काठमाडौं– काठमाडौं उपत्यकामा रहेका सम्पदा क्षेत्रको अवलोकन गर्न आउने पर्यटकहरूलाई सहज सेवा दिन ‘हप अन हप अफ’ सिटी बस सञ्चालन हुने भएको छ।
संस्कृति, पर्यटन तथा नागरिक उड्डयनमन्त्री जीवनराम श्रेष्ठले अघि सारेको पर्यटन पुनरुत्थान कार्ययोजना अन्तर्गत ल्याइएको ‘हप अन हप अफ’ सिटी बस सञ्चालनको तयारी अन्तिम चरणमा पुगेको हो।
काठमाडौं उपत्यकामा रहेका सम्पदा क्षेत्रको अवलोकनमा पर्यटक तथा धर्मावलम्बीहरूलाई सहज बनाउन ‘हप अन हप अफ’ प्रकारको घुम्ती सेवा दिन लागिएको मन्त्रालयले जनाएको छ।
पहिलो चरणमा साझा यातायातका पाँचवटा विद्युतीय बस हरेक आधा घण्टामा पाटन, काठमाडौं दरबार, पशुपति, बौद्ध र स्वयम्भू पुग्नेछ। भविष्यमा भक्तपुर चाँगुनारायणसम्म लैजाने योजना बनाइएको छ।
पर्यटकले बसको एउटा टिकट लिएपछि दिनभर 'हप अन हप अफ' का जुनसुकै बसमा चढ्न पाउनेछन्। करिब ३० किलोमिटर लामो पूरा यात्रा गर्न तीन घण्टा लाग्नेछ। आगामी अंग्रेजी नयाँ बर्षदेखि 'हप अन हप अफ’ सिटी बस सञ्चालन गरिने मन्त्री श्रेष्ठले बताए।
मन्त्री श्रेष्ठले 'हप अन हप अफ' सिटी बस प्रभावकारी रुपमा सञ्चालनबारे सरोकारवालाहरूसँग आइतबार मन्त्रालयमा छलफलसमेत गरेका छन्। छलफलमा साझा यातायातका संचालक, व्यवसायी, विज्ञ तथा ट्राफिक प्रहरी लगायत सरोकारवालाको उपस्थिति थियो।
मन्त्री श्रेष्ठले काठमाडौंका सांस्कृतिक सम्पदा घुम्न आउने विदेशी तथा स्वदेशी पर्यटकहरूलाई सम्पदा क्षेत्र अवलोकनमा सार्वजनिक सवारी सहज बनाउन ‘हप अन हप अफ’ बस सञ्चालनको अवधारणा ल्याएका हुन्।
पर्यटकलाई सम्पदा क्षेत्रको अवलोकन गर्न सार्वजनिक सवारी सहज नहुँदा हैरानी खेप्नुपरेको गुनासो आउने गरेको छ। काठमाडौंका विश्व सम्पदा सूचीमा सूचीकृत सम्पदा तथा मुख्य पर्यटकीय क्षेत्रमा 'हप अन हप अफ' बस सञ्चालन भएपछि पर्यटकहरूले केही घण्टामै मुख्य पर्यटकीय क्षेत्रको अवलोकन गर्न सक्नेछन्।
'हप अन हप अफ' का लागि वातावरणमैत्री तथा अन्तर्राष्ट्रिय मापदण्ड अनुरूपका बस सेवा सञ्चालन गरिने साझा यातायात सञ्चालक समिति सदस्य भुषण तुलाधरले जानकारी दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
.JPG)
-1764146706.png)
