्मको स्थिति सिर्जना गर्यो। तर, बहालवाला प्रधानमन्त्री शेरबहादुर देउवाले भने राजीनामा घोषणा गर्न पनि पाएनन्।
प्रधानमन्त्रीमा दोहोरिनेमा ढुक्क थिए प्रधानमन्त्री देउवा। राष्ट्रपतिले आह्वान गरेको ७६ (२) अनुसार प्रधानमन्त्रीमा दाबी गर्न नपाए पनि ७६ (३) अनुसार आफैं प्रधानमन्त्री हुने उनको तयारी थियो।
तर, आइतबार दिउँसोदेखि तीव्र भएको एमाले र माओवादी केन्द्रको छलफल निष्कर्षमा पुगेपछि देउवाको तयारी औचित्यहीन भयो।
प्रधानमन्त्रीहरु पदबाट बाहिरिँदै गर्दा राष्ट्रको नाममा सम्बोधन गर्ने प्रचलन रहिआएको छ। त्यसक्रममा आफ्नो कार्यकालमा भएका महत्त्वपूर्ण घटनाक्रमको सम्झना गर्ने गरिन्छ। तर देउवाले त्यो अवसर गुमाए।
एमाले अध्यक्ष केपी शर्मा ओली निवासबाट भइरहेको संवाद निष्कर्षमा नपुग्ने आकलन गर्दागर्दै उनको समय व्यतित भइसकेको थियो।
२०७४ मा पदबाट बाहिरिने बेलामा प्रधानमन्त्री देउवाले झन्डैझन्डै त्यो अवसर गुमाएका थिए। त्यतिबेला (२०७४ फागुन ३) केपी शर्मा ओलीले प्रधानमन्त्रीमा दाबी प्रस्तुत गरिरहँदा देउवाले राष्ट्रको नाममा सम्बोधन गरेर राजीनामा घोषणा गर्दै थिए।
राष्ट्रपति कार्यालयले भने ओलीलाई प्रधानमन्त्रीमा नियुक्त गरेपछि मात्रै देउवाको राजीनामाको जानकारी गराएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
